為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2016 年 03 月 20 日

火療燒全身 梅花針插臉 張達明親述奇招抗癌路

一二年九月被揭發患上鼻咽癌二期的張達明,自同年年底成功抗癌後,在各方好友支持下積極復工,近日他既忙於與農夫綵排將在本月底舉行的棟篤唱外,又應保險公司之邀擔任講座嘉賓,分享抗癌歷程。

面色紅潤不少的張達明,訪問結束時,提醒攝影師為他選擇光猛、靚仔的照片刊登,十分緊張儀容。

當日講座,張達明貫徹其棟篤笑本色,無論是談到最初得悉患病時即搵定骨灰龕,還是治病期間接受火療和梅花針等奇特療程,他均以嬉笑怒罵方式演繹,惹得哄堂大笑。

台上的他看來精靈鬼馬,但在綵排棟篤唱時卻對本刊坦言,因治病後遺症,現時手腳其實廿四小時也在麻痹。「感覺好似戴住好厚嘅手套同着咗好厚嘅靴咁。」

全天候麻痹

向來熱忱演藝事業的張達明,一一年底完成了舞台劇《花心大丈夫2》後,因咳嗽及痰有血,進行檢查,發現患上鼻咽癌,頓時令他和當臨牀心理學家的太太何念慈心情直插谷底。猶幸一二年底抗癌成功,大病初癒的他邊療養身體,邊積極復工,至今三年多時間,他已準備跟農夫在本月底於伊館舉行的棟篤唱「達Ming×農夫棟篤唱已經爆咗」,日前本刊採訪時所見,即使當天他已綵排了三小時,又做了多個訪問,但仍然有氣有力,不時跟農夫談笑風生,精神不俗。

他現時一百一十磅,從他飽滿的兩頰便看得出。「係肥番啲,但未到我嘅要求,我想再肥多五磅!」縱使他仍需要覆診檢查及服藥,但基本上,癌症已經完全康復,只是因化療令他中重金屬毒,其體內的「鉑金」嚴重超標,故引致四肢麻痹的後遺症,令他有苦自己知。「我好彩嘅係o依家狀態都幾好,唔好彩嘅係,好少(癌症病患者)會好似我咁大範圍嘅麻痹,仲要時間好長,幾年嚟廿四小時都係咁!

談到手腳廿四小時麻痹的後遺症,他即時眉頭緊皺,心有猶悸。

「嗰個感覺就好似戴住好厚嘅手套、着咗好厚嘅靴。戴住厚手套打機都打唔到、㩒得唔準,連揸筷子都揸得冇咁好。我到o依家都仲有睇中醫同西醫,同埋做啲exercise,其實已經比最嚴重嗰陣好好多,我嗰陣行路都腳痹,連衫鈕都扣唔到。」

搵定骨灰龕

忙自己的棟篤笑演出外,張達明亦不時獲保險公司邀請,擔任講座嘉賓,早前,他就在一個同類講座中分享其抗癌歷程。談及獲悉患癌後,他第一時間做的事,就是上網。「我上網睇吓個病點醫,睇完就覺得,呢個病(鼻咽癌)比起其他癌症都算好o架啦!」他一臉輕鬆地說。「然後我再上網搵o依家啲骨灰龕幾多錢,而我最大嘅認識係:香港有八成嘅骨灰龕都係唔啱規格嘅!好聰明呀我!」

逼爆演講廳的六百多名觀眾一陣笑聲過後,張達明又認真地謂:「其實我唔係你哋講到咁樂觀,我怕死!而且治療嘅過程,真係好辛苦!」

訪問期間,他不時喝着自備保溫壺的暖水,注重健康。

點火燒全身

原來在暫停所有工作,專心治療癌症期間,他除了接受一般化療、電療的癌症診治外,亦同時嘗試了其他療法。台上的張達明說:「醫我個病啲方法真係奇怪到不得了!大家有冇試過梅花針?」見觀眾們大多擰擰頭,他即比劃着解釋:「平時啲針灸只係一支針,但係梅花針,係好多支針『啲!』咁樣插落去臉呀、頸呀!」有觀眾即皺着眉頭,戥他痛苦。

接着,他再問觀眾:「有冇試過火療呀?」見眾人又擰擰頭,他即笑笑口、睜大眼睛,指手劃腳、滿有興緻地說:「好勁o架!買張好平嘅按摩牀喺度,趴落去,師傅話:『除晒衫!』跟住就拎張大毛巾冚住我個身,倒啲火酒,倒到我成身都係。然後個師傅點着咗自己隻手先,就話:『達Mingo依家點着你個身,覺得頂唔順就出聲啦!』

「之後一點,嘩!我成身着晒火!佢仲問我頂唔頂得順!我大嗌:『頂唔順、頂唔順!』即刻熄番。我冇事呀,因為我當時頭向下,乜都睇唔到呀嘛;但係我個仔就擘大個口呆咗咁話:『爹哋,燒多次吖!我頭先唔記得影相呀!』」即惹來台下如雷笑聲。

本月底再與農夫合作棟篤唱,早前他跟農夫走訪尖沙咀問市民門票定價,乘機宣傳。

綵排當日,張達明不時停低與農夫討論舞步,主意多多。