為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 03 月 14 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

宅夢成真

忽然有美女送上門,相信係唔少宅男嘅夢想,即將上映嘅電影《iGirl夢情人》,就滿足晒「宅夢」;加上送上門嘅係娜姐周秀娜、文凱玲(Connie)同欣宜,我相信唔只宅男,一般男士都會非常雀躍!

今晚「Paco巨星飯堂」,我就誠邀三位美女,聯同何佩瑜(Jeana),一行四位貴賓,去到位於中環、有一站式服務嘅「馥 Fuku by Nishimura」,品嘗特色日本料理,再細說拍攝新戲嘅點滴。

我帶電影《iGirl夢情人》四位女主角:Jeana、欣宜、Connie同娜姐(左至右),去到位於中環、有一站式餐飲、零售服務嘅「馥 Fuku by Nishimura」,品嘗特色日本料理,再細說拍攝新戲嘅花絮。

戲中嘅欣宜、娜姐同Connie分別飾演女機械人,同肥仔聰、伊健及Dominic浪漫談情,滿足一眾宅男嘅夢想。

科幻浪漫

一部電影集合四位女神,其中三位仲係飾演只聽命於「主人」嘅機械人,確實係宅男們嘅夢想成真。娜姐表示:「我一聽到鄭伊健飾演我嘅『主人』,就即刻應承參演,今次係我哋第二次合作,上次佢要聽我講,今次佢就可以盡情咁命令我。故事係因為伊健同Jeana分手,然後佢就買咗我呢個機械人,去代替佢嘅女朋友;而我喺戲入面係擅長計算嘅,會話畀伊健知佢做每件事嘅風險。」

另一位「機械人」Connie就話:「Dominic同肥仔聰飾演伊健嘅好朋友,佢哋見到Chrissy(娜姐)質素咁高,就一人買一個機械人,我就係Dominic買嗰個。我哋三個喺戲入面都要由『主人』嘅指紋啟動,所以就只係聽『主人』話。我同Chrissy唔同,特點係會sexy少少,所以連造型都係以紅色為主。」

欣宜嘅「主人」係肥仔聰,「我哋由外至內都好襯!哈哈!我覺得香港好少類似嘅戲,科幻加愛情,有啲sweet嘅、浪漫嘅情節,都好有新鮮感。但係拍嘅時候就唔只sweet咁簡單,尤其係Ending嗰場戲,講我哋三個機械人同Jeana對戰,我要用超慢動作去演繹,Chrissy同Jeana就以正常速度做,Connie因為用念力所以唔使點郁,拍完我覺得好玩,而且拍嘅過程仲係我未試過嘅!」

餐廳提供廚師發辦(Omakase)套餐($1,680+10%服務費),由廚師精挑每日最新鮮、最時令嘅食材炮製,我哋今次品嘗嘅,包括呢道前菜北海道中札內黑枝豆、醋浸沖繩水雲。

刺身拼盤包括:生鰺拿魚腩、縞鰺、油甘魚、海膽、赤鯥魚、金目鯛、鯛魚、鯖魚、左口魚,清甜鮮味。

軟殼蟹沙律用上秘製沙律醬,將食材味道全面提升。

幕後啱傾

驟眼睇,Jeana好似成為戲中嘅「反派角色」,佢立即自辯:「我覺得唔係嘅,其實個角色都係為咗捍衛自己嘅愛情啫。好多女仔都會喺分手之後,先發現前度男友嘅好處,即係覺得佢先係對自己最好、最啱自己咁;所以當我個角色發現伊健鍾意個機械人,就會不擇手段去爭番個男朋友返嚟。喺愛情角度出發,每個人都係自私嘅。」

鏡頭前充滿火藥味,鏡頭後四位美女就相當啱傾,欣宜話:「試過一次我哋要直踩廿幾個鐘,Connie已經帶晒枕頭、被鋪嚟開工,Chrissy同Jeana就拍緊武打戲,我同肥仔聰就喺Connie隔籬傾星座,傾吓傾吓Connie連覺都唔瞓,join埋我哋一齊傾。」

Jeana(右)飾演伊健嘅前度女友,仲上演同娜姐(左)「爭仔」嘅場面。

欣宜同Connie即場示範戲中嘅念力威力,七情上面。

一講起美食,四位嘉賓即展現鬼馬一面,娜姐(右二)同Connie(中)仲毫不介意賣萌。

餐廳嘅食材同零售部嘅美點,都係由老闆May姐(右三)親自喺日本搜羅,佢以健康、特別為先決條件,我同四位美女嘉賓就食得更放心。

美肌秘訣

哈哈哈!要培養到team spirit先拍到好戲,同四位美女嘅美肌秘訣——從根本入手,有異曲同工之妙。娜姐話:「我覺得做運動好重要,因為可以將身體入面嘅毒素,通過流汗排出身體;飲適當份量嘅水都好重要,有充足水份先唔會水腫。」

欣宜和議話:「做運動真係好重要,可惜近排我好好彩地有好多人搵我做嘢,搞到我冇去做運動,皮膚就即刻『投訴』;同埋唔使開工嘅話,我都唔會化妝,畀皮膚休息吓。」

Connie補充:「落妝一定唔可以懶!要落得好乾淨,如果唔係就會積咗喺毛孔,手尾好長。」

Jeana就話,一字記之曰:勤。「我每日都會敷幾塊mask,咩種類都有,但一定要啱自己嘅皮膚類型,洗面要仔細啲,勤力啲就一定有回報。」

蒸物係日本流心燒賣,有蟹肉味同明太子味,各具特色。

宮崎長壽烏冬選用日本和牛炮製,肉味極富層次。

天婦羅有活蝦、宮崎甜蕃薯、京都青椒,香脆可口。

甜品嘅種類繁多,先有水果拼盤,包括:嚟自青森嘅三種蘋果(金星、富士、大紅榮),加埋長崎不知火凸頂柑同宮崎日向夏,一次過品嘗東洋果味。

仲有青森直送嘅蘋果雪葩同紅葡萄雪葩,特別滿足。

馥 Fuku by Nishimura
地址:中環夏愨道10號和記大廈3樓
電話:21105038

下期預告

帶溫嵐品嘗特色川菜。