為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 03 月 07 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

Brand New Start

「新開始」未必局限喺新一年嘅開始,以今晚「Paco巨星飯堂」嘅嘉賓馬賽為例,佢嘅新開始,源於佢為咗實現自己嘅電影夢,於是佢就移居北京呢個大中華電影中心,為夢想先佔地利。

難得馬賽返港,我就帶佢去到位於灣仔嘅「皇后飯店」,以最有代表性嘅港式西餐,慶祝馬賽事業路上嘅新開始!

我帶馬賽去到「皇后飯店」位於灣仔嘅新店,品嘗陪住唔少港人成長嘅西餐滋味,亦暢談佢嘅新開始。

雖然為事業移居北京,但馬賽都有偶爾返港,上次佢仲挑戰自己,一嘗攀石之樂。

基地北移

嚟自重慶嘅馬賽,喺去年毅然移居北京,佢話:「我由讀大學到投身社會,都係家住香港,所以我覺得香港就係我嘅家,今次搬去北京,其實係我想挑戰自己。我喺大學未畢業嘅時候就入咗TVB,喺差唔多八年嘅時間入面,我都有TVB嘅照顧,咁啱去年約滿,我就想試吓去外面闖一闖。

「多得TVB,我有好多幕前嘅演出機會,而我大學係讀製作嘅,所以我對幕後嘅工作都好有興趣,尤其係編劇,o依家我已經有啲古仔develop緊。」

作為電影人,我好認同馬賽長駐北京嘅決定,因為當地係大中華電影市場嘅中心,只要人喺製作單位嘅所在地,同埋主動爭取機會,就一定可以一展所長。「多謝Paco你嘅強心針!我都係本住如果可以喺北京立足,就可以喺國際電影市場上立足,作為我自己嘅目標,希望我可以好快搵到適合自己嘅路向。

「呢兩年經歷咗好多嘢,令我成長咗唔少。以前喺香港住,我會請工人去幫手處理屋企嘅大小事;o依家搬到北京,所有嘢都係我自己處理,由工作上做自己嘅經理人,到屋企嘅家頭細務,都係我一手包辦。我想要一啲『接地氣』(平易近人、接近群眾)嘅生活習慣,對我寫劇本都有好大嘅幫助。」

大蝦薯仔沙律($180),落足料炮製,鮮甜嘅大蝦同滑溜嘅沙律配搭得天衣無縫。

蝦多士($75)香脆可口,係佐酒佳品。

羅宋湯($52)係餐廳嘅招牌菜,多年來水準如一,值得推介。

心靜茹素

哈哈哈!馬賽嘅「接地氣」同我奉行嘅六字箴言「順天意.接地氣」有50%一樣,真係不謀而合!佢繼續解說自己嘅「接地氣」生活:「o依家我出入都搭地鐵,車程期間可以觀察到好多嘢,呢啲瑣碎事就成為咗我刺激思維嘅有用素材。

「另外我要take care自己嘅飲食,我一四年開始茹素,o依家喺北京,我都多咗喺屋企煮。我check過,知道粥其實係滋養身體嘅,所以我會將穀類同豆類mix埋一齊煮粥。好似早餐咁,我就將紅豆、黃豆、黑豆、黑芝麻同核桃mix埋,然後打成米糊就一餐,咁係好養顏o架,我keep住食之後,皮膚都好咗。」

馬賽仲話,茹素令自己更覺心靜。「因為以前同朋友食飯,都要睇吓餐牌,諗食羊定食牛好;o依家就簡單好多,亦唔需要諗咁多。有人以為我開始茹素係因為信佛,雖然兩者嘅時間差唔多,但係我茹素唔係百份百因為信佛,係接觸咗關於『因果』、『慈悲』嘅理論後,我好有感受,所以喺自然嘅情況下,我就選擇茹素。」

馬賽由一四年開始茹素,仲同好姊妹姚子羚(圖左)相敍。佢話茹素其中一個原因係由於佢潛心向佛。

為咗一圓自己嘅電影夢,馬賽搬到北京,開始佢「接地氣」嘅生活。

餐廳兩位老闆熱情招呼我同馬賽,我哋梗係要合照留念啦!

「皇后」係滿載香港人嘅情懷,亦珍藏咗我嘅音樂回憶,我手上嘅「Los Indios Tabajaras」大碟,對我嚟講係別有意義嘅專輯。

音樂怡情

講起選擇,今晚我喺餐廳都搵到my choice,就係一張珍藏唱片。呢張「Los Indios Tabajaras」嘅《Always in my Heart》專輯,係我涉足唱片界之初,作為唱片推銷員時一張有意義專輯。見到「老友」,我就有一種back to the good old days嘅感覺。

呢張Light Music專輯,係我做唱片推銷員嘅時候,第一張暢銷專輯,聽咗專輯嘅歌,人會自然地放鬆,音樂無時地所限,所以我覺得係好適合現今社會嘅專輯,對化解戾氣,追尋內心平和,特別有效。

香煎鱸魚伴檸檬牛油蜆仔汁($200/套餐),外脆內juicy嘅鱸魚,同鮮香嘅醬汁match晒!

扒大蝦龍蝦汁意粉($200/套餐),「雙蝦」嘅味道互相輝映,大like!

黑椒德國豬手($180/套餐),香脆豬皮同嫩滑豬肉,營造出層次豐富嘅味覺享受。

串燒牛柳($220/套餐)最考控制火候嘅工夫,牛肉燒得外脆內嫩,係一次成功嘅示範。

俄國牛柳絲($120)味道夠晒懷舊,充滿港式西餐嘅情懷。

皇后飯店
地址:灣仔茂蘿街1-11號1樓
電話:21161910

下期預告

帶周秀娜、欣宜、文凱玲及何佩瑜(Jeana)品嘗特色懷石料理。