為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 03 月 07 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

謝安:「用行動証明自己實力」

由美國大導演詹姆士卡麥隆(James Cameron)創辦、九度勇奪奧斯卡殊榮而名噪一時的數字王國Digital Domain(0547),如何在謝安(Daniel)領導下以短短四年走出破產陰霾,由傳統技術轉型發展至虛擬實境特效,陸叔和謝安今期續談「王國」發展中的苦與樂。

陸:Daniel,你接手做數字王國呢個熱廚房之後有咩改革?

謝:陸叔,我答應做行政總裁後嘅第二日就好後悔,因為接受洛杉磯時報採訪,影咗張好醜嘅相,本來都無所謂,但張相key咗我同沉緊嘅鐵達尼號(Titanic)劇照一齊,嗰張相我永遠記得。

陸:呢樣係咪你到美國後遇過最差嘅事?

謝:哈哈,未算最差,只有更差。喺我返工嘅第一日,就要攞住咪同當時一千二百個員工講話,美國嗰時好興同員工開集體聚會,本來諗住抄奧巴馬演講用嗰招,搵班管理層幫我站台,點知佢哋用盡藉口推無嚟到,我好難過但唔想解釋咁多,只想用行動去証明我係做實事嘅。

陸:你接手後又點幫公司止蝕?

謝:首要係將公司搞返起,好早我亦表明唔會帶自己人嚟,當時每個月營運燒錢嘅速度驚人,當然我都好希望保留大多數員工,每個員工背後就係代表一個家庭,可惜最終都要裁員減薪去止血,公司要持續發展,大家一定要互信互助,所以我堅持親身見嗰百名將被抄嘅員工。

陸:咁仲有咩其他拯救行動?

謝:嗰時合作嘅團隊大部份係藝術家,佢哋只會諗點先可以攞到奧斯卡,仲要係不計成本,拍一次唔得,就拍第二、第三次……我記得有次做《鋼鐵奇俠3(Ironman 3)》嘅電影特效,連客戶Marvel嗰邊都滿意,我哋嗰位supervisor竟然話要重做,嗰刻簡直想掐死佢,要重做一個鏡頭起碼用二十萬美金!由嗰刻開始我知道一定要控制營運成本,仲一定要將呢個重任交畀擅長管賬嘅印度股東,最好笑嗰年佢連聖誕樹嘅花費都cut埋,陸叔,數字王國就係咁救返嚟。

「八十後」謝安勸籲時下年輕人要走出去多見識,勿鑽牛角尖。

陸:咁你覺得近年特效製作公司其實面對咩問題?

謝:九十年代初特效公司唔多,可以講係物以罕為貴,呢啲公司共通點大多係由藝術家管理,佢哋唔會重視成本控制,連幫李安製作《少年Pi的奇幻漂流》嘅特效最後都做唔住。不過早期嘅電影公司肯花錢喺特效上,但隨住科技發達,電影公司開始壓價去降低製作成本,其後又因為多咗一般特效入行,好多電影製作嘅特效就以低價去搶生意。好彩我哋一向做高端特效,自然無電影公司壓價嘅問題。基於我哋電影製作成效有口碑,唔會亂接單,只專注做高端特效,相比做得好過一般特效好多,市場份額於是有一定嘅保證。

陸:我同意成本控制係好重要,不過我都留意到數字王國由易手到o依家未有盈利,你哋最近仲收購咗朝霆百分之八十五股權,佢哋亦係未有錢賺,點解你哋有咁嘅決定?

謝:公司過去核心業務其實係有見過盈利,不過我哋確係喺投資業務錄到有虧損。今次同朝霆結盟,係因為我同霆鋒(Nicholas)都係八十後好啱傾,哈哈。因為公司對視覺特效同虛擬實境(VR)技術嘅未來發展潛力好有信心,我哋結盟亦會為公司開拓大中華地區呢個市場。

陸:啱嘅,巴菲特講過,股民用相比合理價錢,去投資一個暫時遇困嘅優質公司,最後獲得回報唔錯嘅機率通常會大啲。

謝:陸叔,我哋深信喺特效科技範疇同領域上,將來會有好龐大嘅發展空間,加埋我哋現有嘅專業人材同團隊,我哋希望投資者會以正面去睇今次嘅結盟。

陸:咁數字王國未來有咩發展大計?

謝:我哋一直嚴控製作成本,相較其他特效,呢樣係我哋競爭優勢。加上公司有二十二年歷史,擁有二十幾年嘅片庫,呢啲都係公司珍貴嘅資產。當年做嘅侏羅紀公園素材,將來可以改造為恐龍公園嘅體驗;另有九部災難電影嘅素材,亦都可以攞嚟改造為世界末日題材嘅體驗,未來我哋會較集中資源喺呢方面發展。

陸:Daniel,你都係年輕人,有無咩分享畀時下嘅年輕人?

謝:我覺得香港跟台灣都有情感上嘅問題,我哋兩地資訊發展好發達,喺好多方面都可以互動互融,嘗試去實驗兩岸三地一體化。香港一向尊重專業,亦擁有龐大唔同嘅專才,台灣跟以前嘅香港有啲似,跟o依家嘅中國亦都有啲似,喺全世界上我哋兩岸三地嘅競爭力係有目共睹。大家行得到呢一日,年輕人應該多啲走出去見識吓,接收多啲正面嘅信息,睇多啲人哋嘅優點,唔好淨係睇個別單元同鑽牛角尖。