為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 02 月 22 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

陳嘉賢:「體驗營銷 資源善用」

先後獲選為香港青年工業家及十大傑出青年,德國寶執行董事及副總裁陳嘉賢(Karen),十年前加入家族生意後,積極推廣品牌,今次陸叔與兩代揸弗人續談他們如何不斷拓展業務,及創建「家有德國寶,生活無煩惱」的營銷策劃。

陳國民和陳嘉賢希望將德國寶的產品滲入消費者的生活。

陸:Karen,點解你喺美國讀完書及做咗十年嘢之後,先決定返嚟家族幫手?

賢:陸叔,○六年爸爸喺內地買咗塊地,叫我同先生上去跟嗰個項目,不過○八年遇到金融海嘯,項目唯有暫緩,我同先生於是返嚟香港總部幫手,咁我都想轉換吓工作環境,就係咁正式返嚟幫爸爸喇,我負責市場推廣同宣傳,我先生就負責品牌包裝。公司當時仲未有市場推廣部,於是順理成章成立埋添。

陸:加入總公司就設立新部門,都係個小改革喎,要唔要先同爸爸商量?

賢:爸爸好放手,畀好大自由度我,佢知我哋做嘢會一步一步嚟,唔會要公司突然畀一大筆錢,動輒就要用幾千萬嚟做一個推廣活動。唔似得其他大公司有咁多資源,我哋中小企始終要善用資源。

陸:你初初加入公司最想做咩呢?

賢:我好想一致地連結公司品牌同企業形象,就好似logo大細、字型、格式、公司嘅代表顏色等等。以前同事可能無咁留意,我同先生會好着重呢啲細節。我覺得公司形象統一好重要,到o依家總算改善咗好多,不過我明白好多嘢要慢慢去改進嘅。

陸:喺改革當中有無遇到啲咩困難?

賢:哈哈,我係空降部隊嘛,亦想證明我係有能力帶領公司做得更好,唔多唔少都有啲。公司有唔少核心成員睇住我大,佢哋係公司嘅老臣子,又做咗好多年,加入公司後我好多時仲要叫佢哋做嘢,初初都係要一段過渡時間畀大家去適應o架。

陸:聽講你返嚟香港之後仲讀咗個碩士,要打理公司又要讀書,唔覺得辛苦?

賢:爸爸都有問我做咩要走去讀書o架,我喺美國讀工商管理係主修金融,返嚟公司幫手先發覺市場推廣唔係話落手去做就得,咪想惡補一下呢方面嘅知識。嗰陣我同先生一齊去中大半職修讀市場學,兩個一放工就趕去上堂,真係幾辛苦。不過有得着嘅,好多時上堂學到嘅理論,喺公司可以即刻應用到,到今時今日我喺公司都仲用緊當時學到嘅嘢。而且我都識咗一啲做唔同品牌市場推廣嘅同學,每次我用公司嘅例子去做分析,我哋嘅case study(個案研究)係全班最強,我諗可能係全班第一添,哈哈。

陸:不如同我哋分享吓德國寶嘅市場推廣策略啦?

賢:喺呢個年代直接灌輸品牌有幾好已經唔得,我哋好着重體驗營銷,透過軟性嘅推廣畀客戶群去體驗我哋嘅好處。我哋會積極主動參加香港工展會、國內嘅外商博覽會,喺會場內我哋會用德國寶嘅家電、整嘢畀入場觀眾試食,透過試食畀消費群認識德國寶產品嘅優點。我哋亦一向有製作開心廚房系列嘅食譜去吸引買家,當然唔少得贊助我哋代言人肥媽主持嘅飲食節目啦。透過唔同渠道去將德國寶個名、同各式各樣唔同嘅產品、慢慢咁滲入畀消費群,透過呢啲形形色色嘅消費者教育,去畀消費者一齊體驗有我哋德國寶嘅生活。

陸:你啱啱提到外商博覽會,要參與其中係咪唔容易?

賢:哈哈,其實我哋有機會參與,要多得香港政府嘅中小企業資助計劃,令我哋有機會喺外商博覽會做內銷。我哋好好彩一向有做開工展會,參與外商博覽會就唔算好難。身為一個香港品牌,喺五年前開始,我哋已先後做過跨境展覽會近四十次o架喇。

陸:咁公司日後喺市場上仲有無咩嘅發展潛力?

賢:由最初工展會、跨境展覽會,做到第一間成功賣上飛機嘅電器品牌,無論香港或者內地,我哋認為消費者對德國寶已經有唔錯嘅認識,所以對我哋未來喺內地發展,加盟商網絡同埋電商網購等等呢啲擴展計劃,我哋都抱有信心。

陸:Karen,咁講吓你有無咩心願吖?

賢:陸叔,我好希望延續爸爸嘅心血,先將德國寶拓展及組裝為線上線下(offline to online)嘅家品專門店,擴大市場份額同產品銷售量,傳承爸爸「以身作則,以心服務」嘅精神,就好似爸爸咁講,我哋唔想為咗上市而上市。

陸:最後想問吓你哋兩位嘅座右銘係咩呢?

陳:想創業要揀自己孰識嘅,要造市場份額大嘅產品,做任何事都先要親力親為,最好兼備逆向思維。

賢:我喜歡不斷學習,每隔一段時間,透過唔同嘅工作、地方或者環境,去學習體驗新嘅探索。