為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 02 月 09 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

喜氣迎猴年

猴年到,「Paco巨星飯堂」就帶畀你笑聲迎新歲!今次我特別邀請咗近日大熱劇集《愛情食物鏈》嘅三位男女主角:金剛、小儀同陳智燊(Jason),為呢部高收視嘅喜劇,進行小結算。

佢哋亦有專屬嘅方式迎接新嘅一年,咁我就帶三位嘉賓,去到位於銅鑼灣嘅「四季禪」,讓佢哋一邊品嘗特色日本料理,一邊分享迎猴嘅喜氣!

我同劇集《愛情食物鏈》嘅主角們Jason、小儀及金剛(左至右),喺位於銅鑼灣嘅「四季禪」率先向你哋送上新年嘅祝福!

Jason、小儀(上圖)、金剛同高海寧(下圖)喺《愛情食物鏈》中各展所長,大受觀眾歡迎,收視屢創佳績,係近年少見嘅佳作。

無敵觀眾緣

三位嘉賓同高海寧孭飛嘅劇集,最高收視達三十一點,係近年少見嘅佳績。連一向少睇劇集嘅我,都睇過金剛喺暴雨中苦候「女神」高Ling。小儀即話:「好多網民都好鍾意嗰場戲,因為天下間好多『兵』,佢哋就話嗰場戲講盡咗啲『兵』嘅心聲。」

金剛就話:「我自己睇完之後都喊咗出嚟,我嘅角色對高Ling真係好好,任佢糟質。點會有咁好嘅男仔o架?」

令觀眾有共鳴,係劇集成功嘅其中一個因素;我覺得另一個原因,就係幾位主角嘅觀眾緣。小儀話:「我哋真係好似觀眾隔籬屋嘅朋友,不論係我哋嘅外型,定係故事嘅情節,一啲都冇離地。有咁好嘅收視,我哋都好開心。」

Jason就話,喺劇集播出之前,有唔少朋友都為呢個卡士而擔心。「我一知道套劇嘅對手係小儀同金剛,就預咗好好玩。同啲朋友講啲對手係佢哋同高Ling,啲朋友通常都問:『仲有邊個呢?』,所以o依家有咁好嘅反應,就特別興奮!

「喺劇入面我同高Ling最多對手戲,仲成日要咀。得意嘅係周邊啲人都戥我哋緊張,仲安慰我話:『我哋唔會同Sarah(未婚妻宋熙年)講o架,你盡情咀啦!』,搞到我覺得幕後仲好笑過幕前嘅情節。」

餐廳以半自助形式侍客,精選嘅頭盤、生蠔、刺身、壽司、海鮮、天婦羅等,都以此方式「現身」,相當具新鮮感。

自家製明太子溫泉蛋烏冬($138),係以餐廳每日自家製成嘅日本烏冬做材料,麵條夠晒新鮮美味,配合明太子同溫泉蛋,正!

鐵板燒波士頓龍蝦、配牛油海膽汁(下圖),及燒鹿兒島縣和牛西冷配照燒汁(上圖)係餐廳嘅情人節套餐其中兩項菜式,詳情可參閱後頁。

小儀同金剛合作無間,培養出獨有默契。

過年私習俗

農曆新年就嚟到,三位嘉賓過年都有啲小習慣。小儀話:「咁多年嘅農曆新年,我都係喺香港過嘅,因為我婆婆喺年初二生日,嗰日我哋成大班親戚就會為佢慶祝,如果間酒樓睇到煙花就特別high!

「我過年就仲有一個自己畀自己嘅習俗,入咗行之後,我真係會去買新嘅紅色內衣褲着,年三十晚洗乾淨就着。我又聽人講,我哋做呢行着紫色都得,大紅大紫吖嘛!所以有一年我就上身大紅、下身大紫,就擸晒嘞!」

台灣代表金剛就話:「每一年新年,我都會請假返屋企,因為新年好緊要,我會選擇同屋企人同埋好朋友一齊過,所以年初一至年初八我都喺台灣。過年氣氛同香港差唔多,但有我阿媽煮嘅餸就最緊要!自從我個妹嫁咗之後,年三十晚就得我陪阿爸阿媽,我更加要返去啦!」

金剛話自從胞妹(中)出嫁後,過年就只有佢喺老家陪伴父、母(右)。

因為劇集嘅成績理想,一眾主角都希望猴年可以開拍第二集,金剛(右)仲提議第二集名為《愛情食物鏈Yeah!》,充滿喜劇感。

準猴年新郎

分別喺英國同香港度過農曆新年嘅Jason,就鍾意喺香港過年。「我喺返咗香港七、八年之後,返番去英國過年,年初一撞啱係閒日,London完全冇新年氣氛;喺香港過年,電視好多嘢睇,出街又好多節目,節日氣氛好濃烈,所以我鍾意喺香港過年囉。」

Jason喺過年前已經非常忙碌,「猴年我最大嘅計劃就係結婚,如無意外就係喺一六年尾,o依家已經忙緊擇日子、揀場地,希望冇人同我哋爭場地啦!」

至於小儀同金剛,就話猴年希望開拍《愛情食物鏈Yeah!》,小儀話:「我逼迫緊監製拍第二集,劇名係金剛改嘅!(金剛:「Yeah!有二嘅意思嘛,又叫得開心啲!」)Yeah!」

哈哈哈!猴年到,梗係開心至上,喜氣洋洋!

今年將同未婚妻宋熙年(中)拉埋天窗嘅Jason(右一),正積極籌備婚禮。

自家製辣味噌鹿兒島豚肉烏冬($148),幾種食材配搭出嚟嘅味道,驚喜十足。

海鰻天婦羅烏冬($158),天婦羅皮厚度啱啱好,令海鰻味道更出色。

餐廳提供嘅情人節套餐,包括:精選頭盤、生蠔、刺身、壽司、海鮮、天婦羅、沙律及即叫即煮鐵板燒;脆炸宮崎縣疋地雞配芝麻汁、西京味噌銀鱈魚、鐵板燒昆布南非活鮑魚配海膽八方汁及心太軟配日本士多啤梨等,價錢分$ 1,480 + 10%及$ 1,580 + 10%。

鹿兒島和牛日式涮牛肉鍋配自家製烏冬($338),色香味俱全。

四季禪 Shiki Zen
地址:銅鑼灣登龍街1-29號金朝陽中心2期Midtown 29樓
電話:29703218

下期預告

與星級健身教練王君萍、莊家彬及趙式浩品嘗健康中菜。