為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2016 年 02 月 07 日

谷楊岳橋入立法會玩嘢 公民黨變超齡激進派

送羊迎猴,今年農曆新年的政圈絕不平靜,皆因二月底新界東即將進行補選,建制與泛民兩陣營大拗手瓜,公民黨搵楊岳橋出戰,大鬥民建聯的周浩鼎,各路人馬都爭取喺農曆新年谷到盡。

西貢區議員方國珊做地區議題相當出位,至於「本土民主前線」嘅梁天琦,就借狙擊李國章谷自己上位,但論可觀性,當以周浩鼎和楊岳橋最矚目。有地區人士坦言,周浩鼎經常出來向街坊拉票,相當肉緊,佢仲個個星期日上埋︽城市論壇︾,反而楊岳橋曝光率就唔夠周浩鼎嚟。

公民黨走了溫和嘅湯家驊,捧激進嘅楊岳橋入立法會,有議會中人都擔心,佢會將街頭抗爭帶入議會,令本來已經拉布成風嘅立法會更加癱瘓。

社會議題政治化玩到神憎鬼厭的公民黨,力捧激進嘅楊岳橋入立法會。

參與新界東補選的周浩鼎為民建聯副主席。

公民黨以理性、中產形象起家,一直係兩條腿走路,黨中激進溫和聲音兼備,不過自年前阿湯頂唔順退黨後,公民黨就愈走愈偏激,喺前年佔領運動時期更明顯,余若薇、梁家傑等幾個加埋幾百歲嘅阿伯阿婆級高層,同班十幾歲仔混埋一齊,喺政改方案上畀佢哋牽著鼻子走不特止,仲要忍受佢哋開會唔到或者遲大到嘅細路仔脾氣,變成超齡激進派。

楊岳橋喺佔領運動期間做過義務律師,佢本來係湯家驊徒弟,當年同湯家驊一起代表公民黨參加立法會選舉,最後佢落選。湯家驊年前辭去立法會議席並話要走第三條路線後,佢就公開講湯並唔係佢師傅,仲話大家路線唔同。有法律界中人慨歎,有點教識徒弟無師傅嘅意味。

七位新界東補選候選人:(左起)楊岳橋、周浩鼎、方國珊、梁思豪、劉志成、黃成智及梁天琦。

有政壇高人分析,公民黨其實從來做地區事務都好弱,只靠挑起政治議題去谷人氣,包括狙擊政府施政。佢地玩社會議題政治化早有前科。好似一二年公民黨被指喺港珠澳大橋工程中,搵東涌居民進行司法覆核,推翻原有嘅環評報告,工程因此受到延誤,覆核最終敗訴,但工程造價就暴增八十八億元,令公帑大出血,公民黨見社會輿論唔支持,至極力劃清界線。

該政壇高人指,政府是應該接受監察,但去到太極端令社會利益受損,市民就會有意見。今次泛民包括公民黨喺高鐵撥款玩得太盡,亦可能產生同一後果,就係令走中間路線嘅選民反感,分分鐘轉軚,令楊岳橋失去唔少游離票。