為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 02 月 08 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

陸叔︰「保持清醒,保留實力」

一年之計在於春,農曆猴年將至,陸叔今次請來一位作風比較低調、在證劵圈中卻無人不識的玄學家朋友「羅大師」,為即將來臨的「猴年」前景把脈,分析未來一年在投資市場如何部署,並分享對玄學的獨有見解。

陸:羅大師,數數手指,原來我哋識咗差唔多十八年,我知道你對玄學研習一向好有熱誠,但好多人都認為玄學、算命多少係導人迷信,你自己點睇?

羅:當我第一日涉足玄學,就希望令身邊嘅人明白咩叫風水命理。我好好彩遇到恩師蔡進源老師,令我學到好多玄學嘅學問。我認為如果對一門知識不求甚解,盲目去信就可以叫迷信,不過迷信唔應該只套用喺玄學上,其他領域好似投資、經濟、政治、求學等,都可以出現迷信嘅情況。當然有人批評玄學係導人迷信,亦有人唔信風水、命理,我覺得應該問吓自己咩叫迷信先,唔去了解就否定玄學嘅存在,好似唔合理喎。

陸:既然你識風水命理,係唔係咩都可以行快人一步早着先機呢?

羅:其實唔似得睇你專欄嘅朋友,係想早着投資先機一樣,識風水命理未必可以早着先機囉。舉個例子,好似我知咩地區有坐向好嘅風水樓,問題係我想搬啫,都要睇當時有無人放盤,屋企人又鍾唔鍾意嗰度,當中可能出現好多客觀條件左右我嘅決定。事實上,大家唔應該神化玄學,以為玄學係萬能,其實算命、卜卦、風水,都係講理、數、象,係喺一個MODEL下推算事情嘅演化,就好似經濟理論模式或股票計算估值MODEL一樣,都係一種推論嘅模式,點會有百份百準確嘅答案吖。

陸:踏入一六年只有一個月,環球投資市場真係差到慘不忍睹,我想問喺玄學角度下,究竟你點睇「猴年」投資市場嘅表現?

羅:坦白講,環球投資市場互有關連而又相互影響,好難用一個盤去分析晒全球投資市場走勢。但綜合嚟講,今年有一個好特別嘅現象,就係唔理用咩方法(如八字、玄空飛星、奇門循甲、西洋天星)去推論猴年運程,都一致地唔太好景。好似今年嘅立春八字為例,驛馬逢沖而又適逢「群比奪財」,嚴格嚟講係一個走資象,尤其會喺上半年發生。同時,命書有云「群比奪財,名利皆虛」,即係所有同錢財有關嘅嘢,都係唔踏實、虛象為主。仲有喺西洋占星盤上都有一個大象為「木星」刑「月」,代表實體經濟處於艱難狀態。如將兩者合併參考,今年股市炒作來去都係喺一啲憧憬同恐慌概念上,唔係炒實質嘅嘢。所以今年股市走勢可謂極之波動,尤其喺上半年,投機會容易損手。至於今年樓市下跌屬有跡可尋,主要係因為股市走資,樓市因而受拖累。

羅大師認為猴年可以用「亂」字去形容,故陸叔勸喻股民保留實力、保持清醒。

陸:聽你咁講,從玄學角度睇,今年最差嘅時間仍未到。你認為今年有咩事件會觸發跌市? 又有咩時間要特別留意去做定部署呢?

羅:我嘅睇法係今年春夏交接,即係新曆五、六月嘅時間,同埋入秋後嘅九月、十月,會出現更明顯嘅震盪。縱合幾個盤嘅睇法,今年因病星及劫財入中宮,會有較強嘅病毒出現,影響人心。另外,今年為火金交戰年,尤其係天干丙火屬陽火,一定涉及戰事,去年令人頭痛嘅極端組織恐襲,今年會變本加厲。至於一直喺中國南方嘅南海爭拗,擦鎗走火嘅機會很大。至於上文提到「比劫分財、名利皆虛」嘅現象,今年貨幣危機會成為投資市場負面發酵嘅主因。講白一啲今年真係咩都亂。有一點大家要知道,表面上二月四日立春後才是猴年,但唔係踏入猴年上述嘅現象先出現,中間有一個交接期,其實喺一五年十月「丙戌」月,火氣已進入,所以猴年嘅現象,早喺上年第四季已經開始。

陸:我喺股海打滾咗咁多年,見過唔少大風浪,每次都係有危先有機,所以奉勸大家保持清醒,又要保留實力,慢慢去揾投資機會。

羅:呢點我都好同意,如果喺呢啲時間見到大調整,不妨分注入市。我嘅睇法係,以香港九七回歸嘅中國八字做本體,格局名為「傷官配印格」,香港五行用神要用金、水,而今年猴年,其實喺踏入金水之地嘅第一年,情況好似○四年一樣,香港開始再行運;問題係今年流年的確有問題令個局食唔起,但經過今年嘅震盪後,明年就會好轉,所以今年可以話當人哋恐懼時,你就可以貪婪少少,用中長線角度去等收成。

陸:用玄學角度可唔可以搵到恒指最低點?或者可唔可以睇到有咩板塊可以買入?

羅:哈哈,以我多年研究術數嘅經驗,其實係無一個準確方法計到高低點嘅,亦無可能單憑五行去決定買咩股票,因為每個股票都有其獨特基本面,只可以從佢嘅基本面出發,反而唔應該用術數去揀個別股。如果就一個整體股市嚟講,我哋可以透過一些星象去捕捉一個轉角位,好似坊間嘅江恩理論,背後就係捉天星嘅韻律喇。不過,我個人認為即使今年未必係好年,但每樣嘢都有佢嘅周期,物極始終必返,今年反而可以為好嘅未來做好準備。當現在天運仍處於 「八運」嘅周期時,只需要捱過唔好嘅一刻,之後仲會有好多機遇。