為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2016 年 01 月 29 日

月底如再無糧出 亞視恐提早收檔

亞洲電視的免費電視牌照進入最後倒數兩個月,最近一再爆出欠薪消息,全體五百名員工到依家仲未收到十二月份糧。其中,新聞部員工忍無可忍,向新老闆司榮彬發出最後通牒,如果今個月底之前仲未出到糧,新聞部將會罷工。由於廣播條例規定,免費電視每日必須提供最少兩節的新聞時段,一旦停播新聞,五十八年歷史的亞視將會提早釘牌。

有亞視新聞部員工表示,十一月已經拖過一次糧,當時好快解決咗。諗唔到十二月又來過,班夥計都好焦急等錢過年關。早前員工代表同新老闆司榮彬見過幾次面,但對方講明唔會再出錢,令班員工好失望。

備受欠薪困擾的亞視,或因新聞部罷工而提前收檔。

「公司資產賣得嘅都賣晒,股東又唔肯出錢,我地唔可能無止境白做。如果一月尾前,仲未收到人工就會罷工,然後申請清盤。」佢話新聞部多數員工讚成這個行動,由於佢地罷工會影響到亞視牌照,相信會得到管理層正視。

亞視前執行董事葉家寶亦踢爆亞視愈來愈難搵廣告,「前年仲有賽馬節目,仍有點廣告。舊年賽馬節目無埋,牌照又就快到期,廣告商唔敢落廣告,去年底收入少咗三分之二。」佢話亞視員工由高峰期的二千人,減至依家五百人,但每個月出糧都要一千萬,計埋燈油火蠟同節目製作費,要幾千萬埋單,無辦法靠廣告收入填氹。

葉家寶(右六)透露,亞視無播賽馬節目後,廣告量大減三分二,收入雪上加霜。

面對亞視呢個無底深潭,曾揚言會攞一百億出來的司榮彬,財力備受考驗,更有報道指原來佢仲未找清畀王征的「尾數」。消息人士透露佢去年六月,淨係畀錢買亞視股份,但亞視欠王征的債,就一直未還。

亞視原定四月一日停播,騰出來嘅頻譜將會由香港電台接管三年。據悉,港台希望四月二日起,將數碼三十一台節目放上免費電視頻道播放。依家數碼三十一台唔係廿四小時播放,所以第日要延長,港台就要搵人合作製作更多節目。

據悉,港台早前招標。標書無規定申請人要有做電視嘅背景,本地或海外公司都無拘,但要有一定電視製作技術,如果中標,仲要畀兩成保證金,比政府一般合約多三倍,以確保中標人財力足夠,聽聞無線都入咗標,最後花落誰家?相信好快揭曉。