為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2016 年 02 月 01 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

施榮懷︰「要摒棄對中國的成見」

施榮懷八十年代出身,當年機會處處,身兼全國政協並兼任多項公職,亦身兼多個港府委員會要員,施強調做公職不是為助生意,是希望可以回饋社會;陸叔今期續與他暢談如何看當今製造業前景,另時下年青人是否需北闖才可找到機會……

陸︰施兄,上次講到你第一間廠係total loss,之後仲有無去其他地方設廠呢?

施︰陸叔,大約喺九七年我哋止蝕離開崇明島之後,就去咗自己故鄉福建起廠,嗰時仲揾埋弟弟親自上去睇住,之後喺湖南湘潭,即係毛澤東故鄉設廠。之後又喺廣東、南海設廠,依家差唔多全部關門,得番一個喺江西。

陸︰建廠唔容易,點解要結束呢啲廠呢?

施︰內地廠嘅經營成本一路膨脹得又貴又高,好難做,人民幣又一路升值,時下大趨勢係要做高增值嘅產業,於是我哋喺○六年開始,已經慢慢退出嚟唔做廠,轉行投資地產,依家三弟基本上係負責內地嘅地產項目。

陸︰咁係咪你覺得製造業呢行無得做落去?

施︰應該咁講,製造業做得辛苦的確係鐵一般嘅事實,我好多朋友嘅第二、三代又未必肯接班,佢哋喺美國、英國、澳州放洋返嚟,除非間廠已經做到上晒軌道,叫佢哋去幫吓手,諗吓新嘢;如果間廠面對好多困難,就算年輕嘅肯幫手諗計救忙,分分鐘係個年長嘅唔想,行業前景我比較睇淡。

陸︰爸爸放手畀你哋幾兄弟負責生意,佢就負責打通關係,咁你同爸爸究竟邊個做公職多啲?

施︰爸爸做內地嘅公職多過我,我真正開始喺香港做公職,要數呢十二、三年左右,喺我入咗廠商會之後,政府加多咗唔同嘅委員會,例如勞顧會、標準工時委員會,我代表廠商會、工商界,事實上我用喺呢兩個會嘅時間相對較多,不過我覺得好有意思又有意義,委員會喺呢幾年有比較多嘅議題,由最低工資、標準工時到輸入勞工等,好多勞工政策都係响勞顧會傾完,再拎去立法會討論。

陸︰咁你覺得政協委員個名幫唔幫到港商?

施︰我覺得廿幾、三十年前做政協委員,可能會幫到啲嘅,依家內地社會咁進步,唔好諗住做過政協委員就可以幫到做生意,中國係希望委員將香港嘅思維帶入去幫佢哋發展。至於喺香港做公職,我亦唔覺得可以幫到做生意,有時付出仲多過收穫,好多時仲要避嫌,喺開會前要申報利益,講清楚會有咩衝突。

施榮懷認為中港交流不足,「年輕人應該先返內地睇吓,唔好固步自封。」

陸︰你年輕嗰時就已經幫屋企打拚,咁你覺得依家嘅年青人又可以有咩抱負?

施︰我認為無需要大學畢業出嚟就一定要創業,你諗吓一百個人創業,後生嘅唔後生嘅都好,當中唔知有無百分之五會成功,有幾多個真係好似嗰班偶像級咁叻咁成功,年青人打工先都好o架,創業唔一定係唯一出路囉。

陸︰好多人都講要北闖,咁你覺得我哋班年青人北闖有無機會呢?

施︰我覺得好多人對內地都有啲誤解,年青人無論打工抑或創業,都應該先返內地睇吓,內地好多嘢有時行得仲快過我哋,所以要從中互相學習交流,大眾創新萬眾創業,千祈唔好固步自封。

陸︰點解會有咁嘅發展吖,係年青人嘅問題、管理嘅問題、抑或係大多數人嘅問題?

施︰我覺得係整體嘅問題,又唔可能淨係年青人嘅,某程度上香港跟內地交流不足,香港嘅發展空間亦有限,所以要出去面向世界,我認為一係大陸,一係同內地企業一齊行出去,襯香港依家仲有競爭優勢,應該要好好把握。

陸︰係咪好多廠商寧請內地人都唔請港人?

施︰呢個又係另一樣誤解,香港係難請人返內地工作o架,好多人聽見返大陸就怕,唔好話工廠,上面房地產項目大部分都要喺內地請人,香港本身勞工短缺,有啲人一聽見廠,就已經以為係陳寶珠年代嘅模式,我哋廠商會已經有組團去睇吓廠,希望引起港人返內地工作嘅興趣,依家生存到又有啲規模嘅廠,普遍已經採用科技及科學化管理,以前我哋最擔心內地人嘅忠誠度,依家睇到佢哋有進步有改變,加上內地人工對比香港仲係平靚正,香港人力資源嘅競爭力真係要急起直追。

陸︰最後有無咩你想同年青人分享呢?

施︰從一九四九年立國到依家,話佢有唔完善之處咁一定有,畢竟中國地方人口大我哋咁多,最緊要係內地已經肯改變態度,依家推出嚟嘅政策又行啱方向。我睇翻今日見到嘅北韓同我三十年前去嘅北韓分別唔大,但大陸嘅發展就已經翻天覆地,我認為做人做事都應該睇長線唔好咁短視,要識得放低歧見,社會上大家加強溝通,我好鼓勵同支持身邊年青嘅朋友,多啲出去睇吓外面嘅世界,有時錯過咗機會就無o架喇,二千年熱爆香港嘅.com科網熱,依家都無人提起啦,機會係要自己去搵嘅。

權八居酒屋
地址:銅鑼灣希慎道33號利園商場一期4樓
電話:2787 3688