為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2016 年 01 月 26 日

關慧玲

《東周刊》社長兼總編輯。

天氣凍唔返學惹激辯

五十九年一遇嘅超級嚴寒,真係從未如此凍過,搞到香港家長踢晒腳,早兩日部分家長已經問學校會否考慮唔返學,誰知教育局最終決定周一停課,反引來家長之間激辯。

有沒有一個科學理據支持咩溫度適宜返學定唔返學,坦白講真係無。不過筆者唔少家有幼兒嘅朋友,就十分肉緊,認為天氣低見一度,幾歲小兒會頂唔順,又擔心自行決定唔返學嘅後果。

有家住深井嘅朋友給筆者SENT來短片,話該區大風到連成年人也企唔穩,要扮蟹咁行,試問小朋友如何抵擋得住?加埋路面結冰,仆倒受傷機會很大。仲有香港室內沒有暖氣,小朋友聚在一起易惹流感。

那自行停課又得唔得?家長又擔心引起混亂,學校和家長之間唔協調,學校無教育局開綠燈,當然不鼓勵學生停課。

不過,贊成應該返學嘅家長,就覺得小孩不是豆腐做的,因為低溫而停課有些無稽,咁日後究竟幾多度至應該停課?太熱是否也是停課理由?日本冰天雪地,小孩一樣穿裋裙出街仲掟埋雪球,中大校長沈祖堯也開腔,話自己當年在加拿大讀書,零下三十七度都要上課。

日本小孩,冰雪中上學去。

其實人體適應環境能力好強,只要天氣不是一下子急降,基本上都可以適應到,只係香港家長特別緊張。這一代小孩真箇溫室成長,太凍太熱唔得,唔係食物敏感就是氣管敏感,唔知係咪接觸大自然太少,抵抗力弱。不過,家長緊張自己仔女,你能怪他們嗎?

教育局老友就話,佢哋考慮過各種理由,見周日又落雨又大風,加上到處路面都結冰,的確明白父母擔憂;而天台文預測周一跟周日差不多,佢哋至決定停課,之前佢哋問過唔少小學校長,都贊同呢個決定,「星期一氣溫同星期日差不多,點知星期一會出太陽?如果環境同星期日一樣咁惡劣,大家觀感可能又會唔同。」

不過教育局亦要有心理準備,以後天氣一反常,就會有人嗌停課,教育局就要拆彈,否則好似畀人太隨意停課嘅感覺。

既然香港有機會咁凍,日後就應做好準備,例如行山嘅人,就咁著對波鞋就上山,肯定唔得,鞋子至少配有抓實地面嘅冰爪至得,消防和救護隊員都應及早配置冰雪拯救裝備,唔使同被救嘅人一樣,跣到一仆一碌。