境隨心轉 江美儀
江美儀說，她是一個農夫，除了基於愛食飯，也基於自己天生一副賤骨頭。
「我唔係少奶奶命，我真係要耕田，要自給自足o架！哈哈哈！」
所以，去年二月，她拍完劇集《性在有情》後，因為無綫再沒有給她安排新工作，曾令她感到相當不安。「即係嗰種：咦？我明明係忙到甩晒轆o架，點解我突然間咁得閒嘅？好唔慣囉！」說時她皺皺眉頭。
沒有劇集在身，她形容這年來，她都很「清閒」，「拍咗幾套電影、去過馬來西亞拍《姊妹淘》、連我最恨拍嘅ICAC（港台劇集《廉政行動2016》）都拍過，又做咗幾個廣告代言，又去過日本兩次、去過北京好多次，仲去過巴黎；又跟豹嫂（胡蓓蔚）個健身教練做運動，跟住就開始排呢套舞台劇《羅生門》囉。」她邊說邊數着手指。
最重要是，無綫這年來仍有出糧給她。「The main point is佢哋嘅人工好低o架咋！哈哈哈！不過好彩我都有幾個廣告，頂住個雞頭！哈哈！」
老老實實，又不是完全沒有工開，又未致於影響收入，那還有甚麼好不安呢？
「都係o架！好多嘢只係一念之差！我可以覺得咁樣嘅一年幾好呀，有得休息吓；亦都可以覺得，係咪冇人用我呢？但我後尾都諗通咗，唔使做嘢，我白逗緊人工o架喎！係咪先？所以個人開心唔開心，都係由自己決定囉！睇你自己心態係點咋嘛。」說罷，她又哈哈大笑起來。
大情大性得佢呢。
徬徨感
差不多整整一年沒有劇拍，江美儀說，也不知這樣是否叫做「遭雪藏」。
「我都唔知喎，不過就算我係『急凍奇俠』，咁個雪櫃裏面都仲有好多人，I'm not alone！哈哈哈！
「我o依家唔夠膽再同外面講，公司（無綫）將會有啲乜嘢畀我做o架嘞！你睇番啲報道就知，上年我同人講完會開乜嘢劇之後，臨門埋牙先嚟冇我份，但又唔會特別通知我喎，我驚啲人以為我吹水咋，我不嬲都唔係啲造新聞、博見報嘅人呀！」
她坦言，曾因此鑽了牛角尖。「最慘係，佢哋唔係逐少逐少咁減你工作量，而係sharp cut！跟住我就會係咁諗：點解啲人唔搵我呢？點解會冇嘢開嘅呢？我嗰種驚，係因為覺得突然乜嘢都冇晒，個心好耿耿於懷。」
最難頂是，她○七年離開亞視後的那種徬徨感，也一下子湧了出來。「亞視嗰陣本來傾好晒續約嘅條件，點知星期五滿約，星期三先打嚟話所有嘢要由頭傾過，咁即係想點呢？我男朋友（吳君祥）話：『如果你唔簽，你會好嬲；但照簽，你會仲嬲！』咁我就冇簽約，走咗。嗰陣我真係覺得自己好似被遺棄咗咁，我坐過喺屋企，嗰種不安呀、冇安全感呀，真係好難受o架！」
參與舞台劇《羅生門》演出，一人分飾五個角色，跟麥長青和單立文在台上鬥戲。「我想體驗吓舞台劇係點嘅一回事，呢齣劇正正就畀到我要嘅嘢！」
