為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2016 年 02 月 01 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

惡人啟示錄

「惡人」一般都係具貶義嘅名詞,但係落喺我欣賞嘅導演谷德昭手上,就成為喜感十足嘅電影《惡人谷》,仲搶閘喺農曆新年前,以笑聲向影迷拜個早年,化解戾氣。

今晚我就邀請阿谷,聯同戲中有突破演出嘅Babyjohn(蔡瀚億)同安安姐余安安,一齊去到位於尖沙咀嘅「巴馬養生蒸氣火鍋」,喺嚴寒之下食得健康,再暢談「惡人」帶畀佢哋嘅啟示。

今晚我帶阿谷、Babyjohn同安安姐(左至右)去到位於尖沙咀嘅「巴馬養生蒸氣火鍋」,喺嚴寒之下食得健康,暖笠笠講新戲《惡人谷》。

電影集鎮宇(左一)、Ronald(右二)同造型突出嘅安安姐(右一),大放笑彈。

喜感新角度

今次電影包攬吳鎮宇同鄭中基兩大實力保證,喺阿谷嘅導演筒下,兩位男主角落力搞笑係意料中事,我反而想知道導演以「惡人」為主角嘅構思,究竟從何而來?「我睇到好多受歡迎嘅鬼佬劇,好似《House of Cards》(紙牌屋)同《Breaking Bad》(絕命毒師)嗰啲咁,都係用惡人、衰人做主角,仲要寫到佢哋好好咁,你睇Kevin Spacey隊冧咁多人都係迫不得已嗰隻。我就覺得美國佬buy嘅嘢,喺呢度都會work,於是就諗咗呢個古仔。

「鎮宇喺戲入面係壞人扮好人,利用人嘅同情心去賺錢;Ronald就好人扮壞人,佢村長嚟吖嘛,但係內心就善良嘅。Babyjohn就飾演鎮宇嘅手下,我睇《狂舞派》嘅時候,就覺得佢有啲嘢,係懂戲嘅人,今次合作完就證明我冇睇錯!

「安安就飾演Ronald嘅後母,重點喺佢個造型上面,即係平時佢畀人一種好靚、好時尚嘅感覺,喺戲入面佢就好娘好where,有呢個反差就更加帶出喜劇感,講句『X街仔!』(戲中對白)都投入啲。」

安安姐即時回應:「我等咗一個肯整where我嘅導演好耐嘞!今次係我入行以嚟第一次演呢種瘋狂喜劇,我好欣賞阿谷keep住拍攝現場嘅氣氛,全部人都好開心去拍。我覺得喜劇係好難拍,要令觀眾笑係一門好高深嘅學問,佢真係做得到。」

花膠蟲草花冬瓜雞煲($198)嘅湯底以老雞熬煮,味道香濃。

蒸鍋嘅粥底係南瓜排骨($68),經過蒸煮唔同食材後,粥底吸收所有精華,夠晒鮮甜。

將蟶子皇($68/隻)放喺蒸鍋內,蒸煮兩分鐘,鮮味!

16新搞作

Babyjohn贊同安安姐嘅講法,仲話今次嘅拍攝令佢獲益良多。「一五年我拍咗幾部比較嚴肅嘅戲,一時間都幾難抽離,導演就喺嗰段時間搵我拍呢部戲,我諗都冇諗就應承嘞!我喺戲入面同鎮宇哥最多對手戲,通常我會喺片場觀察佢做啲咩,從中偷師。不過佢好好,有時會提點吓我點做,所以真係學到唔少嘢。」

一六年剛剛開始,幾位嘉賓都有新一年嘅大計,Babyjohn年初四就要投入新片嘅拍攝:「係一部關於殭屍嘅新戲,我會同小豪哥合作,呢部戲係由夏雨叔監製。八十年代有好多類似題材嘅戲,近年已經好少,所以我都好期待。」

即將榮升外母嘅安安姐,今年就相當忙碌。「年初我會先去外地,為之前喺香港開嘅演唱會做巡迴演出,之後就要為舞台劇《最後作孽》嘅重演做準備。完成呢啲工作之後,我就要全心投入我個女嘅婚禮,其實o依家都有做啲準備,陪佢揀婚紗、揀場地同scan guest list⋯⋯

「我已經係比較西化,連過大禮我都skip,只係飲杯茶就算。估唔到仲有咁多嘢要搞,但係都係好開心嘅。」

Babyjohn喺戲中有一幕要掌摑鎮宇,阿谷笑稱:「我專登安排呢場戲喺最後一日先拍,費事佢哋拍完反面。」

講到一六年大計,三位嘉賓都滿肚密圈,藉飯敍即席交流,交換意見。

日本飛騨牛肩頸($328/大),以蒸煮方式更能提升牛肉鮮味,令一眾嘉賓大讚!

龍躉($218/碟),魚肉鮮甜且膠質豐富。

自家製法國鵝肝蝦丸($108),爽口彈牙。

健康減磅法

阿谷都有新搞作,見到佢o依家fit咗嘅身形,就知同幕前工作有關。「今年我計劃拍一個《食神》嘅延續篇,係同唐牛有關嘅故事;我覺得做埋幕前係好事嚟o架,喺國內跑戲院(謝票),啲演員啲期難度,我都可以自己跑吖嘛!」

講到減磅,阿谷就話:「我係搵營養師,加埋做運動去減,三年減五十磅已經好溫和。但係我冇跟足營養師畀我嘅餐單,只係調整自己嘅mode,好似我由細到大都鍾意撈汁食飯,仲食成三碗咁多,o依家我完全唔食汁,唔係我強迫自己唔食,係慢慢嚟嘅;做運動都係,我唔打波就跑步,一樣係自願性質。我見好多人係迫自己唔食嘢、做運動,咁嘅做法係唔長久嘅。」

安安姐大女喺上周訂婚,佢亦投入準備婚禮。

元貝($88/隻)加上金菇底,特別清甜。

火鍋同配料之外,小食大日醉鴨舌($58)都係水準之作。

另一小食老友鬼鬼($58),以手打蝦膠釀入油炸鬼,一口嘗盡兩種口感。

巴馬養生蒸氣火鍋
地址:尖沙咀金巴利道77號東南大廈1樓
電話:27391636

下期預告

帶梁柏堅、林熹瞳及艾威品嘗特色日本料理。