為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2016 年 01 月 17 日

徐榮萌B搶救《愛•回家》收視

無綫處境劇《愛•回家》自從換咗新班底後,無論收視同口碑都一落千丈,近排大家都應該發現,「馬家」終於返嚟喇!

除咗又係大家見慣見熟嘅幾位馬家成員之外,唔講大家聽可能唔知道,馬家加入嘅新成員,劇中飾演「馬子仁」羅天宇嘅初生女兒,戲入面叫「馬家好」,佢嘅真正身份係「馬強」徐榮嘅三個月大細女徐心怡。

早幾日,劇情講到啱啱出世嘅「馬家好」返屋企,一家人上下齊心照顧小B女。東姑就發現徐榮太太喺微博發貼,見到徐榮抱住心怡BB企喺電視機前,欣賞自己嘅演出,唔知佢滿唔滿意自己出鏡時嘅表現呢?

幾個月人仔就做咗小明星,心怡BB叻過老竇多多聲,而且見佢個樣肥肥白白、眼仔碌碌咁可愛,唔只觀眾鍾意佢,萌到連同劇啲哥哥、姐姐、叔叔、嬸嬸都輪流呵護住佢,成日攬住佢又抱又錫,真係當正佢小公主咁o架!

上個禮拜劇情講到心怡BB飾演嘅「馬家好」返屋企喇,見佢第一次出鏡都好淡定喎!

徐榮抱住囡囡企喺電視機前,畀心怡BB睇番自己嘅出鏡表現,唔知佢認唔認得自己呢?

徐榮一家四口,大仔八歲,o依家再添位千金,終於湊夠個「好」字。