要形容今次「Paco巨星飯堂」嘅嘉賓陣容，就老土啲都要講一句：「人生有幾多個十年？」

因為方力申（小方）、Stephy（鄧麗欣）同導演葉念琛呢個組合，係由○五年電影《獨家試愛》開始合作，成為日後「愛的三部曲」嘅首部曲。事隔十年，呢個組合四度合作，而作品《紀念日》亦將於黃金聖誕檔期面世，夠晒意思！

我帶三位同「新血」恭碩良（Jun）、盛朗熙（Joy），去到位於觀塘如心酒店嘅「Forte」，率先以聖誕盛宴，慶祝呢個特別有紀念價值嘅moment！

我帶Jun、Joy、導演、Stephy同小方（左至右）去到位於觀塘嘅「Forte」，歎住聖誕大餐講《紀念日》。

同步成長

一坐低，小方已經話：「好多人話我哋呢個組合係『鐵三角』，我就覺得係『Big Four』，因為冇咗Paco係唔成事嘅，亦都好有紀念性。十年可以有好多變化，喺為部戲宣傳嘅時候，通常演員都會話已經做好成件事，票房、口碑都係能力範圍控制以外嘅事，但係我今次係好希望部戲收得，同埋得到觀眾嘅認同o架！」

哈哈哈！二○一五年對我嚟講一樣咁有impact，年中先有另一部十年再遇嘅《殺破狼2》，o依家再嚟一部咁有代表性嘅延續篇，仲係愛情電影，真係好難得。

Stephy立即表示：「最難得同最特別嘅，係好多觀眾同我哋一齊成長，同我同小方喺戲入面一樣，由拍住拖睇第一集，到十年後嘅今日，已經結咗婚（方：「仲有埋小朋友添。」）。」

另一位關鍵人物就梗係導演啦！佢話：「由十年前嘅《獨家試愛》、○七年嘅《十分愛》同○八年嘅《我的最愛》，由小方同Stephy演繹嘅三部曲，喺觀眾嘅心目中都有一定地位，所以今次嘅延續，要有好好嘅timing先可以成事，十周年就係一個perfect timing。今年我做咗好多唔同嘅作品，而呢部係我電影生涯入面好重要嘅一部，我希望睇嘅人對男女關係會有更深層嘅體會。」

莫講話十年，就算八年前《十分愛》嘅「巨星飯堂」，小方（左一）、Stephy（左二》同導演（右一）都截然不同啦！

今晚我哋品嘗嘅聖誕盛宴屬於度身訂造餐單，詳情及價格可致電餐廳查詢。前菜係牛油汁焗昆士蘭帶子，鮮味無窮。

海龍皇湯係以原條鮮魚仔加上蔬菜煮製湯底，再加上鮮蝦同鮮忌廉，又香又鮮甜。

蜂蜜欖菜烤骨以自家製蜂蜜欖菜醬汁煎焗排骨，外脆內軟。

假戲真做

睇咗預告片，我相信最令人留下深刻印象嘅，一定係小方同Stephy一幕激烈嘅嗌交戲，小方一句：「好難頂！」真係講中唔少男士嘅心聲。

小方先冧笑，再輕輕搭住Stephy香肩回應：「咁現實生活中就梗係唔難頂啦，佢好好嘅！（Stephy：「明明今日唔係咁講o架！」）我飲咗兩杯酒後吐真言吖嘛！

「嗰場戲淨係對白都有成三、四頁紙，雖然內容唔係喺真實生活中發生，但係因為對手係Stephy，所以好容易會代入，有啲反應係好自然咁做出嚟。劇本寫我喺嗰場戲係憤怒，但係我演嘅時候係感觸到流眼淚嘅。（Stephy：「動咗真感情囉。」）所以方力申平時演戲係演人哋，但今次就演番自己。」

令到戲中一對結婚十年嘅年輕夫婦大動肝火嘅，係新加入團隊嘅Joy同Jun。導演話：「喺我為兩個主角搵仰慕者嘅時候，佢哋都有開出『擇偶條件』，但係兩個完全相反嘅：Stephy就話要個成熟啲嘅，小方就話要個後生嘅，所以就搵咗Joy同Jun嘞。」

飯敍期間，小方同Stephy不時耍花槍，好有氣氛！

小方（右一）稱我哋為「Big Four」，我大表贊同，今時今日我仍可以監製一部愛情電影，都係難得嘅事！

Jun同Joy嘅新角色，喺戲中會令小方、Stephy嘅十年婚姻泛起漣漪。

日日萬歲

工作時認真，導演仲有一個特別方法凝聚團隊精神，就係「萬歲」（請全劇組食嘢），小方話：「晚晚都有，而且仲係晚晚唔同，連下午茶都照顧埋，有菠蘿包同蛋撻。」

Stephy即刻補充：「最誇張一次係我哋喺跑馬地開工，個『萬歲』係大角咀嘅油渣麵。」

Joy係另一位受惠者：「我好鍾意食嘢，『萬歲』係同大家一齊食，令我更加relax，拍得好開心！」

一講到食，現場氣氛更加熾熱，Jun講到佢婆婆煮嘅咖喱雞。「我成日會問啲新相識嘅朋友，假如要你帶一樣食品去荒島住一世，你會帶咩？我咁耐以嚟都會同佢哋分享，我只要帶婆婆煮嘅咖哩雞就得，因為佢會用葡國材料，再用中式煮法去煮，出嚟嘅效果有啲似葡國雞，但係又香又辣嘅，喺第二度一定食唔到！」

餐間嘅香芒熱情果雪葩，令味蕾更refeshing。

主菜係芝士焗龍蝦伴牛柳（上圖）同清蒸海上鮮（下圖），中西兼備。

星洲海南雞飯係餐廳嘅招牌菜式，不得不試！

甜品係香軟荔茸焦糖布甸、杏仁糖芭菲同咖啡慕絲，愛甜品嘅Stephy大讚前者。

餐廳以外，酒店另設宴會廳「élan 220」，啱晒開party！

Forte
地址：觀塘創業街38號如心艾朗酒店2樓
電話：3968 8222

下期預告

帶白只及泰臣品嘗特色私房菜。