為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2015 年 12 月 06 日

關家姐咩事? 關心妍

關家姐關心妍邊跟我形容她最肥時的模樣,邊用手機search自己的舊照片,

再邊看邊笑着呼喊。「嘩!你睇、你睇,嗰塊面幾咁包,哈哈哈!」、

「嘩!你睇吓,嗰碌手臂!真係不得了呀,哈哈哈!」、

「嘩!呢幅都唔弱,肥到呢……真係極品呀!哈哈哈!」

那種hyper程度,的確令我有點意料之外。畢竟她的樣子、外貌和形象,

一直以來都是斯斯文文,彷彿跟她說話大聲一點,都會很易把她嚇死似的啊;

然而,眼前的她,一開口說話又快又急,巴啦巴啦巴啦一輪之後,接着總是一連串笑聲。

「好多人都以為我好公主、唔掂得、唔笑,可能因為我一直都係唱情歌、慘歌啦,

咁我喺台度唱呢啲歌,冇可能四萬咁嘅口唱o架嘛;跟住啲MV呢,我唔係勁慘咁嘅樣,就係冇表情,搞吓搞吓啲人咪以為我好cool,平時唔講嘢囉。

「其實我十歲就去咗加拿大,嗰邊讀書嘅環境好carefree、無王管,

我嗰陣食煙、飲酒、講粗口都試過,好彩係冇吸毒啫!咁你諗吓我喺咁嘅環境長大,有幾斯文啫?如果得嘅話,我同你講到聽朝都得呀!哈哈哈!」

都話睇人唔好睇外表咯。

關家姐

因為十年前一篇由女網民所寫的文章,關心妍從此變成了「關家姐」。那篇文章大意是咁的:話說關心妍有日到太古廣場(PP)一家名店黑面掃貨,要求封舖招待,表現挑剔,翌日該網民的家姐因遭關小姐投訴被炒了魷魚。

事隔十年,關家姐估不到仍有記者就此事向她求證,她把心一橫便索性整了首〈關家姐〉出來,將自己唱飽佢。

初初睇到呢篇文,嬲o架!我嗰陣都有出嚟解釋過,但冇證冇據,講乜都冇用。到第二年,我已經覺得是但啦,反正之後好快冇人會記得o架啦,點知啲人一記就記足十年!然後仲有張敬軒同何韻詩版本,又畀人改到有英文、法文、泰文、小學雞版、漫畫版同lego版,哈哈哈!我諗遲啲應該會拍埋電影囉!

呢件事嘅好處係,o依家啲人會記得我叫關家姐,多過關心妍,好多中、小學生都係因為呢個名而識我。有時我去學校同啲年青人做分享,我每次一講「關家姐」三個字,佢哋就會笑,好似將我帶咗去佢哋個層面咁。

對我嚟講,呢件事可以話係由一個咒詛變成一個祝福,不過,自己當然要捱得過畀人誣衊咗十年先得囉!始終呢件事係傷害到我嘅人格,有好多未接觸過我嘅人,都會因為咁對我有bias、印象好negative,咁對我好唔fair囉!如果我真係封人舖、成日黑人面嘅,我理得你哋點講我十年啫,但我的而且確唔係咁呀嘛!

一篇網絡文章,一傳十年,令關心妍變關家姐。「出咗首〈關家姐〉之後,有好多人先知,其實我並唔係嗰篇文裏面嘅『關家姐』囉。」(網絡圖片)