為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 娛樂一針 2015 年 11 月 24 日

黃庭桄

《東周網》總編輯、《東周刊》副社長、兼星島新聞集團娛樂、名人、副刊總監。傳記著作有陳方安生《盡付笑談中》、鍾鎮濤《麥當勞道》、沙士紀實《香港還有英雄》和慈善義賣的《一念天堂》、《Cash Happy Book》,哲理著作有《人生何處不Laughing》、《一百個人的遺憾故事》、《眾善孝為先》、《娛樂一針》、《Fly Me To The Moon》、《送你一對翅膀》、《潮爆神獸卡》、《曾付出幾多心跳》、《終於在眼淚中明白》等。

跌咗一百萬

如果,一百萬元白白從自己手指隙溜走,會有甚麼感受?揼心?激氣?呻到樹葉都落?借酒澆愁?咆哮大叫「點解呀」?

不過,對平日返大陸睇風水,閒閒哋收一百幾十萬的麥玲玲來說,簡直濕濕碎。

上星期TVB台慶大日子,在一百萬元大抽獎環節中,麥玲玲被抽中成為入圍五強之一,誰知她早走,司儀惟有補抽另一位幸運兒于淼,最後于淼更冷手執個熱煎堆,獨得總值一百萬元的獎金和獎品。

時也命也運也!到底那一晚,有甚麼事令到麥玲玲早走,讓一百萬元擦身而過?

「嗰晚我要做一個商台節目的錄音,一來答應咗,唔可以推;二來我之前跳舞表演,要戴紅色假髮,預計個髮型會扁晒,又要換衫,所以有點複雜。」

麥玲玲說,她一早已告訴導演:「我會早走,你千祈唔好將我個名放入抽獎箱度,如果抽中咗,我又唔喺現場,就會尷尬。」

問心嗰句,你有冇揼心先?

「唔會喎!其實我本身無抽獎命,好日都唔會抽中,即使去annual dinner,一枱的枱獎有七、八份禮物,我都係唔會中嘅!」

再講真嗰句,你有冇激氣先?

「冇!冇!對我嚟講,我攞唔攞嗰一百萬,冇乜所謂,但對藝員嚟講,攞到又真係會開心好多。于淼來咗香港發展都有兩、三年,事業上啱啱起步,今次中獎對佢係一個好大的鼓勵;同埋凡是攞到台慶大獎的藝員都好好運,嚟緊都會大紅大紫。」

話時話,咁你有冇唔忿氣先?

「點會呀?如果我中咗,我一定會使凸。如果係獎金的話,我一定會捐畀慈善機構,因為我真係冇呢個需要;至於獎品呢,我就一定派通街,跟住就會請晒識嘅人,去食餐飯高興吓,其實到頭來係需要倒貼,哈哈!」

好啦好啦!不如轉個話題吖!咁你其實有冇覺得唔抵呢?

「你係咪玩嘢呀!」麥玲玲無我咁好氣說。

台慶晚上,玲玲師傅(上圖前左)表演完熱舞即閃,抽到大獎也跌番出嚟,益了「執二攤」的于淼(下圖中)。