安志杰（Andy）跟「警鐘胸」女友Jessica C.（JC）拍拖不到一年因搞出人命，即於上月急急腳到馬爾代夫搞場求婚大龍鳳，公告天下。

由於二人鬼仔鬼妹性格，向來餐搵餐食餐餐清，但現在突然有B，稍後還要在美國和香港擺酒，使費計落已一大籮。近月二人趁有喜，人氣升，分別加價五倍及三倍接騷吸奶粉錢，惜反應一般，日前他倆外出選購結婚戒指時，為錢煩的安志杰，頻頻搲爆頭。

安志杰上月跟大肚Jessica C.求婚，日前他們到中環名店挑選婚戒，但未見有斬獲。

安志杰在名店內瞻天望地，睇見價錢更不停抓頭，毫無心情揀戒指。

齋睇唔買

安志杰跟JC未婚有B，由於已見晒肚，男方爽快求婚認頭。表面溫馨無憂的二人，雖然各自有拍戲有出騷齊齊搵錢，但始終是鬼仔鬼妹個性，平時想買就買，想食就食，積蓄不多。據知JC曾向閨中密友透露︰「我都大使，估唔到Andy仲大使過我。」不過愛得死心塌地的她，無限包容，有錢兩份使，結果月月清袋。

日前二人到中環名店揀婚戒，只見陀住近六個月肚的JC，滿心雀躍地在櫥櫃精挑細選，但心不在焉的安志杰，卻不時瞻天望地又搲頭，雖然JC睇中心頭好，惜他反應冷淡，留足廿分鐘冇斬獲。JC一臉悶悶不樂，安志杰隨即拖未婚妻歎下午茶，易o氹的JC其後又冧番晒。

早前二人情侶檔出活動，當時JC己有五個月身孕。

最後他們到四季酒店食下午茶，JC離開時笑番晒。

有價冇市

事隔一日，安志杰改在助手陪同下到超巿掃貨，不過他心情麻麻，未畀錢便心急拎啤酒狂隊，離開時沿途仍繼續飲，似乎飽受不少壓力。

近日趁陀B人氣盛，可招徠更多記者採訪，不惜大幅度加價接騷，安志杰由原先兩萬多增至十萬一場，而JC亦由萬多元加到三萬多，但有價冇巿。而JC剛於上周完成產前最後一次行騷，便會停工安胎，她謂︰「現在容易累和易肚餓，有藉口讓Andy幫我做事，佢係我嘅King。」至於孭起成頭家的安志杰，也自言要減少推戲，「我現在要努力賺奶粉錢，以前推好多戲，現在唔會咁挑剔。」不過他自今年八月拍畢電影《潛龍狙擊》後，未見有新工作，仔細老婆嫩，稍後還要擺酒，真是要加快搵工開。