為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2015 年 11 月 23 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

麥玲玲:「不怕蝕底 趁勢上位」

陸叔今次請來玄學家麥玲玲暢談其入行經歷,當年因為一個廣播節目而接觸玄學,抱著不怕蝕底珍惜每個機會的心態,終在男士為主導的行業中,成功打出屬於自己的一片天!

陸:玲玲,你幾時真正對玄學有感覺?

麥:陸叔,媽媽以前好鍾意搵人算命、睇風水甚至問米,我嗰時好想知佢點解要遵守咁多習俗,直至有個阿姑上門睇家宅,話我媽媽要過到四十一歲嘅大關,先會有七十多歲命。點知一年後我媽媽四十出頭時,因為一場大病就離開咗。我開始諗人嘅命運係咪早已有安排,抑或只係阿姑巧合開口中。

陸:你幾多歲拜師學藝?

麥:剛讀中學,媽媽患上當時罕見嘅脷癌,令我開始有興趣探討玄學。那時一路有收聽林真師傅嘅節目,咁啱佢公開招生,咪立刻去報名囉。

陸:幾時正式入行?

麥:做林真師傅學生時,佢已經當我係助手,成日帶我周圍去見識。當年唔收錢我都爭住同人算命,因為睇得多自然有進步,有天份都需要勤力練習o架。不過畢業後我去咗律師樓度做文職,嗰時律師樓嘅客大多係同離婚或官非拉上關係,慢慢就儲落咗一堆客。

九六年左右,睇到地產業蓬勃,律師樓生意又開始委縮,見市場上算命的需求真係好大,就索性轉做全職。嗰時我仲有個願望,係希望可以上到電視節目講新年十二生肖運程。

陸:你點喺男士主導嘅玄學市場突圍而出?

麥:一開始我就定位去幫女士睇姻緣,希望做到「要睇同感情有關嘅就搵麥玲玲」。我係女人,會易啲同女士客戶溝通,又易啲捉佢哋心理,到深入輔導,容易產生共嗚,所以當時睇相算命嘅客八、九成係女士。

陸:咁又點解女士客人會較多?

麥:女士比較關心桃花同姻緣運,冇飯開唔重要﹐最緊要有拖拍,哈哈。

玄學家麥玲玲跟陸叔暢談入行經歷,當中成功的秘訣是爭取每個機會。

爭取每個機會

陸:你幾時上第一個電視節目?

麥:第一次係二千年,上林敏聰同達哥主持的有線節目。嗰時冇咩名氣,nothing to lose就一口應承。喺現場我仲請陳伶俐(阿聰前妻)幫口要阿聰手下留情唔好玩我。當時我被安排企上手推車出場,佢哋推我出嚟時話:「嘩!師父你咁重,屬咩生肖o架!」,我無嬲仲咪咪笑,阿聰知道我玩得又反應快,自此就多咗合作。到o依家只要有時間,我都好積極參與唔同嘅媒體節目。

陸:你幾時做到十二生肖運程節目主持?

麥:當年大眾媒體好流行無論發生好嘢唔好嘢,都去問玄學家意見,答得多就累積咗知名度。到○一年終於可以上節目,主持十二生肖運程,願望成真好開心,跟住訪問亦慢慢多埋添。

陸:你覺得自己係靠咩上位成功呢?

麥:我覺得唔好怕蝕底,人哋比機會你就盡量做,大家互相幫助,有咩嘢就好自然諗起你。

陸:好似我九十年代開始喺大眾媒體出現,啲人見得你多,好自然對你有較深印象。如果你態度誠懇,觀眾就自然會支持你。

麥:所以你咁有觀眾緣囉。我認為行內有好多叻人,只不過要將複雜嘅玄學簡單化,表達力有可能影響到觀眾緣,好彩呢方面我無問題。

陸:你哋一班玄學家平時有無見吓面?行內出名嘅玄學家,係咪十隻手指都數得哂?

麥:以前有位德高望重嘅前輩,叫過我哋搞行內飯局,我當然無問題啦,但其他人就唔知喇……

陸:咁你哋又唔似我哋有行內專業協會。經濟同市道不景氣,對玄學呢行有無影響?

麥:有o架,人喺十字路口嘅時候,會好想知點去部署同做決擇,特別想睇相算命。中國人有句說話:「窮睇相富燒香」,過往每個年代都有唔同困難和問題,九七以前會問移民問題,九七年之後會問磚頭投資前景,到二千年科網爆破又會想問點翻身。

陸:你覺得啲客係咪誠實講出真相細節呢?

麥:佢哋見我哋就好似去見律師同醫生,要老實,唔可以呃我哋。通常我會建議客人先睇命中幾件大事,對一對資料再講問題。我就好似醫生,經常徘徊生死離合之間,客又鍾意重覆問問題,所以對人生嘅無常要睇得通透,情緒絕唔可以受客人影響,不過我喺「要有耐性」呢樣仲未做到最好,哈哈。

陸:我哋講股票好注重基本因素同分析,散戶投資者簡單啲,好多時只想知買同沽邊隻。

陸:講吓你點打入內地市場?

麥:○二年左右,鳳凰衛視訪問我,為世界盃算賽果。咁啱有個溫州觀眾搵我算命,但我國語老師話溫州有好多騙子,我就是但開個價,對方唔講價我仲驚。直至身為溫州政協曹眾幫我索料確有此人,仲係從事國企,先夠膽飛過去,由嗰時開始就見識到內地商機無限。(待續)