為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2009 年 12 月 22 日

一顆恨嫁的心……至奇 楊思琦

女人三十歲前要結婚、和男朋友拍了七年拖是時候結婚、有仔要趁嫩生……都是來自阿媽、親戚、甚至娛樂記者口中和筆下的神話。

過了三十歲的楊思琦,和李泳豪拍了七年拖,近來很多人着她趁早拉埋天窗。

「未入行前就諗三十歲前結婚,原來入到呢行自己好多都控制唔到,想計劃都未必輪到你計劃!唔好話出年,下個月想做啲乜嘢,或者嚟緊四五日想做啲乜嘢,你諗定咗,好快都會變,突然間都會話唔得嘅!變咗都唔敢去諗!依家呢幾年集中努力工作,其他都唔會再諗。」

這個答案格式,和數月前佘詩曼答過我的不相上下。我懷疑無綫電視翡翠台內有隊「政治化妝師」,擬定藝人對傳媒提問的標準答案。

成為藝人後的楊思琦,人生標準過你和我。第一份工作便是當藝人,入行短時間便遇上至愛,事業發展平步青雲,自然身邊會出現一棚人催婚。

思琦妹現在的狀況是,皇帝唔急太監急。何況,我不太相信會有個類似張茆的物體,在李泳豪面前出現兼向他發出正面攻擊。

賭幾大都得。

家庭計劃

思琦妹還很純,多年來已有不少同事跟我說,娛樂圈不應有像思琦妹這種性格的人存在。訪問當天,思琦妹因為交通問題遲到半小時,即露出一個像是小朋友做錯事向老師道歉的悔疚表情,拍照時她又像少女般蹦蹦跳,笑聲天真爛漫。一位小妹妹,又怎會有組織家庭的計劃?

「都冇諗呀,都好難想得這麼理想,到適當時候會好自然行嗰一步,所以依家都未必需要花咁多時間去諗住。」

反而有生兒育女的計劃。

「都想(生小朋友)o架,最低限度唔好變高齡產婦囉,唯一就係咁,不過依家唔會生住。」

娛樂圈很殘酷,很喜歡拿男女家底來比較,人辦之一是張繼聰和謝安琪,李泳豪和思琦妹亦不能幸免。

「(同泳豪)冇乜風浪,都係外面人寫嘅評論,冇乜特別影響嘅,唔會因為人哋講嗰啲字眼而影響到。泳豪爹哋媽咪對我好好,好OK。

「依家要為自己屋企人打拼吓呀,要搵多啲錢,提供好嘅生活畀佢哋!佢哋辛苦咗咁多年養育我、照顧我,都要幫佢哋諗吓。」

留意不留意

可能就是這麼純,思琦妹至今好像沒甚麼話題性的娛樂雜誌封面新聞。

「我唔係話咁多好大字標題嗰啲封面,與其係啲唔好嘅新聞,不如唔好報道咁多,呢幾年集中做劇集,平時有睇嘅都留意到我啦,唔使睇唔知係咪真嘅雜誌揣測創作!

「可能呢個圈裏面就係要嗰啲新聞,反而正正常常好正經,或者你講嘢好平鋪直敘,就冇乜特別吸引人,就唔會去寫。好似要先聲奪人咁,我就唔係咁屬於嗰啲人。我會做好自己先,是非、緋聞、不和,就唔理,擺埋一邊!」

話雖如此,思琦妹的身材,性感的衣着,卻是很多人樂意理會的東西。

「我又冇好着意人哋留意我自己,因為我又細粒,身形又比較嬌小,冇乜特別,又唔覺得特別艷麗,唔覺得自己有咩好優越嘅地方,總之有啲咩工作就做好佢。」

堂堂一個史上得獎最多的港姐冠軍,就是如此,又乖又謙虛,深得無綫高層歡心。

「啲性感衣着如果劇情需要,自己又接受得到就OK。如果有啲要求係自己接受唔到,都會同佢哋溝通,睇吓可唔可以轉個形式,或者着過啲舒服啲嘅衫。出大騷因為全部都係公司設計師安排,人哋已經幫你設計件衫咯!(性感啲唔緊要?)公司會知道電視出街嘅尺度,會遷就番,都唔使咁擔心。」

別看思琦妹口中的「嬌小」身形,其實她胃口甚好,最愛榴槤。

「你睇我生晒瘡我都唔使講,哈哈哈哈!我盡量唔遏抑自己,平時已經好多工作,或者其他突如其來控制唔到嘅壓力,食嘢係我最大放輕鬆、紓緩、減壓方法,所以我會食咗先算!

「一食榴槤就更加爆瘡,好毒呀,但係好好味囉!雪凍咗更加OK,雪糕咁樣,好鍾意食,咩榴槤忘返、榴槤飄香,見到就好想食,停唔到口!」

楊思琦成為港姐冠軍多年後的今天,變身思琦妹;季軍朱凱婷(右)變身主持人兼才女;亞軍的鍾沛枝,不見了。

《巴不得爸爸》被狠抨劇情抄襲,思琦妹的做人方針是,做好每樣工作。這個當然,因為騷錢都是一樣!

「做機嗰啲有幫助o架,自己唔係咁多時間做運動,局部有啲位自己好難減到好瘦。你幫人賣廣告都唔可以太肥㗎嘛!」

已經記不起《血薦軒轅》故事講甚麼,只記得有李泳豪,還有火爆騎術導師李家鼎。

放眼世界

在無綫電視不經不覺已經第八年,獎項方面,思琦妹分別在○四和○六年得過「飛躍進步女藝員」和「最佳女配角」,視后寶座似乎尚有一段距離。

「好難強迫自己,要喺幾多年內攞到,都係順其自然,人哋睇得到有努力過就會留意,會畀啲肯定,畀啲獎勵你,唔會強求,唔代表自己唔長進、唔爭取。

「暫時自己都覺得好開心嘅係有個國際性獎項,係拍香港電台《女人多自在3》,演一個盲嘅女仔角色,我覺得幾有挑戰性,又未試過,同埋着嘅校服同我母校啲校服一樣又係旗袍,好有感受!點知佢拍完攞去參展,咁就攞咗第四十二屆芝加哥國際電影節最佳演員優異獎,導演後尾話畀我聽喺嗰五年裏面都冇華人攞,所以覺得呢個獎好難忘!」

「其實嗰年我教育學院畢業,之前考完試見啲政府工,原來我當選咗嗰個禮拜,就有消息話請我,但我簽咗合約,當選港姐要履行職務。如果佢早少少通知,我可能會教番書。都幾得意,呢個就係人生。」

My Name is Shirley

獎門人曾志偉本來喚楊思琦作「思琦姐」,但思琦覺得不能與前輩的「司棋姐」共用一個稱號,才自稱「思琦妹」,大家沿用至今。

「喺街上連一個小朋友都叫我思琦妹,好好笑呀!我好記得有個媽咪話:『你叫番思琦姐姐啦,佢大過你o架!』佢都改唔到口,電視嘅力量真係好大。」

其實楊思琦的洋名,叫Shirley。

「好少人知道呢個名,去外國,或者中學上英文堂老師先會嗌!媽咪生我嗰陣已經改咗,關淑怡又係叫Shirley,王靖雯又係叫Shirley,係呀!所以我好鍾意聽佢哋兩個嘅歌,係呀!哈哈哈!

「我有見過司棋姐,佢係香港公主,佢後生嗰時真係好靚,好有氣質,講嘢好斯文,係好有禮貌嘅前輩!」

我相信,當思琦妹成為思琦姐後,也能夠自豪地跟膝下兒女說:「我後生嗰時真係好靚,好有氣質,講嘢好斯文,好有禮貌……」

賭幾大都得。