為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2015 年 11 月 04 日

港大校委主席人選 臨門一腳劇鬥

港大校委會主席任命風波如火燎原,上周接連爆出校委李國章和紀文鳳喺閉門會議內容嘅錄音,令事件愈炒愈熱,各方似乎都磨拳擦掌,等今個星期五政府是否公布由李國章出任主席。據了解,反對一方己做晒準備,無論如何會搞大龍鳳,挑戰李國章嘅任命。

據悉,過去兩星期好多人用各種理由向特首梁振英進言,正反兩方意見都有,或因為咁,令本來應該係上星期五公佈嘅消息一拖再拖。

有港大中人透露,有人積極動員希望力挽狂瀾,拋出不同人選,包括醫學界大姐大楊紫芝、青年協會總幹事王䓪鳴,仲有做過教統會主席嘅鄭慕智。

李國章是有能之人,不過風頭火勢,政府會否堅持佢嘅任命,本周五自會揭曉。

有傳鄭慕智既係港大人,亦有開明建制派,屬各方接受人選。

八十多歲嘅楊紫芝江湖地位絕對足夠,八三年己當港大醫學院院長,八四年仲做埋港大副校長,對港大瞭如指掌,直至九十年代才退休,九月份剛獲委為港大校委,「話李國章資歴深厚,佢地就要搵個更資深的,不過問題係楊紫芝己經八十多歲,她自己是否也願接這燙手山芋?」

港大校友關注組召集人葉建源向本刊表示,他個人亦覺得楊紫芝合適,「在校委會內德高望重的人已不多,她不涉及副校長委任風波,免受質疑。」他認為,政府亦可考慮校委會以外的人選,例如做過嶺南大學校董會主席的陳智思。

楊紫芝周日出席活動時被追問會否出任港大校委主席,她說沒有人找她。

至於「公職王」鄭慕智,亦係港大舊生,現任胡百全律師事務所首席合夥人,佢係前立法局議員,做過浸大校董會及諮議會主席,亦係香港大學校董兼畢業生評議會常務委員會委員,是各方可接受嘅人選。

有熟悉港大人士話,關於任命的討論已去到十分情緒化,「論才幹、能力,李國章十分適合,佢喺中大搞得有聲有色,不過正因為咁,好多港大人對佢有情感上嘅反應,已並非關乎佢能力問題。」

不過,另有政壇人土就分析,李國章當年所謂捧中大踩港大,係「身在其位,即謀其政。」相信假如佢出任港大校委會主席,一樣都會為港大利益著想。