民陣雙學散晒 搞唔起一周年

年的佔領行動失敗收場，當時高唱入雲嘅「你不代表我」意識，令泛民碎片化延續至今。快將踏入一周年，民陣早前廣邀各路英雄開過兩次會，諗住再搞大型集會，不過學聯等代表只係各自表述立場，無諗過一齊搞咩，民陣發覺唔對路，終於決定唔揸大旗。

有熟悉民陣嘅人話，佔中三子戴耀廷、陳健民同朱牧同學聯、學民思潮喺去年佔領運動已見不咬弦，基本上可以話係靠邊站，所以三子一定唔會搞。

民主黨等又覺得舊年學生做盡風頭躉，完全唔聽佢哋支笛，仲要面對年尾嘅區議會選舉，亦唔會趟渾水。

佔領運動令學聯聲名狼藉，實力大減，大部分舊人現已退下火線，只剩羅冠聰（中）獨擔大旗，原本計劃與民陣合搞一周年活動亦胎死腹中。

佔領運動期間，傳媒多次踢爆學聯與人民力量成員過從甚密，如今民陣表明不牽頭搞佔領一周年紀念活動，餘下人力等搞局。

去年佔領運動捧出來嘅學生領袖，幾乎都已隱身，學聯嘅梁麗幗、周永康等話要專心讀書，現任秘書長羅冠聰人氣不足，加上早前大學連番退聯潮，港大、理大、浸大和城大先後退出學聯，學聯實在元氣大傷；而學民思潮則只剩下黃之鋒獨撐大局，「學生組織已經四分五裂，民陣自己都擔心聚唔到人氣，獻醜不如唔搞。」知情人士說，群龍無首，由得各組織自己推活動好過。

泛民卻步，不代表激進派放棄攞彩機會搞，據聞人民力量及本土派便甚踴躍，諗住玩一鋪。

據了解，警方目前收到包括學民思潮等六個團體舉辦佔領一周年活動嘅申請，大部分喺遮打道及添美道一帶申請集會，而兩個反佔中團體就申請在「九二八」當日遊行，警方唔敢怠慢，預咗至少二千警力應付場面。