為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2015 年 09 月 22 日

關慧玲

《東周刊》社長兼總編輯。

千六萬鑽石吉他

喺會展舉行嘅香港珠寶首飾展覽會中,有件閃爆全場嘅展品,是個鑲滿鑽石、價值千六萬的吉他,拿在手的感覺真係戰戰兢兢,筆者即時諗起那些狂野樂手,不過抱住咁貴嘅吉他,睇怕都唔敢掟爛。

吉他巴閉之處,係不止睇得仲真係彈得。最近就獲已故流行樂天王米高積遜(Michael Jackson, MJ)的兄長Jermaine Jackson 青睞,攞住佢喺英國音樂節BBC Proms 中壓軸表演。

吉他的物主,係珠寶商古珀行總裁沈運龍。佢自己係音樂發燒友,機緣巧合下認識雷仲德,咁啱佢當時成為香港第一個珠寶參展商,可以喺珠寶鐘表業界年度盛事「瑞士巴塞爾鐘表珠寶展」中首次進入主場一號館,佢想做些令人「嘩」一聲嘅事,於是請雷仲德幫手設計吉他,鋪滿佢公司申請咗專利嘅「六圍一」鑽石,即以六顆小鑽石圍住一顆較大主石,中間無抓,遠看有如卡裝大石的感覺。鑽石吉他喺巴塞技驚全場,仲攞埋健力士世界紀錄,係全球最貴嘅吉他。

沈運龍係典型香港成功故事,佢細個好窮,中三就要出來工作養家,但佢求知慾好強,大清早上一堂商科,朝九晚六返工廠工作,晚上再讀夜校,周末再報埋函授課程,靠自修會考,之後考入理工讀書。

聽佢講,二十歲仔就去沙地阿拉伯闖,在賣建築材料嘅國際公司打工,之後自己做埋老闆,賣中國工藝品,當中最好賣的膠底功夫鞋,曾帶給他好大利潤,但亦幾乎令他無命。

原來,有當地人投訴,話佢對功夫鞋鞋底磨蝕後,紋理會隱然見到「真神阿拉」的字句,把真神踩在腳底豈不是斬首之罪?事件引起軒然大波,佢幾經辛苦至洗脫罪名。

佢唔敢諗係咪商場如戰場被人篤背脊,總之此後緊記入鄉隨俗,有的禁忌真係要好小心,當然他也不敢再賣功夫鞋。

佢後來喺當地開珠寶店,卻又被拍檔侵吞晒八間店舖的生意,於是轉戰杜拜,及回流香港,搞珠寶出入口生意。

沈運龍和米高積遜哥哥因鑽石吉他而結緣,前者更託他訂造五隻紀念戒指。

說回他的鑽石吉他,他笑說自己彈得不好,應該由知遇者演奏,早前Jermaine Jackson彈過呢個吉他後,特別再搵沈運龍設計戒指,紀念今年Jackson Brothers 成立五十周年,五個成員一人一隻,一樣係閃爆鏡。