為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2015 年 09 月 19 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

型男人幫

一講任賢齊(小齊)、蘇永康、梁漢文(Edmond)同黃家強,一般人都會聯想到「好型!」、「好man!」同「好有才華!」,今晚我藉住佢哋擔任「Paco巨星飯堂」嘅嘉賓,隆重宣布佢哋o依家係重量級天團「男人幫」成員!

小齊一向係我嘅偶像之一,建「幫」亦由呢位幫主一手促成,仲會喺11月進駐紅館,舉行一連3晚嘅《男人幫香港演唱會》,我一定捧場。要捧場嘅仲有今晚嘅飯敍地點、位於灣仔嘅「車氏粵菜軒」,我欣賞餐廳嘅出色廣東菜,所以就帶「男人幫」嚟分甘同味!

我帶「男人幫」4子:家強、小齊、Edmond同阿康(左至右),去到位於灣仔嘅「車氏粵菜軒」,品嘗出色嘅懷舊粵菜,同時細說組團經過。

各司其職

幫主小齊表示,「男人幫」嘅組成係一次緣份嘅安排。「我哋同公司,平時開會、傾嘢已經好close。有一次有馬來西亞嘅主辦商請我哋去做show,本來計劃我哋一人唱1/4part,夾埋就係一個演唱會。但係我哋覺得咁嘅安排唔好玩,亦都唔會有火花,於是我哋就傾合唱,又或者挑戰對方嘅經典歌,結果出嚟嘅效果好好,我哋又唱得好開心。所以我就想建立『男人幫』呢個品牌,長遠經營。」

Edmond就話:「因為唱得開心,我哋係講心唔講金嘅,每個人都發揮自己嘅優點,小齊就邀請咗李宗盛大哥嘅音樂班底,出手為『男人幫』嘅新碟同演唱會做嘢;我就一有機會就同幾個兄弟一齊去操fit,準備演唱會;阿康係fashion大師,我哋嘅形象就由佢一手包辦;家強係音樂才子,我哋嘅主題曲就交畀佢處理。」

當位位都係獨當一面嘅巨星,「男人幫」將成員嘅經典金曲crossover,令人耳目一新。

冰鎮五頭南非鮮鮑($180/隻),以上湯浸煮鮑魚後冰鎮,鮮甜味美。

蟲草花燉花膠螺頭湯($680/例鍋),落足料燉製4小時,火喉十足,相當滋陰。

前菜手撕茄子($68),選用有機茄子製作,夠晒健康。

經典Crossover

家強即刻補充:「我想為『男人幫』做番啲嘢,但係除咗寫歌之外,我就冇嘢叻,所以連隊名都未有嘅時候,我就以男人為主題,寫男人嘅力量、男人嘅擔當,當歌詞寫咗一部分嘅時候,我就交畀小齊接力一齊寫;曲風以Rock嘅元素去寫,就成為咗我哋嘅主題曲。

「喺今個禮拜見街嘅新碟入面,我同小齊合唱〈喜歡你〉(小齊:「我最喜歡〈喜歡你〉!」),呢個安排係好無心插柳嘅,係一次演唱會佢做我嘅嘉賓,佢提議合唱嘅。〈喜歡你〉last嗰part好長,我唱嘅時候小齊冇咩做,佢就即興rap咗一段,就成為咗我哋新版本嘅藍本,又冇失去原裝嘅味道。」

家強(左)為幫主小齊(中)落力鼓掌,因為佢係一手建幫嘅主要人物。

阿康就好欣賞家強一個地方:「家強對腳好幼、好靚(Edmond:「仲好似女人!」),所以我為佢準備咗一條好slimcut嘅牛仔褲,襯番對長boot,襯埋上身嘅軍服就好得。今次我為每個人都準備咗一套唔同嘅軍服,帶出男人最man嘅一面,以小齊為例,佢係幫主,又咁壯碩,我就畀多支權杖佢,突出形象。」

車婉婉同老公Johnathan拖手招呼我哋一行人;佢仲親自推介嘅橄香煎肉餅,選用即日屠宰嘅新鮮豬肉炮製,當小齊、Edmond留心聆聽之時,我已經要即時大快朵頤!

食得有Taste

哈哈哈!軍服亦係我嘅喜愛item,「男人幫」簡直係我嘅知音人!佢哋為咗以最佳狀態示人,即使o依家距離開show仲有兩個幾月,佢哋已經開始節食操肌。阿康話:「我夜晚直情戒食澱粉質,連最鍾意食嘅朱古力都唔食!就算今晚美食當前,為咗開show時要着衫好睇,都要適可而止。」

今晚有「車氏」掌舵人婉婉精心為我哋安排,我同一眾嘉賓都品嘗到出色嘅廣東菜。「呢個煎肉餅係我發明嘅其中一道菜式,通常啲廚師都用咸魚煎,我就用橄欖,意大利人都唔會咁做啦!但係用橄欖煎肉餅,會有一種特別嘅香味,係用其他材料做唔到嘅。」

有特色先會有市場,「車氏」同「男人幫」都係以自家特色取勝,一定不乏捧場客。

假若想於晚市時間品嘗外面脆卜卜、內裏啖啖蝦肉嘅懷舊上湯煎粉果($45/碟),就要向餐廳預訂。

大花竹蝦二食($148/隻),以椒鹽方式處理蝦頭、蝦身以上湯煮好,集香口、鮮甜於一身,配上經葱油及上湯烹調嘅麵條,令人回味。

車婉婉大力推介嘅橄香煎肉餅($168/例),連keep fit中嘅「男人幫」都破例添食,風味一絕!

懷舊八寶大鴨($500/隻),鴨身釀入幾隻咸蛋黃、蓮子、百合、雞粒、瑤柱、薏米、肉粒、火腿粒等材料,全部吸收晒鴨香精華,正!

懷舊豉椒味菜炒豬肚尖($380/例),選用每隻豬只有4吋長度嘅豬肚尖炮製,一碟例牌已需要4隻豬嘅肚尖份量!

招牌脆皮牛坑腩($168/例),牛坑腩先經過秘方白滷水處理,再沾上炸漿,皮薄肉嫩。

豉汁排骨陳村粉($45/籠)為午市點心,豉汁於原籠蒸製時滲入陳村粉,美味!

蒜香荷葉蒸蟹飯(時價),絲苗米蘊含蟹香、荷葉香及蒜香,比同類菜式所用嘅糯米,少咗一種飽膩。

甜品為綠茶餡嘅香滑紫米糍($45/碟),及酥皮叉燒包($45/碟),兩者都有吸引人添食嘅「味力」。

車氏粵菜軒
地址:灣仔駱克道54-62號博匯大廈4樓
電話:2528 1123

下期預告

帶Stephy、黃又南品嘗特色火鍋。