化了粉系淡妝、拖着飄逸長裙來到咖啡室的陳昭昭，絲毫沒有十多年前性感女星的味道，感覺「從良」了！

她劈頭便不卑不亢的為自己平反：「我從來冇露過點，就係因為喺電影《人頭豆腐湯》有幕全裸解剖戲，我就畀人界定為『脫星』到o依家，其實嗰個裸體係替身嚟。」經歷過行性感、拍拖分手再拍拖再分手，現時為樓上翡翠店及公關公司老闆的陳昭昭，偶爾登台保持人氣，縱然回復單身，卻快樂無比。

「我兩歲就跟咗爹哋由中山嚟香港居住，近年家姐細妹同媽咪先來港定居，我嘅童年要同媽咪分隔兩地；o依家開咗間公關公司，我同家姐、細妹可以一齊做嘢，而我又同媽咪一齊住，呢一刻係我最開心嘅時光！」陳昭昭紅着眼說，身旁由內而外滲着傳統中國婦女氣息的陳媽媽，雖然寡言，卻微笑了。

除了與母親分隔兩地的辛酸史之外，陳昭昭憶起十多年前的情史，不禁落淚人前，身旁聽在耳裏的陳媽媽不發一言、眉頭輕皺，悲痛在心。

孤單自閉

在中山出世的陳昭昭，兩歲時隨父親來港跟嫲嫲居住，年長三年的姊姊跟年輕兩年的妹妹則與母親留在中山，令她自小過着孤單自閉的生活，只能跟洋娃娃作伴，惟有等到過節才可返中山一家團聚，「記得我三歲嗰陣返中山，根本唔認得媽咪同家姐；不過，到走嗰刻，我喊得好犀利，唔肯上車。」昭昭憶述。

兩歲時，陳昭昭隨父親來港居住，而母親、姊姊及妹妹則留在中山，一家五口一旦重逢共聚，必定拍照留念。

陳昭昭的父親從事製衣廠生意，後與拍檔研發洗衣粉，並到柬埔寨設廠營商，現時還開設農場及魚塘，偶爾回港探望家人。「近十年，媽咪同家姐、細妹嚟咗香港住，又輪到爹哋去咗柬埔寨；慶幸我o依家開嘅公關公司，家姐做秘書、細妹做會計，三姊妹可以成日見面，好似彌補番失去嘅童年咁。」

九七年加入TVB的陳昭昭（右），一直擔任大茄角色；○○年，轉到有線行性感路線，擔任《性在任你Call》主持，即名利雙收。