為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2015 年 06 月 09 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

「香港品牌」 有麝自然香

沈墨寧是木雕收藏家,亦是鐘表界的老行尊,作為兒子的沈慧林,真可謂「虎父無犬子」,成功打造扎根香港之陀飛輪品牌「萬希泉」,更先後與多間電影公司及名人大玩crossover。

沈慧林從外國畢業後回港便加入投行工作,但心中仍記掛着父親公司的陀飛輪技術,終決定放棄高薪厚職,創業打拼建立萬希泉,成功在創業一年後回本,今年萬希泉更在港設立廠房。

萬希泉除積極參與慈善活動,亦常邀專業教育學校參與鐘表設計比賽,希望從中發掘有潛質的本土學生,為香港年輕設計新生代提供機會,今集就由仔仔沈慧林分享他的創業經過。

沈慧林外國回來後,心中仍記掛着父親的陀飛輪技術,終決定放棄高薪厚職,建立萬希泉。

陸:時下嘅人鍾意買瑞士名表嘅喎,咁點解你唔做代理要做個香港品牌咁辛苦呢?

沈:我一直鍾情陀飛輪技術,由細到大都做過唔少資料搜集,發現做陀飛輪嘅本土生產商唔多,嗰時返嚟香港我得廿六歲,屋企人覺得我幫人打工會辛苦啲,所以好支持我創業同搞一個香港品牌,而爸爸間廠正好係我強大嘅供應商,唔怕有品質及交貨延誤等問題。

陸:講吓點解個品牌叫萬希泉呢?

沈:係我太太改嘅,先諗咗英文「Memorigin」後諗中文,代表「Memorial」同「Origin」嘅意思,我哋嗰時個寫字樓咁啱面向維港,而維港亦係由一個小漁村孕育而成國際都會,畀我感覺就好似『萬眾希望嘅泉源』,所以就叫萬希泉,個名好有正能量,並啟發我哋喺呢四年嚟捐咗好多錢去幫有需要嘅人。

陸:咁你創業係咪一路以來都一帆風順呢?

沈:初期所有嘅事都係邊學邊做,我希望以最短嘅時間做到最好,又想快啲學習到歐洲嘅技術,嗰時畀咗自己好大壓力。哈哈,自己做生意比打工其實仲辛苦,做生意亦唔可以一時三刻立見成效,當時同好多開表行嘅朋友仔傾偈,佢哋第一個反應就係吓,香港品牌?得唔得o架……雖然o依家我哋喺香港有咗廠房,不過表仍然係喺大阪裝嵌。

木雕陀飛輪打響名堂

陸:當初你哋點打響名堂o架?

沈:嗰時自由行當旺,好多人講既然咁多國內客,梗係做外國品牌嘅表啦,雖然我唔係讀設計出身,但睇到阿爸收藏嘅木雕好靚,如果擺喺表面度,一定會好特別,加上木雕既無版權費,又富有中國文化色彩,就用咗木雕做第一批陀飛輪設計,結果反應好好。之後再同名人及電影公司合作,大玩中西合璧嘅crossover,Ironman就係其一,遇到有啱嘅本土創意設計,我哋都會好樂意採用同支持。

陸:你哋點玩crossover同揀合作對象嘅呢?

沈:一定要係香港人由細睇到大,形象一定要正面,亦一定係發放正能量,同深入人心嘅好似super hero咁。至於香港名人我主要係搵業界嘅靈魂人物,可以代表到香港唔同嘅文化精神,設計界我哋搵靳埭強,財經界梗係搵陸叔你啦,所以今次做隻牛表出來,既希望香港股市從此牛氣沖天,亦因為有陸叔你呢個元素,好代表到本土經濟嘅文化。

陸:記得你有次上嚟做訪問,問點解我公司放咗咁多牛,除咗我個仔係牛年出世外,牛仲代表勤力同埋係儲錢嘅symbol,牛市喺我股票生涯入面好重要,亦都係所有投資者至愛嘅吉祥物,我仲話今年遇牛市不如整隻牛市表,但當時大家講完就算。直到今年四月頭個市大升,我就話牛表一定要搞喇,估唔到兩位沈生用咗一星期就搞到demo,佩服佩服。

萬希泉用家主導

陸:今年零售市道一般,你哋點睇呢?

沈:我哋未有專門店前,東方同太子鐘表都好支持我哋,由於太子鐘表有好多國內客,所以萬希泉銷售理想,同時新品牌嘅好處就係不斷有新市場待開發,加上o依家有埋自家專門店,市場定位同價位都配合到。我哋嘅自家專門店亦吸咗好多本地客,今年業績九成幾都係香港人,我覺得自己人支持本土製造嘅品牌,意義重大感覺亦超正。

o依家自家嘅廠房,發展已慢慢邁向國際化,喺日本亦都拎到好多品質證書,而且經檢查發覺我哋完全符合到用家同天文台嘅要求……誤差只有五、六秒。由於日本市場咁認同我哋,今年零售市道雖然一般,但因為對自家品牌有信心,好多手表牌子減價,我哋反而加價。

陸:你哋點發掘香港鐘表業人才?

沈:香港嘅專業教育學院(IVE)好多時都有搞設計比賽,去鼓勵同支持本地學生,不過就算佢哋有機會同外國品牌合作,往往都出唔到自己個名,於是我哋就算同學校做完比賽,只要係用到優勝學生嘅設計,一定會幫佢哋出到個名。

陸:咁未來發展方向又係點呢?

沈:好多人以為萬希泉有幾十年歷史,哈哈,其實同我一樣咁年輕o架,暫時我哋會全力做好自己品牌,亦會走出去同唔同嘅國家合作,將來會考慮上市但唔會咁快囉,現在主力先打好根基,今年更會搞好啲香港個廠房,專心做好檢測。近年出現咗一批萬希泉嘅收藏家,四年前買嘅陀飛輪,今日價格已升咗一倍,佢哋好開心我哋都好開心。

做慈善唔理有無宣傳效益,只要係有意義嘅我哋都會繼續支持,當中亦捐咗好多錢畀李嘉欣個慈善基金去保育熊貓。以今次同陸叔你設計嘅牛表,就係希望送贈光明畀健康快車。