一蚊雞七斤龜

因為財經女主播林芷彤的摩打嘴神技，以17秒讀出158個字的免責聲明，令大家燃起兒時玩急口令的一團火。

有好多人都問：「佢究竟講緊乜？我一隻字都聽唔到。」請稍安勿躁，o依家先深呼吸，吞啖口水，如果你在廿秒內讀得晒下面段字，見到燈尾都當你贏。

好呀！唔該晒！咁以上嘉賓係金管局同證監會嘅持牌人，以上談及結構性產品，並無抵押品，如發行人無力償債或違約，投資者可能無法收回部分或全部應收嘅款項。結構性產品嘅價格，可以急升，可以急跌，投資者有機會蒙受投資嘅全盤損失，而過往表現，並非未來表現嘅指標，所以投資前，請參閱相關嘅上市文件，作出風險評估，同埋尋求專家嘅意見。我哋聽日同樣時間，會同大家見面。

讀完都要差不多半分鐘？唔緊要，不如試玩吓這些年來，陪伴我們成長的一些急口令，也許，童年現在，一樣（舌累）晒脷。

雙層牛肉巨無霸，醬汁洋葱夾青瓜，芝士生菜加芝麻，人人食過笑哈哈。

黐線蜘蛛啲蜘蛛絲黐住枝樹枝。

郵差叔叔姓宋，送信純熟迅速送出信。

掘柑掘桔掘金桔，掘雞掘骨掘龜骨，掘完雞骨掘金桔，掘完龜骨掘雞骨。

財政司叫邰正宵做財政司，邰正宵叫財政司攞台證先。

一蚊一斤龜，七蚊一斤雞，佢話一蚊龜貴過七斤雞，我話一蚊雞貴過七斤龜，咁究竟龜貴過雞？定係雞貴過龜？

郭藹明見到郭可盈，話郭可盈個袋形，郭可盈叫郭藹明過海改個袋形，改成郭可盈好型嗰個袋形。

入實驗室㩒實十個緊急掣。

長牀腳撞牆角，牆角撞長牀腳，祥仔話撬開長牀腳，就唔使牆角撞長牀腳。

李妮問你哋，理唔理李莉莉。李莉莉嚟，李妮就唔嚟；李莉莉話：「李妮嚟唔嚟，我李莉莉都嚟理你哋。」於是李妮（舌累）（舌累）脷話：「你咪理，嚟咪嚟，李莉莉咪李莉莉！」咁你話，理唔理李莉莉嚟唔嚟呢？