為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2015 年 05 月 05 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

母出色旅行團

即將踏入5月,代表母親節將至,但係對媽媽好啲,係日日都應該做嘅事,假若有機會同媽媽外遊,直情係親子最高享受!「有線高清娛樂台」就製作咗《帶阿媽去旅行》,令一眾年輕人可以同媽咪旅行,喺鏡頭前真情流露。今晚我就邀請其中4位:黃美棋、徐偉棟(Edward)、徐穎堃(Erica)兩兄妹及李悅彤(Liddy),去到位於北角嘅「Oyster C」,品嘗極鮮生蠔同特色精點,再暢談同媽媽去旅行嘅樂趣。

我帶Erica、Edward、美棋BB同Liddy(左至右)去到位於北角嘅「Oyster C」,品嘗特色西式料理,暢談《帶阿媽去旅行》。

美棋BB圓夢

一眾新星帶星媽們去旅行,唔使多解釋都知道過程係笑中有淚,係感動嘅happy tears。當中宅男女神美棋BB同黃媽媽,就去咗韓國旅遊,黃媽媽仲曾經流下內疚及感動嘅眼淚。「之前我未同媽咪一個去過旅行,佢喺個trip中第一次話畀我知,曾經有兩次好忍心想唔要我。因為細個屋企環境唔係咁好,所以媽咪知道有咗我嘅時候,擔心照顧家姐同哥哥,好難再養多一個小朋友。

美棋BB講母女情,七情上面。

「但係媽咪諗住去家計會唔要我(墮胎)嘅時候,醫生叫佢考慮清楚,之後媽咪再去,個醫生又唔喺香港,到醫生返嚟,我又太大唔可以做手術。我出世之後,又有個冇仔女嘅親戚想收養我,爹哋知道之後就同媽咪話,生咗我出嚟就要養大我,唔可以就咁送畀人。媽咪講嘅時候,仲好內疚。」

血濃於水,而且黃媽媽非常疼錫美棋BB,母女感情自然好,而美棋BB喺旅程中亦為媽咪炮製驚喜。「我喺美國大學畢業嘅時候,媽咪請唔到假去我嘅畢業典禮,我一直都希望可以畀媽咪親眼睇我行畢業禮,所以就同工作人員夾好,租定畢業袍,喺梨花女子大學嘅禮堂同媽咪會合。佢見到我戴四方帽,仲感動到眼濕濕添!」

焗香草蘑菇釀田螺伴蒜茸菠菜($138),惹味!

今晚我同眾嘉賓品嘗嘅生蠔,分別係嚟自法國嘅Ancelin($58/隻)同愛爾蘭嘅Ostra Regal($58/隻),各有特色。

黑松菌蟹肉醬配蒜茸包($90),醬汁同包出奇地契合,鮮香!

徐氏兄妹感動

真人show嘅精髓在於真情流露,黃媽媽以外,「星二代」徐氏兄妹Edward同Erica亦然。佢哋嘅父母分別係大俠徐少強同雪梨,但兄妹兩人自小鮮有時間同媽咪獨處,今次都係Edward同Erica首次同雪梨去旅行。

我以酒會友,從兩位嘉賓嘅笑容可見,飯敍充滿歡樂氣氛。

美棋BB(上圖)同Liddy(下圖)分別帶媽咪去韓國、泰北,享受平日少有嘅親子時刻,節目逢周日晚上十點喺有線娛樂台播出,溫情洋溢。

哥哥Edward話:「以前喺加拿大住都係對住婆婆,媽咪每年只係返嚟一段好短嘅時間,所以同佢嘅感覺有啲陌生,去旅行就直情未試過。今次同埋阿妹3個去新加坡,雖然只係短短幾日,但係好似了解媽咪多咗。例如知道媽咪原來好鍾意食榴槤,佢喺新加坡就食得好滋味,一個人食晒成個。」

Erica緊接表示:「我哋去主題公園玩,已經好開心,到玩過山車嗰時,我畏高唔敢玩,阿哥又冇玩,反而係媽咪玩得最癲最大膽。我就最enjoy同媽咪、阿哥去同海豚玩,媽咪都係一樣咁投入。我哋又去咗睇激光show,配樂係我哋細個聽嘅歌,嗰一刻又係我哋3個人一齊,好似完整番咁樣,搞到我爭啲喊咗出嚟。」

Edward同Erica帶媽咪雪梨到新加坡,旅程令兄妹二人難忘。

餐廳老闆兼總廚輝哥(右三)入廚多年,實力毋須置疑。

Liddy克服畏高

今晚嘅4位嘉賓都係為節目獻出首次與媽媽外遊嘅經驗,Liddy就同李媽媽去咗泰北。「泰北同緬甸接壤,風土人情同平時香港人去開嘅曼谷、芭堤雅好唔同。我想同媽咪有一個難忘嘅旅程,嗰幾日嘅交流多咗,因為平時我同佢都要做嘢,時間又夾唔啱,我收工返屋企,佢又未必喺度,所以好少時間傾偈。

「嗰幾日我哋試咗打泰拳,不過我最深刻嘅係去跳bungee jump,媽咪冇跳,雖然我畏高,但係我好想挑戰一下自己,畀媽咪睇我係一個堅強嘅人,所以就去跳。上到條橋我掙扎咗一陣,突然有勇氣跳嘅時候,媽咪喺下面睇,以為我有危險,佢即時喊咗出嚟。喺嗰時我先感受到,媽咪係好緊張我同好錫我嘅。」

世上只有媽媽好,唔係廣告亦唔止電視節目先令人感覺到,你唔係feel唔到呀?

西班牙海鮮焗飯($380)亦係輝哥以鑽研多年的秘方炮製,值得一試!

燒西班牙乳羊仔前腿配茴香酒汁($520),係我嘅推介!羊肉鮮味嫩滑。

勁辣非洲雞配香蕉片及牛油飯($158),係大廚輝哥跟足非洲部落菜譜製作,香蕉係畀客人作解辣用。

燒澳洲極爽穀飼黑毛豬扒配露桃杧果汁($240),Juicy!

Oyster C

地址:北角北角道10號北角亞太商業中心2樓全層

電話:2834 7748