為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 陸叔開CHAT 2015 年 04 月 28 日

陳永陸

生活是很個人化的態度,人稱「陸叔」的著名財經股評家、兼投資策略顧問,用輕鬆心態,與跨界別嘉賓及以時事專題,去打開財經及以外的話匣子。

冼國林:十分耕耘 兩分收穫 就係贏咗

上回與冼師傅師徒暢談娛樂圈之後,今回就談談他當年在金融界的點滴,以及離開永亨的原因。與此同時,冼國林亦有提及他當日無償協助拍攝《葉問》的原因。

冼國林自十多年前開始看道德經,認為任何事都應該盡力去做,但不要期望一分耕耘一分收穫。

陸:想問番你,之前你無償協助拍攝《葉問》,好多人話你蝕底咗,係唔係因為你見到咁收得,所以拍《葉問前傳》?

冼:其實《葉問》拍得成功我已經好開心,入面好多詠春嘅招式我都有幫手,甚至連甄子丹打樁嘅聲都係我配。不過真正嘅滿足感,係我成功策劃咗呢件事。至於拍《葉問前傳》同《終極一戰》,係將師公整個人生,大部分寫番出嚟,包括葉問食過鴉片﹑有第二個女人等。師太當時喺大陸,師傅一個五十歲嘅男人喺香港,有人照顧係好正常。至於佢唔舒服要食鴉片,亦係不爭嘅事實,佢唔係聖人吖嘛。我其實想話畀人知,葉問唔淨係英雄,佢都係普通人兼有自己嘅坎坷。

聽人話黃百鳴有興趣拍《葉問3》,我就無興趣拍啦!因為我自己嘅期望已經做晒!再拍就純粹係為搵錢而拍。可能佢哋覺得題材好,好似黃飛鴻就係咁拍到十套都得。如果葉問要成為第二套黃飛鴻,將來啲人諗起邊個拍第一套葉問,我都算係有啲啲功勞囉!

陸:點解當年又走番出去讀法律呢?

冼:我已經升到總經理,對上就只係董事長。我個部門又連續九年,係全公司賺錢第一,但我唔可以保證以後二十年都係第一,亦接受唔到以後二十年都仲係總經理,我覺得人應該喺最光輝嘅剎那引退,就會人人都記得你,況且我亦都好想取得大學學位。

聽番啲舊同事講,我當年個老闆,o依家開會都不時提起我,我好開心。如果當時由第一,做到去第二第三,唔係話最差,但我唔想囉。

陸:點解當初會揀做小型信貸呢門生意?

冼:如果你拎十億做樓按,都只係賺百分之二左右,但如果我拎十億去做私人貸款,就可以賺百分之二十喎!加上當時傳統銀行競爭大,大公司一定贏細公司,要搵到一個行業,同一注錢可以賺幾倍嘅,我於是揀咗做小型信貸。

有人會覺得做私人貸款似做大耳窿有啲cheap,但當年嘅大銀行最後都要抄我哋做。當年我哋雖然係附屬公司,但名聲比母公司仲要響,所以其實睇你點去做啫。○三年,逢係受沙士影響嘅行業,我就免息借幾個月錢畀佢,嗰時啲街坊仲話,呢間財務公司咁有社會責任嘅,正好等於我過年前借錢畀亞視嘅員工一樣。

我公司算係財務公司之中,形象最好嘅其中一間。我九六年開始做,o依家出面間間銀行都做,我覺得係要識睇市,同點配合個市,做唔到第一都要做第二,千祈唔好做跟尾嗰個。

做人做事 要互相包容

陸:除咗習武同做私人貸款,你又搞影城,兩間公司仲要上埋市,都係好唔同嘅轉變喎?

冼:我八○年入銀行係做散仔,八三年我見分行有個經理畀人炒咗,連喺銀行做嘅一家幾口都炒埋,發覺做到高級都唔一定有保障!所以就同自己講,一定唔會喺同一間公司做一世,亦一定要居安思危。

喺任何行業未飽和之前,就要快人一步去轉行,眼明手快去抓緊機遇,仲有唔居安思危會好危險。o依家財務公司嘅市場其實已經飽和,再要有突破都唔容易。相反中國嘅影視文化產業,o依家正加速發展,咪試吓囉。

陸:但上市公司主席責任好重大喎!

冼:上市公司主席講錯一句,聯交所隨時搵你,前年我話過希望將所賺得部分資金作派息,聯交所就即刻打嚟,話可能要出通告,做上市公司主席真係好多規範,仲要慎言,真係唔好做。

陸:你除咗簽藝人,都有收好多徒弟,佢哋係點嘅呢?

冼:我有啲徒弟年紀仲大過我,當中可能有署長級政府高官,亦有財經界知名人士﹑又有律師,佢哋都好接受我嗰套尊師重道﹑得饒人處且饒人嘅睇法。每逢新年我都好開心,因為啲徒弟成日會畀驚喜我,整兩隻舞獅嚟我屋企拜年。

陸:你人生都幾傳奇吓,你對o依家點睇呢?

冼:我o依家好滿足,亦睇化咗好多,十幾年前開始睇道德經,發現任何事都應該盡力去做,但唔好期望一分耕耘一分收穫。我向來都係十分耕耘一分收穫,如果有兩分收穫,已經係贏咗。

我當初入行頭七年都係做散仔,考到牌幾次都遇着經濟唔好無得升職,人嘅際遇真係好奇妙,諗番吓我當年做過咗八七年,之後嘅際遇就開始順啦,我o依家追求嘅係心靈上嘅滿足。

陸:你有咩忠告畀年輕人呢?

冼:唔好期望你想表達嘅,人哋一定要聽,因為咁你只係落order,唔係表達訴求。亦唔好認為自己啱嘅就一意孤行,都要睇埋客觀因素先去做決定。

最近網上流傳段片,有個泰國模特兒鬧中國人唔排隊,但如果嗰間機構,識即刻搵人出嚟維持秩序,件事其實可以快啲解決!香港迪士尼初初都有好多內地人,搞到好污糟,佢哋即刻搵人加強管理,o依家咪無咗呢啲事囉!以前香港人都試過畀人話嘈﹑唔守規矩,所以每樣事都有教育過程,最重要大家應該互相包容。

我都後生過﹑激過,o依家年輕一代手法相對激進,大家不妨諗吓,你講嘢我未必要聽,我講嘢你又未必想聽,係咪應該互相體諒吓呢。