為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2015 年 04 月 28 日

關慧玲

《東周刊》社長兼總編輯。

由零蚊到十億

香港青年工業家協會副會長廖錦興(Bobby)說話快又急,貫徹佢做生意方式,都係唔使急最緊要快嗰類人。佢嘅成功故事,幾值得參考。

佢六五年出世,在筲箕灣成長,家住明華大廈,屋企六個人擠住二三百呎地方,從小就有好強嘅搵錢意欲,諗住畀家人改善生活。畢業出來工作,第一份工在一間美資塑膠公司做落單,他形容係手板眼見工夫,沒甚挑戰,想轉做為公司跑數嘅推銷員,不過當時個猶太人波士唔批准,佢同哥哥商量過後,決定辭職闖一番事業。

兩個黃毛小子,沒創業資金又沒有物業可以抵押,銀行點會借錢?Bobby把心一橫,決定靠把口,向小型家庭式塑膠廠埋手,推銷自己有訂各種更好更正原材料嘅窿路,但就要先付費。

呢招真係兵行險着,試想如果有個陌生人拍門,話幫你入貨但要先畀錢,即刻會想係咪騙局?可想而知Bobby當時食盡閉門羹的慘況。但佢厚住面皮,一次唔得,隔幾日再去,解釋再解釋。日日喺工廠大廈行上行落,行到鞋都爛。

Bobby(中)○七年獲得香港青年工業家獎。

一段時間後,佢體驗出但凡小型廠老闆都好忙,但星期六下午,或者打風日子無工開,才有時間聽佢推銷,於是佢連假日都開工,經過無數次拍門後,終於有一個老闆畀佢誠意打動,願意畀機會佢。

Bobby到今日都記得呢位老闆嘅說話,佢話:「我畀一萬蚊你,唔知你係咪真係買到我想要嘅貨,但我拎得出來,就預了無咗。如果你真係沙沙滾拎去玩,我就當自己唔好彩。」

Bobby自然非常落力做呢第一單刁,有了這第一次,第二、三、四張單就容易到手,滾存了一筆資金後,便不再需要買家先付費給他了,而他的塑膠原料廠生意,也可以起步。

經過二十五年努力,Bobby間廠目前年生意額去到十億元,蘋果、三星等都是他的客。

萬事起頭難,Bobby話如果那時候放棄,邊有今日?佢試過應學校邀請,同學生講吓創業經驗,有學生挑戰佢,話當年正值香港經濟起飛,食正機遇梗係做乜都得,如今社會變晒,今日創業又可以點?Bobby話:「其實每一個年代,都有屬於那年代的機遇,首富李嘉誠都係把握到七十年代香港嘅商機,至做到咁大生意,但二○一五年嘅機遇係乜?你哋要自己諗。」話時話,這世代互聯網發達,只要有好橋,年輕人可以透過網上平台全球集資,相對七十年代,籌集資金可能更容易。

青年工業家協會就係集合百幾個不同範疇嘅工業家,大部分都好似Bobby一樣,由零起步捱出頭。佢哋更想講,香港其實仲有不少人踏實做工業,唔係所有人都去炒股炒樓的,後生仔可以留意下相關工作機會。