莊思敏以模特兒身份入行，當年她希望能成為演員拍電影。時光飛逝，今日演員夢早已成真，今年初與「中國3D數碼娛樂」續約三年，片約不斷，早前拍完《沒女神探》和《十月初五的月光》，五月又與羅蘭、鮑起靜、邵音音合作拍鬼片。上月，她又突然客串劇集《愛．回家》，由大銀幕到小螢幕都見到她的蹤影。她說演出機會得來不易，全靠自己主動爭取：「我都要自己去搵監製，問吓有無角色啱我，不斷去搵機會，從來做事都係親力親為！」

雖然拍劇比拍電影辛苦，但她認為非常值得：「o依家唔捱等幾時？辛苦有辛苦好，拍電視劇可以在短時間學到更多嘢，例如學記對白、學走位，統統都係演員要識嘅學問。稍後希望再跟甄詠蓓和黃秋生學戲，提升自己嘅演技！」

工作算是順風順水，但感情生活卻仍然空白。近年的緋聞亦只是導演葉念琛，她慨歎：「呢幾年都係霧水情緣。試過同人相處得好好，但最後變成兄弟，因為我一向唔鍾意玩曖昧。連《姊妹淘》的女仔都為我緊張，有師傅幫我算過，要到2018年至有真姻緣，所以現在事業行先！」

Profile

英文名：Jacquelin

出生日期：5月1日

身高：176cm

曾參演電影：《十月初五的月光》（未上映）、《沒女神探》（未上映）、《小姐誘心》、《Delete愛人》、《3D冰封俠》、《古惑仔：江湖新秩序》等

曾參演劇集：《獅子山下2015》（未播映）、《波士早晨》、《四個女仔三個BAR》、《你們我們他們》