為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2015 年 04 月 06 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

3個小孩的家長

近期嘅出色港產片,相信唔使我多作介紹,首選一定係上映一周已收超過550萬票房嘅《五個小孩的校長》。除咗千嬅、古仔同五位小演員,其實電影中個個角色都係主角,所以今晚「Paco巨星飯堂」嘅嘉賓,就係電影中另外一「長」——家長。我特別邀請戲中飾演家長嘅4位好戲之人:吳耀漢(Richard)、吳浣儀、劉玉翠同姜皓文(黑仔),佢哋喺戲中係3個小孩的家長,每一位都有同小演員演戲嘅點滴。

我帶4位嘉賓去到位於北角海逸酒店嘅「海逸軒中菜廳」,一邊品嘗曾經得獎嘅菜式,一邊細說感動人心嘅電影,背後鮮為人知嘅故事。

今晚我帶Richard哥、浣儀姐、玉翠同黑仔(左至右)去到「海逸軒中菜廳」,品嘗得獎菜式再談《五個小孩的校長》。

「嘉嘉」最愛摩天輪

戲中飾演學生嘅五位小演員,每一位都令觀眾留下深刻印象,當中年紀最大嘅係飾演「嘉嘉」嘅傅舜盈,黑仔同玉翠就飾演佢嘅父母。黑仔表示:「最初導演搵我嘅時候,我都有啲意外,居然有人搵姜皓文拍1級片喎!之後聽埋個故事,就覺得可以參與呢齣戲嘅演出,係好感動嘅事,我哋喺片場日日都喊咁滯,係感動嗰隻喊。『嘉嘉』好好戲o架,佢係再令我同玉翠入戲嘅催化劑。」

《五個小孩的校長》中嘅小演員演出可人,連一眾好戲之人都大讚。

玉翠立即補充:「有一場戲講『嘉嘉』唔敢返學,因為佢驚返咗學爸爸媽媽又嗌交、打交,佢放學返屋企就見佢哋唔到。『嘉嘉』演得好自然,我哋嘅情緒好自然咁畀佢帶動咗。到首映嗰陣,我本來諗住拍嘅時候都喊咗,又知個故事係點,一定唔會喊啦,點知睇到嗰度,仲有畢業禮嘅時候,啲眼淚係不受控制咁流。」哈哈哈!幕前每一幕都感動人心,黑仔話幕後一眾大小工作人員就玩得好開心。「『嘉嘉』鍾意玩人肉摩天輪,即係我抱起佢,手臂打轉,之後其他小朋友又要玩。不過一到拍喊戲,『嘉嘉』就好專業,佢會同你講:『我一陣間要喊,要培養情緒,唔可以玩嘞!』。」

傑哥叉燒($138)係總廚嘅名菜之一,每日新鮮即製。

冰梅欖角鳳鮮雞($148),冇骨又有鮮味秘醬炮製,啖啖肉。

富貴黃金龍蝦球($398)係「環球廚神:國際挑戰賽」嘅得獎菜式,色香味俱全。

「珠女」爆喊的秘密

相比起「嘉嘉」,拍喊戲要令年紀最細嘅「珠女」(王詩雅)嚟料,據浣儀姐講,要真正嘅「珠媽」出招。「我喺戲入面係飾演『珠女』嘅親戚『嫻姨姨』,因為個角色讀書少,唔知點去解釋畀『珠女』聽佢爸爸媽媽交通意外死咗,於是就話爸爸媽媽畀行雷怪獸食咗。有場戲講『珠女』喺雨天同校長講行雷怪獸嘅事,要喊得好犀利,導演同我哋都諗點樣令『珠女』喊到咁。

Richard哥同浣儀姐都係好戲之人,佢哋都同小演員們建立真正嘅友情。

呢一幕「珠女」嘁得令見者心酸,幕後多得「珠媽」出招。

「到拍嗰日,『珠女』媽咪攞咗我送畀『珠女』生日嘅公仔嚟開工,仲趁佢行開咗先攞出嚟,其他小朋友見到就一齊玩,『珠女』一見到,就話:『呢個係嫻姨姨送畀我嘅生日禮物嚟o架!』,跟住就喊到收唔到聲。」

戲就因而拍得好,浣儀姐亦解釋「珠女」爆喊係因為:「佢媽咪話,我送咗個公仔畀『珠女』之後,佢晚晚都攬住瞓覺,佢覺得個公仔係好私人嘅,所以當見到個公仔喺片場出現就好唔開心。後尾我哋都要o氹好耐,佢先開心番。」

舞茸骨香龍脷球($168)以原條龍脷起肉,香滑!

美極雪凝白玉($188),以銀鱈魚配豆腐,加上豆酥及鹹蛋黃,味道多層次。

玉蝶青杧牛柳粒($158)嘅造型特別,牛柳軟滑。

玫瑰醉香大明蝦($228/4隻)酒香撲鼻,蝦肉彈牙。

原隻南瓜蟹粉燴香米($158)以大閘蟹肉及蟹糕炒茉莉米,再釀入原個南瓜,香味不可擋!

「小雪」演戲冇難度

Richard哥飾演另一個學生「小雪」嘅爸爸,佢話:「啲人成日話同小朋友拍戲,好難控制,我拍呢部戲之前都有少少擔心,但係一開工,就完全唔擔心。佢哋係由幾百個小朋友入面揀出嚟,仲受訓咗兩個月,好好o架嘞!

「我哋去咗個真實嘅屋企度拍,『小雪』就踩住兩個鐵罐增高煮飯。因為我個角色係老來得女,所以有場戲我要講好多對白去講屋企嘅狀況。喺真實屋企拍有好大幫助,我冇試過窮,憑空想像去演有一定難度,有實景同觀察入面嘅人點溝通就好好多。」

Richard哥仲話,令佢意想不到嘅係導演關信輝。「佢第一次同我講個故事,已經喊得好厲害,我都未見過一個男人喊得咁悽慘,就係因為佢喊到我咩都聽唔到,我先決定接呢部戲。」

餐廳總廚傑哥(右三)精心炮製菜式,我同眾嘉賓都十分欣賞。

海逸軒中餐廳

地址:北角英皇道665號北角海逸酒店3樓

電話:2185 2788