為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 風言風語 2015 年 03 月 21 日

杜如風

自稱職業玩家,游手好閒只為玩。熱愛鑽研時裝、娛樂、飲食文化,娛樂圈中交遊廣闊。近年為人氣旅遊節目主持,以瘋言瘋語瘋狂行為玩盡世界,並視之為終生職業。

腳板底紋身

小妹從來不抗拒紋身,因為身邊有很多好友,都是滿身紋身的,特別是LMF的成員,個個紋到「無撻好肉」,小妺跟他們相處了十幾年,經常陪他們去紋身,很多時會心郁郁:「呀,不如自己又紋個細細哋嘅玩吓啦!」但我想來想去,想了十多年,也未找到一個適合託付終「身」的圖案或字句紋在身上跟我入棺材,況且雙親必定極力反對,然後我又看來看去小妹自己的樣貌,實在不適合畫個公仔上去,我的好兄弟常說:「紋梁朝偉個名上去囉!再唔係咪紋梁朝偉個樣上去囉,擔保你唔會後悔!」「過分得滯啦!」

然後有一次,我又無聊無嘢做,又走去陪位好兄弟紋身,你知啦,紋一轉要花幾個鐘時間,找我這個「水姐」去吹吹水,還可以分散紋身痛楚的注意力,的而且確是明智之舉。小妹在等候期間,百無聊賴地翻開那些紋身參考書籍看看:「嘩,大篆同小篆字都有喎!」

紋身師好友Gabe曾經幫我「畫」個「風」字在頸後,點知三日就畀母親大人發現,被迫放棄紋身計劃。

睇吓個「風」字點寫先?「好型喎,字體線條柔軟優美,很神氣的,紋自己個名應該唔會後悔啦啩!」不過我還是恐怕過不了雙親那一關,父母都比較傳統,紋身對於他們來說應該是很壞的事,於是跟我頗熟落的紋身師傅Gabe就友善地向我提議:「,我用筆幫你畫個細細個嘅喺頸背位,呢支筆兩個星期左右先至甩色嘅,你留長頭髮o架嘛,除非你紮起頭髮先睇到o架,你返去feel吓先啦,同埋睇吓會唔會畀媽咪發現先啦!」「Gabe你真細心!多謝你呀!」畫出來的小篆「風」字確實好型,只怕母后嚇暈!吓,誰知,不出三日,家母就發現我頸背多了一個字:「吓?你紋身吖?邊個准你紋呀?」「你睇真啲,我個名嚟o架,小篆嘅『風』字呀!」「我識睇!但我叫咗你幾多次千祈唔好紋身呀?!身體髮膚,受諸父母呀!快啲整走佢!」「假o架媽咪!畫上去o架咋,過幾日就甩o架啦!」「總之你就唔准紋身啦!」!都話此關難過也!結果被迫放棄了紋身這個念頭!

直至最近,有一位在國際上非常著名的紋身師傅Dr Woo專程從L.A.來港幾天,在一個art exhibition內幫人紋身,我的好兄弟雀躍非常,立即book時間去會一會大師。而此刻,小妹的紋身念頭又回來了!國際級大師喎,機會難逢呀!然後我問問我的好兄弟:「我紋個超細個嘅好唔好呀?」「你唔好紋啦!女仔流流紋咩身呢?」「我淨係想紋七粒星喺腳板底咋嘛,都唔得?」「你今日食咗藥未呀?」