為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2015 年 03 月 17 日

關慧玲

《東周刊》社長兼總編輯。

胃痛可以攞命

上周六晚新聞行政人員協會晚宴上,特首梁振英同蘋果社長堅哥唱〈友誼之光〉,不過兩人中間隔住個中電企業發展總裁莊偉茵,兩人無機會有眼神接觸,場面夠晒有趣。

席上巧遇資深傳媒前輩關偉,佢喺亞視做高層時已認識佢,年前他退下火線,去城大媒體與傳播系教書,又幫新聞教育基金做司庫,剛剛帶新聞系學生從北京採訪人大會議回來。見佢面龐飽滿不少,仲有一個小肚腩,正想笑佢教書優游,點知原來佢年前差啲命都無。

一三年正係佢「登六」(六十歲)之年,某日正打緊八號風球,聽到天文台話下午會轉三號,正想起牀梳洗準備返工,點知腹部傳來一下劇痛,即時無辦法企穩,爬回牀上休息,點知愈來愈痛,痛到出唔到聲。佢家人立即問醫生朋友可以點?呢位朋友一聽,就叫佢搵一間有腸胃科醫生當值的私家醫院,立即入院唔好等。

醫生同佢檢查完,話不多說,立即推入手術室,原來佢係十二指腸潰瘍,引致急性腹膜炎,相當嚴重。兩小時後,佢身上插滿喉管被推出來,留醫咗十幾日至出得院。關偉話,醫生後來同佢講,再遲幾小時入院,好可能無命,佢至知驚。

關偉後生時試過胃痛,食藥好番,之後身體一直沒其他大毛病。不過醫生話唔係喎,十二指腸潰瘍唔係一時三刻發病,而且係好痛的,佢應該一直無理,至會蝕到條腸穿咗,污糟嘢流入腹膜。他才醒起早在發病前半年,食飯前胃部不時隱隱作痛,但他不以為意,以為不過是肚餓,食飽唔痛就算,醫生惟有笑他忍痛力高強。

醫生同佢檢查過,認為不似是幽門螺旋菌作怪,可能或跟食生嘢或太酸的食物,殘渣又長期留在腸內有關。不過點都好,經此一役,佢開始愛錫自己,食了四十二年的煙,一夜戒掉。

佢話好彩已從火線上退下,否則打風時節,肯定是電視台最忙之時,以佢硬漢子性格,一定唔理三七廿一返工追新聞,分分鐘暈倒直播室也說不定。

執番條命,佢o依家甚錫身,食好瞓好,唔會勉強自己捱,有咩頭暈身㷫,即刻睇醫生。