為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2015 年 03 月 16 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

欲葡盛宴

「Paco巨星飯堂」甚少介紹正宗葡國菜式,今晚就嚟一個小突破,我邀請到「香港金像獎最佳新演員」提名人蔡潔(Jacky)、正宗澳門人Soler嘅Julio,同埋泰拳宗師盧惠光,一齊去到位於澳門氹仔嘅「海灣咖啡屋」,品嘗最正宗嘅葡菜盛宴,暢談2015年嘅大計及目標!

今日食葡國菜,我同Julio、Jacky及光哥(左至右)喺澳門氹仔嘅「海灣咖啡屋」,大快朵頤。

興奮新人

首先就梗係要恭喜Jacky榮獲「最佳新演員」提名,佢喺彭浩翔執導嘅《香港仔》入面,表現出色,先得到評審嘅垂青。「哈哈!得到提名梗係好開心,亦都好興奮。其實喺拍攝過程入面,導演同志偉都教咗我好多嘢,都係終身受用嘅;有埋提名就更加圓滿,無論得唔得獎,我對可以參與呢個影壇盛事都好開心!」

Jacky喺《香港仔》嘅精采演出,成功獲提名角逐金像獎嘅「最佳新演員」。

哈哈哈!Jacky喺新一代嘅女演員中,潛力特別優厚,仲係科班出身,喺墨爾本攻讀影視製作碩士課程,絕對不容忽視。「其實要多謝好多人畀機會我發揮,2014年我拍咗4部電影,每一部我都學到新嘅嘢。我讀書嘅時候,目標係製作屬於自己嘅電影,o依家做演員係我嘅起點,所以接到每一部戲我都信任導演,盡全力去演。

「之前喺《香港仔》同志偉演情慾戲,我都冇太多顧慮,亦都唔會扭扭擰擰,因為我知道,將來我開戲,我都想我嘅演員同crew都咁信任我。」

紅豆豬手($180)配上葡式肉腸、椰菜等配菜,惹味!

海灣咖啡牛柳粒($138)係咖啡屋獨有菜式,牛柳鬆軟,值得一試。

腐乳蟹($330)選用肉蟹製作,味道特別。

十五周年

Jacky對影視行業充滿信心,今年即將踏入入行第15個年頭嘅Julio,同樣滿肚大計。「今年係Soler成軍15周年,我同細佬(Dino)會一齊開show,仲會製作兩首新歌去紀念呢個時刻。o依家我哋好多時都分開登台,所以能夠再次喺台上合唱係好值得開心嘅。」

Soler玩嘅音樂一向極具風格,同光哥一樣咁型!我可以話,冇光哥嘅幫忙,今年嘅年度動作巨片《殺破狼2》係冇可能完成。「唔好咁客氣啦Paco!我覺得一部好嘅電影,係冇外在因素可以阻止到佢嘅製作,同埋我都好想見到動作電影嘅突破,所以可以成為呢部戲嘅其中一分子,先係我嘅榮幸!」

3位代表唔同世代及界別嘅演藝人聚首一堂,實屬難得。

Julio對音樂嘅熱誠,值得讚賞。

我同光哥相交多年,佢重情嘅性格,我非常欣賞!

光哥(中)喺《殺破狼2》製作上幫上一把,亦同戲中演員古仔(左)及Tony Jaa(右)言談甚歡。

飛太(後排中)早已係澳門葡國菜嘅代表人物,佢培育Filipe(後排右)等成為第二梯隊,為接班準備就緒。

葡菜權威

講到突破,我鮮有喺飯堂介紹葡國菜,上一次已經係幾年前嘅事,但係一講到喺澳門食葡國菜,我第一時間就會諗起「海灣餐廳」嘅飛太飛曼華。今次我特別挑選位於氹仔嘅「海灣咖啡屋」,係由飛太公子Filipe主理,走家庭路線,一入餐廳已經感受到葡萄牙式嘅溫暖。

飛太表示:「總店同呢度相比,就少咗一份家庭味道,呢度喺舊年擴充過,可以容納到多啲客人,價錢亦都家庭式一啲。另一間『海洋海灣咖啡』,路線就再年輕化一啲,我希望每個層面嘅客人都照顧到。」

哈哈哈!我做音樂、製作電影,同飛太嘅理念如出一轍,要照顧唔同人嘅口味,branding係好重要!

馬介休燴飯($138)亦係此店獨有菜式,芳香唔肥膩。

葡式砵酒雞($138)係咖啡屋獨有菜式,雞滑而味濃。

葡式燒乳豬($230碟/$900隻)最啱一家大細一齊品嘗,相當家庭式菜式。

咖喱牛尾($128)配上脆皮豬仔包,別具風味。

西洋焗鱸魚($158),魚滑茄醬酸咪咪,開胃!

海灣咖啡屋

地址:氹仔舊城區地堡街第四座偉展閣53-57號地下

電話:+853-2882 5255