為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2015 年 03 月 10 日

關慧玲

《東周刊》社長兼總編輯。

大半年減三十磅的方法

港大春茗中碰見傳訊部助理總監徐佩瑩(Trinni,下圖),驚見伊人大幅消瘦,原來佢大半年來減咗三十磅,成個人縮了兩個碼。

佢笑話並非貪靚,而係有糖尿病。從來唔做身體檢查嘅佢,去年的起心肝見醫生,皆因覺得出現一些小毛病,例如經常口渴等,豈料一check之下,空肚血糖指數爆晒表,唔食藥唔得,連飲食習慣都要急轉彎。

佢話之前飲食不多節制,愛食幾多就幾多,做電子傳媒年代經常處於高壓狀態,「化悲憤為食慾」、「食餐好嘅」成為獎勵自己努力工作的借口,近年入了港大工作,不必出鏡,又生埋小朋友,就更大條道理,以為可以食多幾啖飯,否則邊有力湊仔?

糖尿病後,佢開始睇好多書,又去問糖尿病聯會的姑娘學習控制飲食,初期未掌握進食份量,幾乎餐餐飯後都篤手指驗血糖,搞到十隻指頭都受罪。

佢話o依家每餐基本係五匙羹飯,加兩隻麻雀身體般大小的肉類為主,菜可以無限量吃;沒甚麼食物可吃或不可吃,一日三餐食足加消夜都得,最重要是計算一日可以進食幾多澱粉質(裏面有糖分)和其他糖分,之後攤分開來吃。例如知道今晚會食甜品,午餐就食少些飯,下午若吃了曲奇餅,晚上就唔好咁大魚大肉。

Trinni話,在家煮食可以控制得較好,出外吃最易中招是湯水,皆因好多餐廳為了令湯水更鮮味,會加進冰糖,此外,多醬汁的餸菜也是大忌,高糖高鈉,好易超標。

仲有一個秘訣,就是用長些時間咀嚼食物,拖長吞進胃裏的時間,原來食得太快,大腦趕唔切發出飽肚的訊息,Trinni從前係以消防員的進食速度,即係二十分鐘內「隊」晒所有嘢入口,食完再搏殺,好多時就係咁食得過多。

這些飲食貼士,就算不是有糖尿,都好有參考作用,尤其是現今坐過多行路的打工仔。

Trinni好懷念以前可以食一大碗飯的日子,本來以為吃進肚子裏就叫不浪費,但o依家識諗了;浪費食物是不好,但浪費健康也不該。早前嘴饞,吞下一個朱古力心太軟加一球雪糕,之後有些不舒服,不禁歎句,人生有些quota,是會隨着年紀而用完的。