創意家業 雷禮權
安樂窩講求舒服，但九巴後人雷禮權（William）則貫徹一向作風，講求無限創意。
五年前，他花時八個月、豪擲過千萬，打造位於山頂種植道的五千呎頂級豪華大屋。向來精於室內設計的他，由繪圖到裝潢皆一手包辦，為配合家居的白色主調，更在全球網羅各種稀有裝飾，點綴成獨一無二的高尚豪宅。
「我咩都講求creative（創意），老婆（利蘊珍）同啲仔女個個都知道我呢一項（室內設計）實掂，全部交晒畀我（設計）！我個人好新潮，如果你係一個古老嘅爹哋，細路哥係唔會想返屋企，但我仲新潮過佢哋，o依家仔女留喺屋企嘅時間仲多過我！」
家中有個創意爸爸，砌靚屋企，兒女怎能不戀家？
客廳簡單以紫色地毯作點綴，他表示：「其實我係鍾意深藍色，揀紫色係因為我成間屋已經好白，要搵啲暖色系嘅顏色中和吓！」
雷禮權坦言很少時間留在家中：「我成日都要飛嚟飛去，喺屋企的話，我多數都會去書房影吓相、玩吓音樂。」
專用來佬貨
難得能一覽全港數一數二的豪華大屋，當然要仔細品嘗雷禮權家中的每個角落。甫打開白色防彈玻璃大門，一片雪白的地板和外牆，配上紫色作主調的客廳，空間感十足。
再走過弧形樓梯進入飯廳，面對一百八十度維多利亞港全景，簡直令人心曠神怡。「呢間屋我已經住咗五年，原本住旁邊個單位，我每十年會搬一次屋。我個人比較新潮，屋企要成日換款，之前試過整到成間日本、意大利屋咁，今次就以白色做主題，下次間屋我打算用晒LED地板！」
連接一樓的樓梯間，掛有一幅由外國藝術家創作的螞蟻畫作：「我姑姐每次見到都好憎，話睇見都成身痕！」地板則為他請人專程由荷蘭來港髹油。
一向諗頭多多的他，着重設計品質，家中花巧擺設不多，但就講到明一定不會用意大利貨。「我每次設計一間屋之前，都要make sure（確認）盡量唔用意大利嘢，因為意大利嘢喺香港實在太common（普遍）。其實呢間屋真係太似間醫院，咩都係白色，所以我特別喺峇里島買咗啲幾千年歷史嘅木雕，純nature（大自然），非人造木，擺喺飯廳點綴吓。
「平時我去歐洲旅行，就多數會喺Amsterdam（阿姆斯特丹）間Frozen Fountain買晒全歐洲想要嘅擺設，亦會去埋巴黎睇家品店，屋企大部分擺設都係來自歐洲，就連呢個啞面白色地板都係喺阿姆斯特丹請專人飛過嚟香港髹油，髹咗成兩個禮拜！」
一樓走廊上放有藤造的單車及狗，出自一位居住在越南的法國藝術家手筆。
