開心gathering
模特兒趙哲妤（Uny）位於跑馬地的千呎屋，設計以簡潔為主，伴有叮噹、叮鈴陪伴，就知道主人家鍾意叮噹，亦羨慕叮噹與大雄的一份純真友情。
難怪她自言最重視與朋友開心gathering，家居布局亦為方便與友聚會而設計，大廳一大張梳化加上闊落空間，足夠容納大班朋友，而且聚會重量之餘更重質素，她刻意不設電視機，方便與友圍埋傾偈談天，無謂被電視機礙手礙腳，她說：「呢度不設電視，但傾偈摸住酒杯底嘅酒，無限量供應。」家居設計，完全感受到Uny的「好客之道」。
開揚的客廳近三百呎空間，可容納大班朋友聚會，而原本放電視機的地方，則改放色彩鮮艷的畫作代替。
簡潔靚景
走入趙哲妤（Uny）位於跑馬地的千呎香閨，偌大的客廳，以白色做牆身，地下鋪木地板，配襯深木色或黑色傢俬，簡潔得過分，只見幾個叮噹系列公仔、咕o臣作少少點綴，天花只裝射燈，連燈飾都沒有。
Uny坦言喜歡簡單實用的設計，拒絕浮誇，但客廳亮點卻特別執過，那便是廳外望的跑馬地開揚景色，Uny說：「呢幅大窗就真係講究啲，窗框特別做，睇到窗外啲花草樹同埋park view，加埋窗框望上去好似幅畫咁，令人好舒服好relax。」
客廳連飯廳足足有逾三百呎空間，為了騰出更多地方招呼客人，開放式廚房只佔一角地方，反而大大個酒櫃佔去更多空間，卻絕不能慳，Uny說：「傾偈最好梗係摸住酒杯底，大班朋友上嚟夠晒地方、夠晒酒飲，所以平時我都唔使出去蒲喇！」
Uny由小學二年級開始情迷叮噹，一有不快，攬吓、望吓叮噹公仔便會不快全消。
為了讓朋友坐得闊落舒服，Uny寧願將廚房位讓給飯廳，放大大張黑玻璃面的長餐枱，但不要以為Uny不懂入廚，平常她最愛入廚煮西餐，最拿手是煎牛扒、意粉和整蛋糕，她將廚房割地給飯廳，連朋友都笑言她是為朋友為到底，「以犧牲小我來完成大我。」
秉承「好客之道」的Uny，挑選了一張大號L形梳化外加一張單座位，萬一客人太多不夠坐，客廳位置鋪上的杏色大地氈便派上用場，「加埋咕o臣又可以坐埋地下，試過廿幾人都坐晒喺度玩。」細心留意，大大個客飯廳竟一部電視機都見不到，香港家庭實屬少有，Uny解釋：「書房、睡房都有電視，但廳就無，就係想朋友上到嚟圍住坐埋一齊傾偈，唔好睇住電視分心啦！」
大廳的窗戶，遠眺跑馬地會所和一片翠綠山景，Uny大讚似一幅風景畫，讓人心曠神怡。
