為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2015 年 03 月 09 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

春風得意

新正頭,凡事講意頭!今次「Paco巨星飯堂」嘅嘉賓組合就啱晒:伍姑娘伍詠薇、豹哥單立文、陳彥行同楊天經,即將喺慈善舞台劇《嬉春酒店》中合作發放笑彈,一個咁春風得意嘅組合,最適合呢個時份!

我特別挑選位於尖沙咀嘅「翠亨邨」,以特色嘅春節菜式,同4位貴賓暢談暢飲,樂也融融。

今晚我同天經、行姐、伍姑娘、豹哥呢個《嬉春酒店》組合,喺尖沙咀「翠亨邨」品嘗春節菜式,真係春風得意!

獻出首次

我知道舞台劇係改編自法國話劇《酒店》,90年代藝進同學會曾經演出相同劇目,仲取得空前成功,今次換上全新組合,除咗帶嚟新鮮感,伍姑娘同豹哥仲分別獻出第一次。伍姑娘表示:「我入行25年,今次係第一次演出舞台劇,喺劇中我同豹哥飾演夫婦,我覺得角色好似我自己,係一個『十三點』,俗啲講係有啲低能。

「舞台劇同拍劇拍電影好唔同,冇得NG,全部都係一次過,好刺激!到排劇嗰陣,我先知難度比我想像高,好似我平時講嘢咁大聲,都要繼續練聲,因為演舞台劇用聲係同平時生活有出入,所以我都係努力中。」

舞台劇喺3月20日開始公演,睇到唔同嘅演技派喺舞台上鬥戲,值回票價!

講到豹哥,佢一直都係我欣賞嘅音樂人,仲係multi-talented嗰種,由音樂、電影、電視,到o依家踏上舞台演出舞台劇,確實令人期待。「好似伍姑娘話齋,舞台劇冇得NG,所有互動都係即時。就算拍劇我都未同呢個『老婆』合作過,所以o依家就藉住排戲建立默契。劇入面我係一個好怕老婆嘅人(伍:「乜現實生活唔係咩?」),係互相尊重!

「就係因為怕老婆,我個角色會誘惑隔籬屋嘅人妻出軌,而嗰個人妻就係江美儀嘞。現實中我就冇出軌嘅需要啦,我同我老婆拍咗拖12年,結咗婚都就嚟7年,咩癢都冇啦!」

四季興隆($475)係尖沙咀分店限定菜式,用料包括22頭湯鮑、蜜汁叉燒、涼拌海蜇同麻辣拍青瓜,包羅萬有。

黑魚子香杧貴妃蝦球($360),酸甜醬汁襯托蝦球鮮味,加上黑魚子,製造更多層次。

錦繡玉鴛鴦($228)係變奏版撈起,有杧果、海蜇、油炸鬼,別具風味。

積極排練

哈哈哈!豹哥婚姻生活美滿,啱啱度過46歲生日嘅伍姑娘,一樣咁幸福。「我係求婚嗰個嚟o架,嗰時我覺得我老公好啱我,咁就唔好等啦,o依家我哋結咗婚差唔多16年,最緊要係互相畀足夠空間對方,咁就冇問題嘞。」

舊友聚首,笑聲不絕,唔使我多作介紹,你哋睇到啦!

伍姑娘(中)同豹哥(左)近日積極排練。

行姐喺劇中勾引天經,但原來對女方嚟講係高難度動作。

o依家伍姑娘同豹哥積極為舞台劇排練,另一半都予以支持,同劇仲有佢哋嘅「前輩」天經,一樣有另一半嘅支持。「唔算係前輩嘅,雖然我之前有演出舞台劇嘅經驗,但係今次同豹哥、伍姑娘、行姐、美儀,林嘉華等等新對手合作,有唔同嘅火花。今次我同行姐嘅對手戲最多,佢要不停咁勾引我,不過我喺劇入面係一個書呆子,所以對佢嘅動作都冇反應。」

年年有餘($48)係奶皇金魚餃,造型精緻。

年青力壯($48)係蓮藕發財粿,皮薄餡靚。

皇牌叉燒鴛鴦拼($158)用上日本豚肉(後)同本地豬肉(前)炮製,各具特色。

三星拱照($48)即係鮑魚北菇燒賣,以南非鮑魚製作。

富貴牡丹酥($48)以精巧手工製作,蓮蓉甜而不膩。

勾引朝偉

睇行姐外形,唔少人都會有覺得佢好open嘅錯覺,原來佢都有「失敗」經歷。「可能啲人睇我外表就有咁嘅感覺,連搵我拍戲嘅人都係覺得我好叻勾引人,好耐之前有導演搵我客串一部電影,就係要我勾引梁朝偉,但係我NG咗好多次,最尾一次導演話:『OK!收工啦!』

「拍嘅時候我已經覺得好唔好意思,到部戲上映,我發現我拍嗰part冇咗,我諗我嗰日嘅表現好差,連朝偉都激發唔到我勾引人嘅演技……」

哈哈哈!有經驗加上有新對手嘅衝擊,相信行姐喺舞台劇嘅演出唔會令人失望。我預祝《嬉春酒店》good show!乾!

我同一眾嘉賓與總廚陳師傅合照留念。

翠亨邨

地址:九龍尖沙咀彌敦道132號美麗華商場5樓
電話:2376 2882