為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2015 年 01 月 27 日

關慧玲

《東周刊》社長兼總編輯。

杯盤狼藉的一餐

這一餐真經典,八道菜跟十多種酒,桌面擺滿近百隻酒杯,杯子隻隻形狀不同,一道菜呷一至兩啖酒,紅酒白酒香檳清酒乜都試勻。席間九成以上係專業品酒師,個個揸住隻杯搖搖吓,講酒講到面紅耳熱。

今年對香港專業品酒師協會別具意義,原來佢哋已經成立了二十五年,今年銀禧梗要搞大佢。副主席陳怡和(上圖)見證香港品酒普及化,可說感觸良多。他在瑞士唸酒店管理,讀書年代已愛上品酒,十多年前加入呢個業界平台,那時邊有咁多人識餐酒?就算酒店高級餐廳,酒類選擇也不多。佢記得早年香港經濟起飛,識歎的人多數飲威士忌、干邑之類,餐酒未入流。

佢哋個會本來係業內人士的交流平台,九六年正式成為國際品酒師協會地區會員,睇埋內地和澳門運作。另一個里程碑,就係○八年香港政府取消紅酒入口關稅,餐酒平咗,品酒文化急速普及,吸引好多入口商,開始有賣酒的地舖出現。陳怡和話這些年多咗大批人成為酒粉,對紅酒知識有增無減,佢哋於是開放畀非專業人士入會,o依家呢類會員佔總數成三分一咁多。

陳怡和話餐酒近年選擇多元,價錢不貴十分抵飲。想提升品酒層次,可以試吓集合佢哋十多名品酒師智慧,設計出一套八隻不同形狀的酒杯,用來配不同類型的酒。陳怡和話係第一套亞洲設計,酒杯底有暗坑紋,搖杯時能令酒釋出更完美香味同品質,而杯口微微向外傾斜,令酒滑入口時更順暢,筆者係外行人,聽到咁講究都不禁嘩一聲。

品酒是種好生活,近年餐桌文化逐漸成形,而香港餐酒銷售每年都有不錯的升幅,根據Euromonitor International的報告,一三年香港葡萄酒銷售額為四億幾美金,銷售量為一千三百多萬公升,比五年前分別上升了四成幾和兩成幾,報告更預測一三至一八年期間,銷售額年增長率將為百分之二點八。由於歐洲大部分地區葡萄酒飲用量停滯不前,亞洲自然成為全球業界目光,香港品酒文化發展比較成熟,不難成為焦點。

協會今年頭等大事,係第一次爭取到在香港舉辦亞洲太平洋區品酒師大賽,喺二十五周年舉行咁重要大賽,相當有意思。