為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2015 年 01 月 18 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

滾得誘心人

踏入2015年,港產電影繼續百花齊放!今次「Paco巨星飯堂」,率先邀請即將上映嘅《小姐誘心》,台前幕後一眾精英:監製兼編劇葉念琛、女神劉心悠、姜皓文(黑仔)、莊思敏(Jacquelin)同麥子樂(Brian)。人才濟濟,我就帶佢哋去到位於灣仔嘅「金牌海鮮火鍋」,歎住頂級嘅火鍋同特色正宗嘅潮州菜式,連探討男女關係都特別有feel。

今日我同Brian、Jacquelin、阿琛、心悠同黑仔(左至右)去到位於灣仔嘅「金牌海鮮火鍋」,以與別不同嘅多元火鍋料理,襯托佢哋嘅新戲。

女神的突破

葉念琛一向對愛情都有特別見解,從佢嘅作品大概都可以睇到,今次阿琛再有一番都巿愛情論,仲導而優則監,導演一職交由新導演黃柏基擔任,以編劇、監製嘅身份去表達婚姻要有心計,先可以天長地久嘅訊息。「今次係主要講婚姻,心悠嘅角色係非佢不可,劇本係為佢而寫,講一個女人為咗愛可以好盡,所以我同佢講個故事嘅時候,已經咁樣同佢講。

「喺戲入面心悠同周柏豪係一對年輕夫婦,有場戲講心悠飾演嘅阿寶,為咗畀個驚喜老公,就玩埋校服誘惑,又苦練一part舞,只係因為佢想生BB,所以佢好落力排練。」

阿琛同心悠再度合作,已建立互信同默契。

我睇咗電影嘅預告,心悠竟然同周柏豪激嘴牀戰談性經?完全突破女神形象,佢坦言今次係豁出去嘅嘗試。「我喺戲中飾演一個喺旅行社返工嘅平凡女仔,同柏豪青梅竹馬,畢業後就結婚,覺得結婚最重要嘅任務係生BB,所以個角色就好認真咁去plan生BB,仲用咗好多方法去表現佢有幾咁認真。

「第一次同柏豪合作,我覺得同佢好夾,感覺就好似真係甜蜜小夫婦。啱啱阿琛講嗰場戲,都係我最難忘嘅一場,因為我個角色雖然跳得唔係好叻,但如果我係個老公,都會feel到個老婆好愛我,都幾感動o架。」

我特別推介呢個手工蟹皇餃(6件$138),落足料炮製,蟹香四溢又juicy。

濃湯魚鍋($208)味香濃,有家嘅味道。

手切本地肥牛(小$288/大$368),脂肪及肉分布均勻,入口即溶。

金牌牛骨鍋($228)係必試鍋底,味濃郁又多料炮製。

演繹性上癮

除咗心悠同柏豪,戲中另一對夫妻係Jacquelin同黑仔,黑仔係電影中最艷福無邊嘅角色,原來係有原因嘅。「我喺戲入面嘅角色有性上癮,無時無刻都有性需求,於是就開咗間娛樂公司,搞公司嘅model,所以好多動作場面。同Jeana、Jumbo都有,同Jeana嗰場要拍車震,嗰時成30幾度,因為收音架車又唔可以開冷氣,鏡頭前又要做到好enjoy咁,其實又辛苦又熱。」

黑仔七情上面,逗得心悠笑聲不絕。

心悠表示同柏豪雖然係首度合作,但相當愉快。

哈哈哈!黑仔嘅「艷福」並唔係個個都消受得到,佢其中一位對手Jacquelin,就同黑仔一樣咁專業。「我同黑仔第一日開工,就已經要拍牀上戲,嗰日喺酒店tea,tea完導演就話嚟嘞!開工前我同黑仔都沖晒涼刷晒牙,不過黑仔知道我未拍過啲咁激嘅牀戲,仲要大家第一日開工就拍,都有啲尷尬。」Jacquelin另一個對手,係Brian,都係事前未拍過同類型嘅親密戲份。「呢啲嘢係喺屋企、房入面做,但o依家對住好多人做,都會有啲尷尬。事前我喺化妝間,同Jacquelin講咗可能會唔小心掂到佢嘅重要部位,同佢講唔好意思先,佢話:『唔緊要,你為部戲啫。』我覺得佢好好,會令我冇咁緊張。」

Brian同Jacquelin喺戲中有激烈親密戲,兩人都專業處理。

美食當前,心悠都心動,要以特大嘅碗去品嘗佢至愛嘅火鍋。

各有各口味

專業嘅好演員梗係以部戲為先,今日我同一眾好編劇、演員共聚,「滾」以外都要公開佢哋嘅「滾」口味。平日嘅心悠既靚又fit,但一講到食火鍋,佢即時要求一隻大碗。「除咗要混醬料之外,我好鍾意飲火鍋嘅湯,係就係肥啲,但係啲湯有晒所有配料嘅精華,飲咗先減啦!」

阿琛就話:「我好鍾意食牛肉,打邊爐一定要有牛先得!」而Jacquelin同Brian就異口同聲表示:「麻辣就最正!連菜都有嗰種麻辣感,就最刺激到味蕾。」

黑仔就表示:「我打邊爐一定點藥材湯底,夠晒滋補;配料就主要係菜。」

五位雖然各有喜好,但係一合作就迸出火花。我預祝《小姐誘心》成功!乾!

火鍋以外,餐廳仲有正統手工菜及潮州菜,包括呢個古法金錢雞(6件$88)。

午市又有點心,例如圖中皮薄餡香嘅雲南羊肚珍菌餃($52)。 

正宗潮菜有呢個甜酸粿肉($98)。

原籠糯米蒸花蟹(時價),要品嘗記住預訂。

荷包白鱔湯($98/位)清甜潤喉。

雪山杏汁包($42)香軟滋味。

山東棗皇糕($32)選用山東紅棗製,夠講究。

金牌海鮮火鍋

地址:灣仔灣仔道223-227號1樓及2樓

電話:2407 2228