為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2015 年 01 月 17 日

有一種心態,叫放開 張可頤

張可頤主演的港視劇集《來生不做香港人》,播出以來口碑載道,其港女角色「An霸」,深入民心到連鯉魚門海鮮檔的街坊們都識。

「嗰日去鯉魚門食海鮮,我一路行,啲人就一路大嗌『An姐』、『An霸』,佢哋有好多仲係着住對水靴撈海鮮嗰啲師傅、酒家老闆同啲廚師!我以為網上電視只係我哋呢一代,或者啲後生仔先會睇,估唔到佢哋都咁潮咁貼喎,真係好感動o架!」

因為「An霸」再次備受注目,衍生出來的,就是成為娛樂雜誌的封面人物,一時說張可頤dry足三年,情路茫茫;一時又拍到她,搭上比自己後生八年的中法designer新歡Leonard……大家都似乎很關心四十五歲的她,感情有冇着落。

「我好鍾意我o依家嘅生活喎!我單身、未婚得嚟,都好滿足、好enjoy喎!反而你話畀個男朋友我,要我三百六十五日守喺香港,同佢日對夜對咁……嘩!我咁仲死!我唔得咁o架!

「同埋,我有我嘅信仰同信念,無論係我嘅工作或者感情,我真係相信上天自有安排,如果我隻手握得太緊唔放開嘅話,係攞唔到更多囉!」

畢竟,她在娛樂圈打滾了廿多年,又經歷過人生的高低起跌,來到這個階段,放開,才是她最舒暢的心態。

高峰

張可頤查實跟娛樂圈很有緣。在她還未夠廿一歲,已被徐克和陳慧琳經理人鍾珍發掘,參演過《英雄本色3》,也客串過處境劇《卡拉屋企》;其後也以組合「PP Gals」名義出過唱片。九三年曾一度轉職金融界,但九四年卻又因為參選港姐再次入行,一拍劇,便廿載。○三年當上雙料視后,正是她事業高峰之一。

我諗娛樂圈好多朋友都試過,當運氣一嚟嘅時候,好多嘢真係推都推搪唔到!

○三年嗰年,無疑係有好多好多嘢發生喺我身上,好多嘢推住我嚟行,唔係我去主動做出嚟。無論工作好、金錢好、名利都好,各樣嘢都係咁,一切順風順水,我諗,我嗰陣係運氣最好嘅時候。

張可頤參選港姐前,曾參演過《英雄本色3之夕陽之歌》,飾演「阿玲」一角,當時的她還未到廿一歲。

嗰年啲錢搵得好快、好方便亦都好容易,然後我着慣、豪慣、食慣、玩慣,忽然想發洩起嚟,一次過買十幾廿萬嘢都冇問題,最緊要開心!因為我做得咁辛苦,都只想獎勵吓自己。不過一切都係來得快又去得快,而且個人好空虛,漸漸我發覺,原來當人擁有太多嘅時候——我唔係話嗰陣我有好多,而係多於我基本需要,就會有好多好多問題同煩惱,一陣要諗吓嗰度要點投資,呢度又要搞啲乜,個人根本瞓唔到覺!好嘞,買咗,唔緊要,但就不停有好多好多問題同煩惱嚟搵你囉!

o依家我當然未致於話放晒我所有嘅投資,但係太吃力嘅,我唔會再上身囉,我o依家但求食得好、瞓得好,健健康康就夠OKo架啦。

一二年跟陳豪合演的《天梯》,是她在無綫廿多年來的告別作,亦是她的代表作之一。