為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2014 年 12 月 24 日

田少鋪路助直選 林大輝入自由黨接班

自由黨同代表廠商會嘅立法會議員林大輝「戀情」,喺政壇流傳咗大半年,最近終於好事近,大輝好快會正式加盟自由黨。剛接任自由黨主席的鍾國斌放風話,如無意外,明年一月林大輝有機會入黨,但要「擇個吉日」。

田北俊較早前辭去自由黨黨魁,黨領導層上周「大執位」選出新黨魁方剛、黨務主席位則由鍾國斌擔任、再加多個副主席邵家輝。不過,大家更關注嘅係林大輝動向,將來佢會喺自由黨擔當甚麼角色,方剛、自由黨又用乜友情牌最終打動大輝入黨?

據自由黨一名核心透露:「大輝最關心嘅係二○一六年他在立法會仲爭唔到爭議席,佢來屆肯定唔會再選廠商會功能組別,只得直選呢條路,自由黨願意全力幫佢喺新界東直選鋪橋搭路,令佢最終答應入黨。」

林大輝(左)與自由黨理念相近,在立法會內,他經常與田北俊(右)互相交換對政策議題的意見。

據了解,自由黨開出條件的確令大輝難以拒絕,先是重點投放地區資源落新界東,現時該區已有三個地區辦,未來會陸續增加資源,令大輝將來有更穩固地區根基打直選戰。

新界東係鄉議局地頭,鄉紳動員力亦好影響選情,據講身兼自由黨中委的上水鄉事委員會主席侯志強亦拍晒心口,保證一定總動員抬轎,增加大輝的勝算。

該名核心說:「田少現時仲未清楚表態幾時會全退,但一六年佢已近七十歲,真係幾難再戰江湖,佢近期亦私下向人表示願意退居二線為新人抬轎,如果由佢拍住大輝參選新界東,相信一定可以贏一席,大輝冇理由拒絕好意。」

田北俊(中)退任黨魁由方剛(左二)接任,周梁淑怡(右)亦退任主席之位由鍾國斌接棒,但只屬過渡性安排,林大輝入黨後,料有更重大的人事更替。

據了解,有消息更指直選之外,林大輝入自由黨另有重任,就是從田北俊手中全面接下自由黨。

知情者說,自由黨黨內現時根本無人願意、亦無能力接田北俊班,方剛、鍾國斌擔任黨魁、主席之位,只屬過渡安排,林大輝入黨後再贏得新東直選,如無意外他將成為下一屆自由黨的新話事人:「自由黨唔少人都接受林大輝,覺得佢理念、能力都可以擔大旗,更重要嘅係佢性格圓滑,唔會好似田少咁少爺脾氣,大輝同各方各派都有商有量,據講連中聯辦亦睇好大輝入自由黨,預示自由黨未來一次改朝換代,大家都好注目。」