為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 財經拆局 2014 年 12 月 24 日

陸羽仁

人氣財經作家,在《頭條日報》、頭條網、《巴士的報》撰寫專欄,網上點擊率高達一億一千多萬次,現時是《巴士的報》社長。著作有《股俠創富》及《鱷口偷金》。

油價暴跌搵食之機

每逢有投資產品價格狂升暴跌,其實都是搵食機會,好似隻比亞迪(1211)咁,上星期四股價暴跌,如果你夠膽低撈,星期五已經可以食胡走人。不過呢個世界喺投資產品暴跌時入市,就好似見到天上有把刀跌落來,你要接刀一樣,都要有馬戲團魔術師的身手,要接住刀柄唔好接住刀刃,先至唔會割損手,有一定難度。

近日跌得最勁的是石油,當大家睇到下跌時的恐怖,亦製造一定投資機會,問題是能否捕捉得到。油價真係跌到驚人,紐約期油在今年六月見高位一零七美元,跌到低位五十四元,上周五反彈番上五十七美元,最近三個月咁樣大插,所有大位完全跌穿,拖住一眾油股氣股急插,是非常戲劇性事件。

當大家睇到油價下跌時的恐怖,亦製造一定投資機會,問題是能否捕捉得到。

油價大跌搞到出口石油為主的國家如俄羅斯陷入金融風暴之中,盧布匯價一個月跌三成,搞到一日要加息六點五厘,頂住匯價,都唔好話唔傷。油價下跌原因主要有三個說法,第一個說法是供求失衡,由於美國發展新技術大力開發頁岩氣同頁岩油,令全球原油供應增加,另一方面歐洲中國經濟發展放緩,令原油需求減少。在供應增加,需求下降情況下,造成油價大跌的底因。第二個說法,美國同俄羅斯在烏克蘭問題上大打出手,美國聯同歐洲制裁俄國,睇住普京呢個沙皇,賺咁多油元,也文也武,美國真係好大動機,整低油價夾一夾佢。

第三個說法係石油出口國組織,由於唔順美國油公司開發頁岩油挑戰油組價格壟斷地位,所以油組見油價下跌仍然唔同意減產,只為隊低油價,希望夾死頁岩油生產商,減少供應。我愈來愈感覺到美國要藉推低油價削弱俄羅斯,這個陰謀論,愈來愈像真。因為市場上有個傳聞,好多美國油公司做了在九十美元價位的石油認沽期權,對沖石油下跌的風險,呢啲期權未到期之前,油公司唔會蒙受重大損失。

中海油現價比一年高位跌了百分之三十六,但現在入市或者急咗少少。

狂挾俄國 未跌得夠

美國出招這個陰謀論似乎好圓滿,俄羅斯在烏克蘭也文也武,美國想郁佢,所以想推低油價。而明知推低油價會令美國石油公司受損,可以事前放晒風,叫油公司買認沽期權來對沖,所以暫時未見到油公司倒閉收場。估計油價下跌的真正原因,不是為了吹水,而是不同原因下跌會影響下跌的時間與幅度,愈多政治陰謀在背後,就愈係唔好預計件事好快平息,如果係油組挾美國油商,油價跌浪會完得快啲。但係如果係美國出手挾俄羅斯的話,可能仍未收夠籌,因為俄羅斯未夠傷。

最近有幾條新聞,一條是奧巴馬簽署命令,進一步制裁俄羅斯,另一條新聞就係俄羅斯總統普京召開記者會,指油價可能再跌兩年,而俄羅斯會大力支持盧布。如果美國對俄羅斯稍有惻隱之心,都唔會呢個時間踢佢一腳,簽署法令制裁佢。如果普京唔覺得美國要長期玩佢,亦都唔會放一個要打兩年的氣球出來,睇嚟大家都預咗會有連場惡鬥。仲有一單,俄羅斯話邀請北韓領袖金正恩明年訪問俄羅斯,這是金正恩首次出訪,現在美國正因為指控金正恩搵人攻擊拍片諷刺佢的Sony公司,和北韓玩針對,俄羅斯就公布請金正恩到訪的消息,美俄玩得幾勁,可見一斑。

我就睇好美國,因為佢唔係善男信女,大力隊低油價,雖然要自己油公司面臨一點損失,但可以挾死俄羅斯、伊朗同委內瑞拉等和美國唔friend的國家,搞到佢哋一頸血,甚至政權不穩,真係殺人於無形。

我覺得油價急跌三個月,雖然夠急,但時間尚短,對俄羅斯等國災害唔夠深,如果可以玩長啲,如玩多三個月,隊深啲,例如唔係五十四、五十五蚊,隊到三十幾蚊,俄羅斯經濟好大機會見血,我覺得如果呢個陰謀論成立,係需要深度傷痕,令俄羅斯長時間難以復原,甚至挾到俄羅斯就烏克蘭問題上面,對歐洲及美國讓步,美國先會收手。

海油下插 還有空間

你要記住呢個係陰謀論,真係靠估,你信住三幾成好啦。因為油價已經跌到五十四蚊,一啲都唔貴,你覺得無乜嘢,o依家就可以開始買油股氣股。例如隻中海油(0883),上星期五收十元一角二仙,已經比一年高位十五元八角八仙跌了百分之三十六。有些人說唔好咁貪心,好難搵到最低位,愈跌愈買就得,呢個都係方法。不過我直覺覺得,件事無咁快完,睇番中海油現時股價,當然是一○年以來低位,但睇番前少少,○八年金融海嘯時,中海油曾經低見三元八角三仙!當時油價亦急跌中,由○八年高位一百四十七蚊跌到○九年頭最低見到三十五蚊美金。我估好難再見到中海油跌到三元八角三仙,但現在十元,再跌多兩至三元,一點都不奇,若從高位跌一半,都要穿八元,還有向下回落的空間。所以我覺得現在入市,或者急咗少少。

如果前提係啱,結論多數係啱。如果拖耐啲,等油價跌深啲,俄羅斯流血流多啲,見到一啲較大的事態變化,例如俄國對烏克蘭問題向美國讓步,或者油組決定減產,到時追入都未遲。入得太慢,可能未必買到;但如果入得太快,如果油價仲連番急跌,入齊貨,仲見到股價向下急插,會覺得好痛。所以呢個世界,點樣撈底接刀,真係一種藝術。