為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2014 年 12 月 22 日

關慧玲

《東周刊》社長兼總編輯。

曾智華快樂酒

上期本刊出了曾智華的人訪,好多人有迴響,見佢一輪嘴由張敏儀張文新車淑梅講到去董建華李澤楷陳志雲,個個都評價,好多人睇完都話「嘩,佢寸得起」。

聽訪問佢嘅同事講,曾智華口水多到浸死佢咁滯,前後傾咗三次,次次兩小時,不過佢真係口若懸河,如果有一日唔畀佢講嘢,佢應該會癲。

曾智華話口才嘅嘢係天生的,自細已有表演慾,不過香港教育制度唔適合佢,會考光晒頭,一科C都無,全部DEF,走去讀新法書院,讀完一年考入羅富國師範學院,貪佢校舍靚。面試時考官問佢為何讀教育學院,佢話自己「好鍾意將知識同人分享」,一句就打咗考官,收咗佢。之但係讀完兩年又無出來教書,去咗邊呢?原來佢屋企家境好轉,畀咗一萬蚊佢去美國讀書兼闖蕩。

當時邊有o依家的家長做咁多資料搜集,佢只係見到一間大學叫夏威夷大學,心諗有女郎,有沙灘,好喎,其實諗住去玩,再諗前路。誤打誤撞原來呢間大學有得修讀講嘢,讀一科Speech,縱然英文唔係母語,但佢好有天份吸引同學注意,出去就手舞足蹈講李小龍,結果都次次攞A,佢發覺自己好易捉到人鍾意聽乜嘢,原來齋talking都掂喎,之後再進修Major Speech,內容教埋電台電視製作,不必用筆考試,開正曾智華強項。

跌跌撞撞,直到大學佢至搵到適合自己的路,人生開竅。回港後一直靠把口搵食,一出來做嘢已日做十八個鐘,既喺TVB做助導,放工後就去港台做通宵DJ,鐵人一樣,收入又雙倍,覺得好過癮。

不過,人不是機器,長年高壓下總有斷電時,佢從不介意講自己患驚恐症,好番之後經常講患病經歷。佢話兩個月前房署一個月內有三個職員跳樓輕生,懷疑係抑鬱症,佢哋即刻諗起有相關經驗嘅佢去講嘢;之前佢幫過多人,例如林建明,不過有的太遲搵佢,有個好出名嘅電視製作經理,同佢傾咗一個星期,就喺屋企吊頸死了。所以佢話,上天令一個咁鍾意講嘢嘅人得呢個病,好似係一個使命要佢幫人,所以佢講得就講,從不吝嗇。

佢接觸嘅圈子,不論藝人、明星、司儀,全部都係高壓種類事業,一進入狀態就腎上腺素上升,將自己push到盡,落台就謝晒皮,所以頂唔住崩潰的人好多。以前唔識咩叫情緒病就藥石亂投,o依家知道有得醫,就不用太困擾。

佢仲有個小習慣,就係中三開始好杯中物,曾經日飲一支紅酒,後來食藥停飲一段時間,o依家淺嘗就夠,佢呷住杯啤酒做訪問,話飲少少令佢快樂,可以放鬆心情傾偈;人生去到呢個境界,飲杯小酒快樂一下,何妨?