為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2014 年 12 月 28 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

星聲雙惜

一把好聲音,我又點會唔公諸同好?講緊嘅係J. Arie(雷琛瑜)。無可否認,聽J. Arie個名已有深度,原來佢每隻碟嘅碟名都好有心思,唔係話特登用啲大家唔知點讀、唔明意思,其實係想大家去了解。所以今次「Paco巨星飯堂」,我就邀請佢同監製藝琛,細說佢嘅新碟《Psyche Voice》。

我特別挑選位於灣仔嘅「Palco Ristorante」,罕有地同兩位貴賓喺午間相聚,品嘗呢間用心炮製菜式嘅餐廳,新出一系列物超所值嘅午餐。兩者都係水準之作,今日就嚟一個惺惺相惜!

我帶了J. Arie同藝琛品嘗「Palco Ristorante」嘅星級午餐。

J. Arie新碟《Psyche Voice》,極具意思。

拍MV都落足誠意,音樂係要用心製造。

心靈之音

首先要恭喜J. Arie!所有歌迷、佢嘅忠實擁躉期待咗超過一年,J. Arie第二張專輯,一定要推介吓。佢係近年年輕一輩嘅歌手中,值得推介嘅一位,因為現場演繹去聽,同經CD或手機去聽嘅歌更真實,佢亦唱得更好,所以一定要推崇唱得好嘅歌手。

「多謝多謝!我先講碟名《Psyche Voice》,Psyche係古希臘語,係解心靈、靈魂,Psyche Voice成個意思係心靈嘅聲音,希望藉住呢張碟九隻歌,可以無論喺melody或歌詞方面都可以扣住呢個主題,可以探索每個人嘅心靈同心聲想講乜嘢。

「歌就講吓《姊妹花》,首歌係Paco你揀,我第一下會聽到韓國嘅原創Demo,成件事即使我唔知佢韓文歌詞唱乜,但個melody已好感動我,係非常之好,火火填咗一個好戲劇性嘅故事,講述兩姊妹因愛情而令關係破裂,但主題就係喚醒我哋要去珍惜,每個人都有一份好珍貴嘅友誼要好好珍惜。」

三道菜午餐價只係$168+10%服務費,前菜包括意式炒鮮魷魚沙律、海鮮汁煮花甲同大蒜薯蓉湯配煙三文魚(上至下),三選一,而且菜單會不定期更換,保持新鮮感。

心繫拉闊

要珍惜嘅仲有好似J. Arie咁嘅一把靚聲,透過佢嘅拉闊演繹,我都要講解畀年輕嘅小朋友知道,大家習慣用手機、iPad上網,嗰啲Digital嘅聲,其實係經過修飾,去睇演唱會,聽真嘅表演,其實分別好大。所以,今次J. Arie嘅專輯有一大特色。

「其實我們真係好鍾意Analog,所以無論係Vocal定係instrument,都會經過一個Analog程序,希望可以攞番以前嗰種質感,大家都覺得好Legendary嘅時代,我同藝琛都希望可以加入呢方面嘅元素。

J. Arie潛質優厚,啱晒我愛才嘅作風。

藝琛向我推薦J. Arie呢把天籟,佢哋亦師亦友。

「仲有今次隻碟同上隻碟唔同嘅係,其實自己諗嘢一向好acoustic,因為彈樂器都係彈琴彈結他,所以創作都係朝住呢方面,今次就會諗有咩元素去玩會有新衝擊?所以就加咗〈姊妹花〉、〈出發點〉,入面有啲POP Rock元素;另外仲有GJ(蔣卓嘉),我哋公司另一位新Artist所寫嘅兩首歌:〈心魔〉同〈你的愛是甚麼形狀〉都好值得去聽。我覺得今隻碟比上一隻碟聽落去,成件事更加精神有活力,成件事幾豐富嘅。」

主菜有野菌芝士自家製菠菜闊條麵配黑松露油、香煎鯖魚配水瓜柳香草魚汁,同輕煎紐西蘭龍蝦仔意大利飯,任君選擇,款款足料炮製。

香蒜辣椒炒意粉($128半份/$238一份),係我嘅favourite,材料愈簡單,愈顯出廚師功架。

每日甜品都由廚師精心炮製,天天新款。

物超所值

J. Arie一面講,藝琛一面點頭,再補充:「其實o依家好少公司肯投放咁嘅資源,去做一隻全真實樂器嘅碟,多數用電腦處理,但Paco覺得Music is Live,要好真實嘅,好支持音樂。」

哈哈哈!要做,就一定要做到最好!好似J. Arie,o依家已經唱而優則演,不斷增值。「近排都拍戲,好像o依家呢個時間,但其實我今朝八點先收工,所以其實音樂係自己好鍾意好鍾意外,希望音樂之餘,可以作多方面發展,就睇吓電影方面可唔可以。」

好!咁我哋就拭目以待,先品嘗五星級超值午餐,再展望J. Arie喺2015年,拍翼高飛!

今次藝琛全力製作J. Arie新碟,功不可沒。

Palco Ristorante

地址:灣仔盧押道23號The Phoenix 2樓

電話:2618 8383