為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2014 年 12 月 16 日

關慧玲

《東周刊》社長兼總編輯。

又回到最初的起點

香港專業進修學院獲批准成為第十九間可以頒授學位的院校,喺港專學院正式成立儀式上,見到港專校長陳卓禧,同網上新媒體巴士的報社長兼總策展人盧永雄鬼咁老友,細問之下,佢哋都係中大新聞系同屆同學。

陳校長和盧社長都係八五年畢業,大家同一個起點,前者做咗一陣傳媒後轉入教育界,做港專校長十幾年;後者一直在傳媒界,做過報紙、電視、之前係星島集團嘅行政總裁,前年身痕,棄高薪厚職出來搞網絡媒體。

盧永雄(二排左一)和陳卓禧(後排左四)各有成就,佢哋呢屆仲有另一個猛人,就係o依家星島集團行政總裁蕭世和(前排右一)啦。

陳卓禧曾在無綫做專題,佢同筆者話仍然好掛住當記者的日子。不過做記者嘅靈活多變和高度敏銳亦都幫到佢,記得一二年特首選舉時,有新聞觸覺嘅陳卓禧,嗱嗱聲請兩位建制派候選人唐英年和梁振英到港專講talk,嗰次係兩人參選後初次埋身肉搏,得到高度注視,外界對港專自然加深了印象。

港專前身係勞工子弟學校,比較基層,喺香港教育界備受忽略,十多年前換上陳卓禧後,既擴充校園又升格做私立院校,唔簡單也。陳校長做事沒甚麼框框,作為親中色彩濃厚、開席前先唱國歌的學校,座上他請到的嘉賓既有建制派的,亦赫見民主黨主席劉慧卿,原來佢膽粗粗發英雄帖,卿姐卻又十分畀面,所以話夠膽博,往往會有意外收穫。

至於盧社長,當年在星島時期,係香港報界最年輕總編輯,之後做埋成個集團CEO,年薪千萬,做記者做到咁,認真巴閉。

對呢位前輩,筆者好記得佢講過一個故事。佢八四年喺《星島晚報》暑期實習時,被採主指派搵滙豐大班沈弼,問幾句關於銀行公會議息一事。盧永雄衝口問:「電話號碼?」採主話:「問一○八(電話查詢)」。

呢個傻仔於是真的由一○八搵起,經公司總機駁入去沈弼辦公室,諗住一定畀秘書小姐擋駕,咁就可以收工。點知沈弼竟然親自接電話仲同佢傾咗半個鐘,呢位無名小子就咁做成滙豐大班嘅獨家訪問,令不少資深記者眼紅添!

佢成日講呢個古仔,係同後輩講不要假定甚麼可以做,甚麼不可以做,哪個唔怕面懵,夠膽去博,就係採訪成功關鍵。

兩個資深傳媒人,走的軌迹不同,三十多年歷練,各有所成,原來成功方程式離不開膽大心細面皮厚,回看大學時期兩張青澀的臉,別有感受。