前主播王麗珠幫阿甘之前，曾應徵做阿Paul助理，白姐姐三度面試，結果冇請。

白姐姐

阿Paul（謝偉俊洋名）靚仔又有才華，屬冧死女一類，個人又好感性，發生桃色事件嘅機會率相當高。今次令甘乃威周身蟻嘅女助理王麗珠，原來曾與阿Paul擦身而過，差一步就做咗佢嘅女助理，但機緣巧合，最後冇成事，否則男主角可能係阿Paul而唔係阿甘。成個過程，白姐姐都有參與，都幾有趣。

話說阿Paul當選立法會議員冇幾耐，要請一個女助理，過往佢請女職員，都先由白姐姐做第一round面試，過到關至由佢做最後決定，呢次當然亦係咁做。白姐姐interview過幾位見工女士，其中之一就係王麗珠，白姐姐覺得呢位小姐對眼水汪汪幾靚女，亦識做人處世，如果做咗阿Paul助理，可以令選民（特別係男士）開心，應該幫到阿Paul，所以畀王麗珠晉級，其他候選人淘汰咗大半。

第二次面試亦係單獨見白姐姐，阿Paul冇在場，大家再傾深啲，白姐姐對佢嘅印象依然幾好，準備安排佢同阿Paul見吓面，由阿Paul作最後決定。

就喺呢個時候，王麗珠原來已成功獲阿甘取錄做女助理，好心急想阿Paul快啲扑槌，於是透過阿Paul一個近身老友，約阿Paul直接見面食餐午飯，當係最後面試。由此可見，佢嘅第一選擇係阿Paul而唔係阿甘。

約實時間後，阿Paul可能唔想自己作主，特別搵埋白姐姐一齊到場。是日也，王麗珠帶晒履歷同做譚香文助理嘅「作品」到場，講得頭頭是道，但佢離開後，白姐姐就同阿Paul講：「呢位小姐性格都幾急進，同你嘅性格唔係好夾喎！」佢亦同意，話人哋已經搵到工，唔好再阻住佢啦。結果王麗珠同阿Paul無緣共事，去咗阿甘嗰邊。

阿Paul（謝偉俊洋名）

唔請非因佢靚女

本刊記者就此問白姐姐：「你係咪因為人哋靚女，驚阿Paul動情，所以唔建議請佢呀？」

白姐姐斬釘截鐵回答：「梗係唔係啦！以前我幫阿Paul嘅律師樓請職員，好多係靚女，嚟過律師樓嘅朋友都知，有個政圈人物仲講笑話會借啲意上嚟蒲睇吓靚女添！」

阿甘單嘢爆出，成為城中熱話，阿Paul當然第一個知道嗰位「女助理」係邊個。佢份人向來心軟，見到王麗珠被人欺負，落難陷困境，忽然生起「請番佢」嘅念頭。阿Paul就問白姐姐，人哋咁慘，我哋應唔應該請王麗珠做助理？白姐姐反問：理由係乜？佢回答話：雪中送炭囉！可見阿Paul係有情有義之人，不過件事正風頭火勢，就算佢出聲，對方亦唔會諗住。

講開阿Paul，佢周日在香港電台發表一篇《給香港的信》，大談男人情慾，話雄性動物有繁殖慾望，本性渴望「外遇」，所以好容易墮入桃色陷阱身陷危機。

阿Paul呢封信，相信係發自內心之作，聽講阿甘事件對佢好有啟發，更加知道男人若失控，分分鐘闖禍，阿甘只不過溝吓女啫，都搞成咁，如果再進一步，咪好大鑊？

問白姐姐點睇呢封信，佢答得幾妙：「阿Paul知道自我約束，梗係好事啦，不過男人唔可以淨係靠硬性控制，壓抑自己就好似壓力煲咁，始終會爆，咁就出事啦。所以男人應該想多啲對家人伴侶嘅憐愛，只要有真心愛惜，做錯事嘅風險就減到零。」

阿甘求愛事件搞到佢周身蟻，原來消息曝光前四日，民主黨某中常委成員與譚香文在灣仔咖啡室密斟，與爆料時間幾脗合。

民主黨爆料疑人 曾密晤譚香文

民主黨有內鬼向《蘋果》爆阿甘大鑊，搞到佢同民主黨都周身蟻，該黨大佬亦發出「捉鬼令」，誓要揪出無間道。

呢個洩密者係乜誰，至今仍然係一個謎。但本刊收到一個可靠消息，指民主黨中常委一名成員，於報紙爆料前幾日（九月三十日），在灣仔入境處大樓附近一間咖啡廳同譚香文密斟，兩人傾啲乜，無人知，但四日後（十月四日），阿甘單嘢就成為頭條新聞。

呢位中常委成員，並非大佬級，但同某大佬屬一系，阿甘女助理於九月二十四或二十五日向民主黨最高層投訴，此事只有幾個大佬知悉，可能某人將此投訴告知該位中常委，佢就相約譚香文出嚟商量爆料策略，大家夾好裏應外合，然後由佢向報紙相熟高層放料。

實情係咪咁，仍有待查證，但從「動機」分析，去年阿甘硬要在港島出選，令某大佬失去入立法會機會，而該名涉嫌爆料人同阿甘關係亦唔多好，有理由相信佢哋會藉此事件將阿甘轟低，由於《蘋果》老闆肥佬黎一直唔likey阿甘，早就想佢收檔，要放料梗係放畀該報啦。

李慧玲在節目中轉述對王穎妤的「路邊評論」，說話好難聽，王穎妤大怒，找清洪入稟告佢一狀。

王穎妤入稟 怒告李慧玲誹謗

幫新世界鄭家純策動反擊立法會戰役嘅大狀王穎妤，周一入稟法院，控告商台《左右大局》主持李慧玲誹謗，兩個阿姐皆非等閒之輩，一場惡鬥勢所難免。

事緣純官挑戰立法會特權法敗訴當晚，李慧玲在節目中引述中環之路邊評論，講到王穎妤時，說話十分難聽，甚至係人身攻擊，王穎妤聽到後自然雷霆大怒，認為李慧玲所言已過晒火位，絕對構成誹謗，於是聘請「金牙大狀」清洪入稟高院，除咗告李慧玲，仲告埋商台，要求佢哋道歉兼賠償。

王穎妤來勢洶洶，李慧玲早前被傳媒問及此事，佢就解釋話當時只係轉述其他人說法，自己對呢啲觀點都唔同意。佢咁講都冇用，因為根據法律，轉述一樣係誹謗。

入稟狀於周一送到商台，李慧玲本來唔想出嚟接，但律師樓送件人表示會死等，佢終於現身親自接咗份writ。