淺水灣的前世今生

大家樂主席陳裕光年前把行政總裁轉給舅仔羅開光後，和太太羅寶靈拍住上，大搞特色婚宴場地生意。佢哋一三年投得淺水灣海景大樓營運權，耗資三千萬將這幢包浩斯（Bauhaus）建築活化為臨海婚宴場所。

日前，喺「ClubONE淺水灣」開幕禮上見到羅寶靈，佢笑話接手時建築物非常古舊，加上空置咗十幾年，一點人氣也沒有，但放眼望去整個海灘景色盡收眼底，發展潛力好大。她就諗既然大樓仲老過皇后碼頭，一於走懷舊路線。佢留意到近年年輕人興起去泰國、峇里等地搵特色場地搞婚禮，香港都可以搞一個海天一色靚景的婚宴場。

政府批出咗十四年合約，羅寶靈有充足時間和空間發展，加上丈夫陳裕光幫手做設計，除保留原有白色歐陸建築特色的古典外觀，內部則大裝身，間成不同大小的場地，可做婚宴、證婚或企業聚會。

陳裕光、羅寶靈（左一、二）主持ClubONE淺水灣的開幕禮。

筆者覺得最有驚喜是洗手間，整潔開揚，女士一邊以荷李活影星柯德莉夏萍做主題，男洗手間就用貓王皮禮士利。呢啲鬼主意自然係陳裕光特色，原來佢有次去美國旅行，見到有些餐廳的男女洗手間以美國前總統克林頓和他太太希拉莉做主題，啟發佢有呢個諗頭，掛在牆上嘅相，仲係佢親自揀嘅。

另一特色係大樓外設的四盞煤氣街燈，係喺英國專登仿照中環都爹利街七九年列為古蹟的煤氣街燈來鑄造，增添古典優雅氛圍。

淺水灣海景大樓活化可謂一波三折，大樓樓高三層、總面積三萬幾平方呎，喺四十年代建成，有「白屋」之稱。最初本來屬康樂用途，期間出租過畀食肆，○四年後一直空置，好多人都奇怪點解幢大樓位置優越卻缺乏發展。

原來政府○五年規劃署曾向城規會建議，將海景大樓由休憩用地改劃為綜合發展區，當時創健香港召集人司馬文帶頭大力反對，話會加重區內交通，政府短短數月收到逾千份反對書，規劃署於是收回成命，維持海景大樓原有用途。當時仲有唔少聲音，話不如用來做張愛玲紀念館，皆因其著作《傾城之戀》有提及淺水灣，討論結果不了了之，大樓也繼續空置。直至一二年，政府再搞活化計劃攞出來招標，都話政治此一時彼一時，今次招標就十分順利。

羅寶靈另一個婚宴場所西港城亦係古蹟，如今又多一個充滿懷舊風情的歷史建築，作為見證新人盟誓的場地。