為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2009 年 10 月 14 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

唔兜圈 遊花園

千呼萬喚,「金牌4周年飯局」參加詳情終於有定案,話咗預埋你,我梗係一諾千金,慢慢欣賞我今次嘅飯局,揭到P.130,你就知道點樣成為我嘅VIP!

至於今次我嘅VIP,就係「叱咤903」3位熱爆DJ——《一八七二遊花園》嘅主持鄒凱光(灘叔)、余迪偉同阿Bu(姚家豪),唔好以為佢哋會帶我遊花園,上得嚟「金牌飯局」嘅嘉賓,位位都同我句句真,絕冇兜圈!

加埋兩位喺今個禮拜分別出碟嘅Kary(吳雨霏)同Chelsea(唐素琪),今晚我哋品嘗住灘叔專程帶嚟我嘅至愛Glenlivet 21年典藏威士忌,齊齊打開天窗說亮話!

飯局金句:有vision一定掂!

今晚「金牌飯局」陣容鼎盛,有阿Bu、迪偉、灘叔、Kary及Chelsea(左至右),飯前我哋一定要乾杯happy吓,乾!

有圖為證,灘叔(左)對「金牌飯局」非常有heart,同為whisky知己,我同佢梗係惺惺相惜。

青年人夠open

今晚我揀嘅飯局地點係位於九龍塘又一城嘅「八月花」,除咗因為我聽過朋友介紹,連森美、阿Mark(雷頌德)都係餐廳熟客之外,就係為咗遷就灘叔、迪偉同阿Bu要準時開咪而設。3位紅DJ為咗嚟我嘅飯局,亦做足功課,灘叔原來係「金牌飯局」fans,佢知道我最愛Glenlivet威士忌,就連珍藏嘅Glenlivet 21年典藏版都帶嚟同我分享,哈哈哈!呢啲真係標準嘅酒腳精英,我又多咗一位好酒腳嘞!乾!

以電影起家嘅灘叔,同埋跟卓韻芝(阿芝)出生入死嘅迪偉,我相信你哋都好熟悉,至於年輕啲嘅阿Bu,我畀個機會佢先介紹吓自己先,「我喺5年前參加『商台』嘅『突破DJ訓練課程』,之後好好彩成為DJ選拔賽嘅冠軍,跟住阿芝做《五天精華遊》,再拍住迪偉、灘叔做《一八七二遊花園》。」

今晚適逢節目嘅監製光仔同我哋同桌而坐,而佢亦有份挑選阿Bu加入廣播界,我一定要向光仔了解吓阿Bu嘅過人之處,「阿Bu係我認識嘅年輕一輩入面,較為腳踏實地嘅一個,就係佢嘅踏實吸引到人。」

係?咁又要睇吓阿Bu有咩目標先,「如果要以森美或者小儀作目標,我唔使諗,一定答係小儀,開心好多,好似森美咁,我有時feel到佢有啲壓力㗎,對我嚟講,太辛苦嘞!」

哈哈哈!我估唔到阿Bu嘅事業vision係做「小儀」,而且咁open爆料。我話你知,不論做任何事,有vision、有目標,勇往直前,一定掂!

Kary藉新EP發放正能量,同「艷影紗窗」一樣,對身體有百利而無一害。

首試同步錄音

據光仔講,3位「遊花園」成員感情有如一家人,灘叔係「爸爸」、迪偉係「媽媽」、阿Bu就係「阿仔」,佢哋晚晚不停接聽聽眾電話,接觸人嘅層面特別廣泛,迪偉話:「聽我哋節目嘅人,其實有時比我哋仲了解我哋自己,所以唔少人一打嚟已經同我哋好似朋友咁傾偈,有時佢哋明知打嚟會畀我哋鬧,都要搵我哋鬧醒佢哋㗎,有啲人偷食、有啲又一腳踏N船,全部都係同我哋啱channel嘅,所以先同我哋分享自己嘅秘密。」

灘叔接住話:「依家MSN,甚至SMS氾濫,已經好少有真人發聲嘅即時對答,我哋有3把聲喎,所以好多人會當我哋係friend。好似有一個媽媽打上嚟,同我哋分享佢去西班牙『娶新抱』嘅喜悅,講講吓我哋至知佢嘅『新抱』都係男人,證明社會好多人事都比平常人想像中open。」

哈哈哈!佢哋星期一至五都接觸咁多人,視野自然拉得比平常人闊,每一晚做節目都好似同時為自己為人「自我增值」一樣。而不停自我增值嘅,仲有即將推出新EP嘅Kary。

「今次我嘅EP名為《Keep Breathing》,意思係無論面對咩不如意事都要保持正面,繼續呼吸,開朗心境係最佳態度。為咗新嘗試,我請咗Ted Lo(著名製作人,側田三叔)為我製作其中一首歌〈Here We Are〉,我哋用咗一日去做,佢一邊彈琴我一邊唱,同步錄音,希望可以帶出一個現場嘅感覺。」

美酒係一滴都唔能夠浪費,今晚灘叔帶嚟嘅靚酒,我就真係飲到一滴不留。

Kary(左)同Chelsea(右)同期出碟,我祝佢哋成功突破自己!

上甜品現「食品」

家製作歌曲,係音樂、人聲分開製作,難得Kary有勇氣考驗自己,唔讚唔得!不過,講到今晚對Kary最大嘅考驗,就係飯局尾聲,甜品上場嘅一刻,一直表現lady嘅佢,雙眼忽然放光,「我好鍾意食甜嘢㗎,一見到呢個芭菲就好開心!」

而「遊花園」3子對甜品,一樣狂熱,全場起哄,人人搶試甜品,哈哈哈!氣氛咁融洽,真係要乾杯慶祝,乾!

「遊花園」3子為Kary、Chelsea打氣,模樣已經夠晒鬼馬,原來最鬼馬時刻仍然未到,直至甜品上枱時,佢哋更加生鬼,哈哈哈!

八月花

地址:九龍塘又一城商場地下G25號店
電話:2333 0222